Xitayning 'Aptonom Rayonlar'da Élip Bériwatqan Teshwiqati Aptonomiye Siyasitining Aqmighanliqining Ipadisi
Muxbirimiz Weli
2009-08-31
2009-08-31
Bügün xitayning shinxua agéntliqi "xujintawning shinjang heqqidiki muhim yolyuruqi pütün memlikette öginiliwatidu" dep xewer élan qilghan bolsimu, emma xitay hökümiti "xujintawning muhim yolyuruqini öginish" dégen heriketni peqet tibet, guangshi, ichki mongghul, ningsha aptonom rayonliridila élip bériwatidu.
Xitay dölet térorini ishqa sélip, Uyghurlarni qirip tashlash üchün, chish-tirniqighiche qurallandi.
Xitayning dölet komissari lyuyendongmu ürümchige bérip, bügün yene xujintawning yolyuruqini öginish lazimliqini tekitlidi.
Xujintawning ürümchide qilghan sözide chongqur ögengidek bérer yéngi nezeriye yoq
Dunya uyghur qurultiyining bayanatchisi dilshat rishitning qarishiche, xujintawning ürümchide qilghan sözide chongqur ögengidek bérer yéngi nezeriye yoq.
Uning éytishiche, xujintawning dégenlirining hemmisi yenila 60 yildin buyan déyiliwatqan "milletler ittipaqi" dégendek emeliyette aqmighan kona gepler. 60 Yildin buyan aqmighan bundaq kona geplerni yenila her qaysi aptonom rayonlarda keng kölemde öginishni tekitleshning özi, xitayning aptonomiye siyasitining emelge ashmighanliqi we xelq uni qobul qimighanliqining ipadisi.
Xujintaw ürümchige mesilini hel qilghili emes, belki uyghurlarni basturghanlargha ilham bergili bardi
Dilshat rishitning qarishiche, xujintaw ürümchige mexpiy bérip keldi, u ürümchige mesilini hel qilghili barmidi , belki uyghurlarni basturghanlargha ilham bergili bardi.
Emma xitay hökümiti hazir dölet qurghanliqining 60 yilliqini tebriklesh aldida turiwatqan mushundaq peytte , bashqa aptonom rayonlardimu 5- Iyul ürümchi weqesidek weqe chiqip qalmasliqining aldini élish meqsitide bundaq bir teshwiqatni élip bériwatidu.
Xitay hökümiti hazir "xujintawning muhim yolyuruqi" dep daghdughiliq teshwiq qilishining yene bir teripi bar
Dilshat rishitning qarishiche, hazir xitay hökümiti 60 yilliqini tebriklesh aldida turuwatqanda , xitay hökümitining özide hazir ishenche qalmidi, özide ishenche bolsa héchqachan tebrikleshni meshq qilish üchünmu herbiy halet yürgüzüp turmaytti. U hazir peqet basturushqila tayinidighan halgha chüshüp qaldi.
Xitay ezeldin öz ichide mesile chiqqanda, bashqa milletler rayonida mesile peyda qilip, bu arqiliq öz ichidiki mesilining yönilishini bashqa yaqqa burap kéliwatidu. Xitay hökümiti hazir "xu jintawning muhim yolyuruqi" dep daghdughiliq teshwiq qilishining yene bir teripi bar , u bolsimu, xitayning öz ichidiki qarshiliqlarning aldini élish.
