Muxbirimiz Irade
2009-09-25
Béyjingning shinjékow rayoni shimaliy kochisidiki"qeshqer taamliri réstorani" da bügün etigen saet 9 din 10 minut ötkende partlash yüz bergen.
Süret, 25 - Séntebir, béyjingning shinjékow rayoni shimaliy kochisidiki"qeshqer taamliri réstorani" da yüz bergen parttilash weqesidin kéyinki xitay taziliqchi ishchilirining neq meydanni tazilawatqan körünüshi.
Etraptiki kishilerning muxbirlargha bildürüshiche, partlash intayin shiddetlik bolghan bolup, ashxana pütün tüzlinip ketken, etraptiki bashqa dukan we ashxanilarning dérizilirimu chéqilip, oxshimighan derijide zerbige uchrighan.
Emma, béyjing sheherlik jamaet xewpsizlik idarisi bayanatchisi weqede ashxanida ishlewatqan 3 kishi we ashxanining aldidin ötüp kétiwatqan bir qisim kishilerning yarilanghanliqi, yaridarlarning doxturxanigha élip bérilghanliqi we héchbirining hayatigha xewp yetmigenlikini bayan qilghan.
Xewerlerdin melum bolushiche, partlash yüz bergendin kéyin, neq meydangha saqchilar yétip kélip, weqe yüz bergen rayoni derhal qamal qilghan. Saqchilar tekshürüshtin kéyin, partlash yüzbergen xarabiliktiki barliq nersilerni toshup ketken. Uzaq ötmey, taziliqchi xadimlar kélip partlashtin qalghan qalduqlarni tazilighan.
Biz weqe yüz bergen ashxanigha yéqin jayda béyjing jishuyten doxturxanisining barliqini we yaridarlarning bu doxturxanigha élip kélingenlikini uqqandin kéyin, partlash weqesi hem yaridarlarning ehwalini bilip béqish üchün bu doxturxanigha téléfon qilduq.
Téléfonni alghan mesul xadim, özining bu soallargha jawab bérish hoquqining yoqluqini, bizge bu heqte héch nerse dep bérelmeydighanliqini, bizning yuqiri derijilik rehberlerdin sorishimiz kéreklikini éytip soallirimizgha jawab bérishni ret qildi.
U mesul xadim yene, "men peqet yaridarlar bu doxturxanigha élip kélindimu shuni bilip baqmaqchi?" dep sorighinimdimu, u buningghimu jawab bérelmeydighanliqini tekrarlidi. Biz buningdin xitay dairilirining weqege dair barliq uchurlarni we hetta yaridarlarning ehwalinimu qattiq kontrol qiliwatqanliqini chüshenduq.
Xitay saqchi dairiliri partlash weqesining ashxanidiki bir yéqilghu gaz tungining partlap kétishi seweblik kélip chiqqanliqini élan qilghan idi, emma közetküchiler bir gaz tungining bunchilik küchlük partlash peyda qilalmaydighanliqini, buning hergizmu bir addiy gaz tungi partlash weqesi emeslikini ilgiri sürüshmekte.
Dunya uyghur qurultiyi bayanatchisi dilshat rishit ependi bolsa, bu ashxana xojayinining bir hepte burun bir uchum xitay yashlirining tehditige uchrighanliqini, ashxana xojayinining bu ehwalni béyjing saqchi dairilirige xewer qilghanliqini ilgiri sürdi.
Menbe: http://www.rfa.org/uyghur/xewerler/tepsili_xewer/beyjingda-partlash-09252009191247.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.
