Pakistandiki Uyghurlar Xitay Elchixanisining Qurbanliq Qoylirini Qayturuwetti
Muxbirimiz Eqide
2009-11-30

Pakistanda turushluq xitay elchixanisining, qurban héyt bahaniside pakistanda yashawatqan uyghurlargha qarita yürgüziwatqan siyasiy mudiasi netije körsitelmidi.

Dunya uyghur qurultiyining, qurban héyt munasiwiti bilen pakistanda yashawatqan uyghurlargha bergen yardimi zor minnetdarliqqa érishken bir peytte, xitay elchixanisining pakistandiki bir qisim uyghurlargha qurbanliq qoy tarqitip bérish herikiti naraziliqlargha yol achqan.

Dunya uyghur qurultiyi, türkiye we gollandiyide yashawatqan uyghurlar shuningdek pakistandiki türkler iqtisad ajritip, pakistandiki uyghurlarning islam dinidiki muhim perizlerdin biri bolghan qurbanliq qilish shertini ada qilishigha yardem qilghan idi. Buning bilen teng xitay elchixanisi " qurbanliq" namida qoy késip bir qisim uyghurlargha tarqitip bergen.

Pakistandiki nopuzluq metbuatlarda xitay elchixanisining bu herikiti, uyghurlargha qilinghan alahide ghemxorluq süpitide teshwiq qilinghandin kéyin, xitay elchixanisi bilen alahide yéqin munasiwet ornitip kéliwatqan bir qisim uyghurlarning wastisi arqiliq xewersiz halda qurbanliqni qobul qilghan uyghurlar bu xil qurbanliqni qobul qilalmaydighanliqini bildürüp, qurbanliqni kimdin alghan bolsa derhal shuninggha qayturuwetken.

Pakistandiki ömer uyghur weqpi, xitay elchixanisining bu herikitining hergizmu addi bir mesile emeslikini, bu tunji qétim yüz bergen weqe bolmastin, bu xildiki weqelerning ilgiri köp sadir bolghanliqini, diniy étiqadi bolmighan xitayning qurbanliq namida qoy kisip musulmanlargha tarqitip bérishi uyghurlargha qilinghan hörmetsizlik hésablinidighanliqini, muhimi xitay elchixanisining bu yerde siyasiy bir muddiani chiqish nuqtisi qilip heriket élip bériwatqanliqini bildürmekte.

Pakistanda yashawatqan uyghurlar, her qaysi döletlerde yashawatqan uyghurlargha oxshashla, xitay hökümitining siyasiy zulumi astida yashawatqan uyghurlarning erkinlikke érishishini chin dilidin ümid qilip kelmekte.

Gerche pakistan démokratik bir dölet hésablansimu, emma xitay bilen bolghan munasiwitining alahide yéqin bolushi seweblik uyghurlarning siyasiy paaliyetlerni erkin élip bérishi türlük tosqunluqlargha uchrimaqta. Emma, pakistandiki ömer uyghur weqpining mesulliridin ekper ependining déyishiche, ular barliq imtiyazlarni ishqa sélip qolidin kélishiche tishichanliq bilen paaliyetler élip bériwatmaqta.

http://www.rfa.org/uyghur/xewerler/tepsili_xewer/xitay-we-pakistantandiki-Uyghurlar-11302009183135.html/story_main?encoding=latin

Yuqiridiki awaz ulinishidin, bu heqtiki melumatimizning tepsilatini anglaysiler.