5 - Iyul' Tutqunliri Ichide Hetta 13 Yashliq Ösmürlermu Bar
Muxbirimiz Shohret Hoshur
2009-12-14
Yéqinda bir 'ixtiyari muxbir' ürümchi shehiridiki bir tutup turush merkizini yoshurun halda ziyaret qilghan. U ziyariti dawamida asasliqi "5 - Iyul" tutqunlirining aile - Tawiabati bilen söhbet ötküzgen. Söhbet ürümchdiki bir tutup turush merkizining ishik aldi we shu etrapta élip bérilghan.
Körünüshlerdin melum bolushiche, her küni yüzlerche kishi tutup turush merkizinng aldida topliship turup kirip - Chiqquchilardin öz perzentliri yaki qérindashliri heqqide uchur igillimekte.
5 - Iyul weqesi yüz berginige 5 aydin ashqan bolsimu, bezi aililer hazirghiche tutqunlarning iz - Dériki heqqide uchur alalmighan. Ashkarilinishiche, 5 - Iyul tutqunliri tutup turush merkizidiki bashqa tutqunlargha nisbeten perqliq, yeni téximu qattiq muamilige duch kelgen.
Bir xanimning inkas qilishiche, 10 - Ayning otturilirigha qeder 5 - Iyul tutqunliri bashqa tutqunlargha nisbeten yémek - Ichmek qatarliq shert - Sharait mesiliside cheklimige uchrighan.
Bu qétimqi tutqunda bezi aililerde aka - Uka, dada - Bala tutqun qilinghan hetta beziler aile boyiche tutqun qilinghan.
Ashkarilanghan melumatlar ichide diqqetke sazawiri tutqunlarning yash mesilisidur.
'Ixtiyari muxbir' jemiy 4 kishini ziyaret qilghan, bularning ichide 3 kishi tutulup ketken balilirining 15 yashliq ösmürler ikenlikini bildürgen. Bu söhbettiki awazlardin, bir kishining balisining téxi 13 yashliq ösmür ikenliki melum bolmaqta. Shundaqla, mana bu melumatlardin, 5 - Iyul tutqunliri arisida 15 yash etrapidiki we 15 yashtin töwen yashtiki tutqunlar sanining az emesliki ashkarilanmaqta.
Xitay, 5 - Iyul weqesini qanungha asasen bir terep qiliwatqanliqini bildürmekte. Emma uyghur teshkilatliri bolsa, xitayning 5 - Iyuldin kéyinki tutqun we basturush heriketlirini qanungha asasen emes höjjetke asasen yeni siyasiy buyruq boyiche ijra qiliwatqanliqini ilgiri sürmekte.
Yuqiridiki awaz ulinishidin, bu heqtiki melumatimizning tepsilatini anglaysiler.
