Muxbirimiz weli
2009-12-01
Amérika yaponiyining okinawa aralliridiki herbiy qisimlirini chékindürüp chiqish üchün teyyarliq körüwatqanda, amérikining tinch okyandiki guam arallirida élip bériwatqan baza qurulushi we uning qaratmiliqi ashkarilinishqa bashlidi.
www.greenleft.org.au Din élindi.
Süret, yaponluqlarning amérika herbi bazisigha qarshi turup namayish we her türlük paaliyetlerni élip bériwatqanliqi toghrisidiki maqalidin bir körünüsh.
Amérika hazir okinawa aralliridiki herbiy bazisini emeldin qaldurush heqqide yaponiye bilen söhbet ötküzüwatidu. Amérika bilen yaponiye otturisdiki bu özgirishni xitay uchur wastiliri jiddiy közütüwatidu.
Amérikining guam arilidiki eng chong herbiy bazisi 2012 - Yilidin burun pötidu
Xitayning her xil namdiki uchur wastiliri 'béliqchi paraxot' dégen nam astidiki axbarat torlirigha tayinip igiligen uchurlargha asasen xewer qilishiche, amérika bir nechche yildin buyan özining tinch okyandiki guam aralirida élip bériwatqan herbiy baza qurulushining derijisini derijimu - Derije yuqiri örlitip, tinch okyandiki bu eng chong herbiy bazisini 2012 - Yilidin burun pötküzüp ishqa sélishqa we her éhtimalgha qarshi jidiy heriketke ötüshke teyyar turuwatidu.
Amérikining guam aralliridiki herbiy baziliri yaponiyidiki yaki filipindiki herbiy baziriligha oxshimaydu
W k iniskilopidiyisning bayan qilishiche, amérikining tinch okyandiki guam aralliridiki déngiz we hawa armiye bazisi ikkinchi dunya urushida, koriye urushida, wéytnam urushida we uningdin kéyinki, bolupmu 90 - Yillardin kéyinki dairilik toqunushlarda nahayiti muhim rol oynap kéliwatqan herbiy bazilar. Amérikining guam aralliridiki herbiy baziliri yaponiyidiki yaki filipindiki herbiy baziriligha oxshimaydu, bu, amérikining öz zéminidiki herbiy bazilar. Guam aralliri hindonéziyining jenubigha jaylashqan, u tinch okyanning merkizi halqisi. Sherqiy shimali asiya we sherqiy jenubiy asiya bilen awstraliyining alaqisini tutashturudighan déngiz asti éléktir léniyisi mushu araldin ötidu. Bu, amérika özining kimlikini namayen qilip turidighan, bu rayondiki ittipaqdashlirini téz yardem bilen teminleydighan we qarshi küchlerning kéngiyishini tosaydighan 'tinch okyan qorghini.' Bu bazilarda amérikining b - 52 Tipliq istratégiliyilik bombardimanchi ayropilanliri, eng chong awiamatkiliri, eng chongqur su astida paaliyet qilidighan yadro paraxotliri turidu.
Amérika bu aralda 300 ming kishilik déngiz, hawa armiyisining qumandanliq shitabini qurmaqchi
Yéngi zélandiye uchur wastilirining ashkarilishiche, amérika hazir guam aralliridiki apolo déngiz we hawa armiye bazisini kéngeytip, uni 66 milyon galun yéqilghu zapisi bar yéqilghu qachilash meydani, 100 ming dane partlatquch bomba, bashqurulidighan bomba we belgilengen nishangha özi yünilish tépip uchup baralaydighan oq uchi zapas turidighan chong iskilati bar, andérson bazisidinmu chong baza qilip qurush üchün nahayiti köp meblegh serp qilghan. Amérika bu aralni mushu bir nechche yil ichide, hununulu aralliridiki prol xarbor portida turushluq qisimlirini, yaponiyining okinawa herbiy bazisidiki qisimlirini öz ichige alghan 300 ming kishilik déngiz, hawa armiyisining tinch okyan qisimliri qomandanliq shitabigha aylandurmaqchi.
Amérikining bu istratégiyisi emdi xitayning sherqiy jenubi asiyagha kéngiyishini tosushni meqset qilidu
Uningda éytilishiche, xitayning sherqiy shimali asiyagha kéngiyishini cheklep turuwatqan yaponiyining okinawadiki herbiy bazisini, amérikining prol xarbor portidiki déngiz hawa armiye qomandanliq shitabini öz ichige alghan tinch okyan qisimlirining qomandanliq shitabini guam arallirigha köchüridighan bu istratégiyilik özgirish -- Emdi xitayning sherqiy jenubi asiyagha kéngiyishini tosushni, mesilen, xitayning 2012 - Yilida 'teywenni urush qilmay élish pilani'ni berbat qilishni meqset qilidu. Bu, amérikining mushu ikki yil ichidila, guam aralliridiki baziliri arqiliq élip barghan 1700 qétimliq her xil shekildiki herbiy meshiqlerde, bu rayonda özining herbiy eslihe, herbiy téxnika, küch-Quwet jehettiki dunyawiy ilghar sewiyini saqlap kéliwatqanliqi arqiliq ipadilenmekte.
http://www.rfa.org/uyghur/xewerler/tepsili_xewer/amerika-tench-okyan-bazisi-12012009210346.html/story_main?encoding=latin
