Muxbirimiz Irade
2009-12-01
Kosowa 2008 - Yili sérbiyidin ayrilip musteqil bolghanliqini élan qilghan idi. Emma sérbiye bolsa kosowaning öz béshimchiliq bilen musteqilliq élan qilghanliqini ilgiri sürüp mesilini xelqara sotqa kötürüp chiqqan idi. Xelqara adalet soti bügündin étibaren bu dawagha qarap chiqishqa bashlidi.
AFP Photo
Kosowa prézidénti fatmiz séjdyu, bash ministir hashim taji qatarliqlar, kosowaning yéngi musteqilliq bayriqini xeliqqe sunmaqta.
1999 - Yili kosowadiki albanlargha élip bérilghan étnik qirghinchiliqtin kéyin, nato bashchiliqidiki armiye sérbiye we kosowagha hawa hujumi qozghighan idi. Buning bilen 1999 - Yilidin 2008 - Yilighiche kosowa birleshken döletler teshkilatining bashqurushida turghan. Yillardin béri bu rayonning salahiyitining zadi néme bolidighanliqi heqqide élip bérilghan uchrishishlardin bir netije chiqmighandin kéyin, kosowa 2008 - Yili 2 - Ayda musteqilliqini élan qilghan idi.
Sérbiyimu izchil halda kosowaning özining bir parchisi ikenlikini ilgiri sürmekte. Ular kosowaning birleshken döletler teshkilatining qanunlirigha qarshi heriket qiliwatqanliqini, bu musteqilliqining qanunluq emeslikini ilgiri sürüp, xelqara sotqa erz sunghan idi.
B b s ning xewiridin melum bolushiche, seyshenbe küni xelqara adalet soti mezkur dawani resmiy körüp chiqishqa bashlidi. Tarixida tunji qétim bundaq bir dawagha yoluqqan xelqara adalet soti dawa boyiche kosowaning musteqilliqini élan qilishining qanunluq yaki qanunluq emeslikini tekshüridu.
Seyshenbe künidiki birinchi qétimliq ispat anglash yighinida sérb diplomatlar we adwokatlar özlirining pikirlirini yaqilap ötti. Sérb wekil dusan batakowich sözide rayonning yalghuz bir terepning iradisi bilen ayrilip chiqishining qanungha uyghun emeslikini, buning b d t qanunlirighimu we sérbiyining igilik hoquqigha xilap ikenlikini ilgiri sürdi.
U yene, kosowaning sérblarning tarixi makani ikenlikini we bu mesile sérblarning kimlikige tutishidighanliqini ilgiri sürdi.
Kosowa tashqi ishlar ministiri iskender haseni bolsa, "kosowaning musteqilliqini qayturup élishning mumkin emeslikini, peqetla kosowa emes , belki rayonning ténchliqi üchünmu musteqilliqni saqlap qélishning intayin muhimliqi"ni bayan qildi. U sözide yene: "biz sérbiye bilen bashqa mesililerge ait her qandaq dialogni qarshi alimiz , lékin musteqilliqimiz talash - Tartish qilinidighan héchqandaq söhbetni qobul qilmaymiz, dédi we : "keynige qaytishimiz esla mumkin emes" dep eskertti.
Melum bolushiche , mezkur dawa jeryanida amérika, rusiye we xitay qatarliq 30 etrapida döletmu öz pikirlirini bayan qilip ötidiken. B b s'ning xewiridin qarighanda, ismi éniq ashkarilanmighan bezi döletler sotta kosowaning musteqilliqini resmiy étirap qilishning bashqa döletlerdiki "bölgünchilerge" mu yol échip béridighanliqini otturigha qoyidiken.
Emma kosowa terep bolsa musteqilliqni bikar qilidighan her qandaq bir heriketning rayonda qaytidin toqunush yüz bérishi üchün "piltige ot yaqqan" bilen barawer bolidighanliqini ilgiri sürmekte.
Xewerlerdin melum bolushche, xelqara adalet soti 10 qétimliq ispat anglash sotidin kéyin , mezkur dawa heqqide qarar chiqiridiken. Sotta ispat bérish yighini 11 - Dékabirda ayaqlishidu. Resmiy qararning bir qanche aydin kéyin ashkarilinidighanliqi texmin qilinmaqta. Gerche sot axirida chiqqan qararning héchqandaq qanuni küchi bolmisimu (mezkur sottin chiqqan qarar qanunlashturulmighan qarar bolsimu), yenila bundin kéyin bashqa döletlerning kosowaning musteqilliqini tonush - Tonumasliqigha belgilik derijide tesir körsitidiken.
Sérbiye dairiliri bolsa izchil halda téximu köpligen döletlerning kosowani musteqil dölet dep tonushining aldini élish üchün üzlüksz paaliyet qilmaqta.
http://www.rfa.org/uyghur/xewerler/tepsili_xewer/kosovo-serbiye-sotta-12012009210358.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.
