Muxbirimiz Yalqun
2009-12-16
15 - Dékabir küni xitay üchün ispiyonluq qildi, dégen guman bilen qolgha élinghan ishpiyon gumandarining üstidin stokholimdiki ottura sotta yene bir qétim sot échildi. Gerche sot yépiq halette élip bérilghan bolsimu, emma sot mezmunigha we jasus gumandarining qilishlirigha munasiwetlik bezi tepsilatlar shiwétsiydiki axbarat wasitiliri arqiliq tarqitildi.
RFA Photo / Yalkun
Süret, shwétsiyidiki xitay jasusi gumandari, shwétsiye grazhdani 61 yashliq uyghur, babur mexsutning 2007 - Yili 5 - Ayning 6 - Künidiki süriti.
Sottin kéyin shiwétsiye radiosining ziyaritini qubul qilghan jasus gumandarining bash eyibligüchisi tomas lindstrand eyiblinishning sewebliri heqqide toxtilip mundaq deydu: "u chetelde yashawatqan uyghurlarning shexsiy hayatigha, salametlikige, siyasi panahliq tilesh ehwaligha munasiwetlik tepsilatlarni we uyghurlarning her xil siyasi paaliyetlirige munasiwetlik matériyallarni, bolupmu dunya uyghur qurultiyigha munasiwetlik matériyallarni, dunya uyghur qurultiyi bilen qoyuq alaqisi bar on nechche ademning ehwallirini, shundaqla xitay hökümiti bilishni xalighan herqandaq ehwallarni xitay hökümitining shiwétsiyide diplomat we muxbirliq salahiti bilen paaliyet élip bériwatqan xitay jasusluq organlirining xadimlirigha tapshurup bergen."
U yene mundaq deydu: "xitay ishpiyonluq organlirigha matériyali tapshurup bérilgen bu uyghurlarning bir qismi cheteldiki uyghur herikitining muhim ademliri bolsa, yene bir qismi xitay hökümiti teripidin térrorist élan qilinghan kishilerdur. Eger uning bu herikiti yene mushundaq uzun dawamlashsa yaki bir sistémigha aylinip qalsa, matériyali xitay jasusluq organlirigha tapshurup bérilgen kishilerning ailisidikilerge yaki tughqanlirigha éghir ziyan - Zexmet yétishi mumkin. Kim bilidu, bu chaqqiche qanchilik insan bu ishning ziyinigha uchrap boldi."
Shiwétsiye axbarat agéntliqining tarqatqan bir xewiride eyibligüchining sözi neqil qilinip mundaq yézilidu: "ishpiyon gumandari xitay ishpiyonluq organlirigha matériyal yollashta mexpiy tutush, aldash qatarliq kilassik ishpiyonluq wasitilirini qollanghan bolup, köpinche waqitlarda kocha téléfonlirida téléfon qilghan, zörür tépilghanda belgilengen orunlarda mexpiy uchrashqan. U dunya uyghur qurultiyigha munasiwetlik uchurlargha ige bolush üchün yalghandin uyghur dewasigha köngül bölidighan qiyapetke kiriwalghan."
Shiwétsiye axbarat agéntliqining tarqatqan bu xewerde yene mundaq déyilidu: "ishpiyon gumandari xitay ishpiyonluq organlirining xadimlirigha yetküzgen matériyalliri üchün dawamliq heq élip turghan, saqchilar uning öyini axturghanda uning chapinining yanchuqidin 110 ming kron shiwétsiye puli chiqqan. Shiwétsiye qanuni boyiche buxil qanunsiz axbarat yetküzüsh jinayiti békitilse eng köp bolghanda 4 yil türme jazasi bérilidu. Biraq, ishpiyon gumandari hazirche jinayitige iqrar bolmighanliqi üchün 1 - Ayda yene sot échilidu."
Yuqiridiki awaz ulinishidin, bu heqtiki melumatimizning tepsilatini anglaysiler.
