Muxbirimiz Arslan
2010-03-12
Türkiyide chiqidighan radikal gézitining 2010 - Yili 3 - Ayning 10 - Künidiki sanida türkiyining sabiq dölet ministiri teripidin yézilghan, 'xitaydiki aq piramida tarixning sirliri' dégen témida bir maqale élan qilindi.
Netpano.com Photo
Sürette: aq piramida ichide tartilghan körünüshler
Bu maqalida asasliqi xitayning shien shehirining melum rayonigha jaylashqan 300 métir uzunluqtiki bir piramida heqqide toxtalghan bolup, bu piramidini iptidaiy türklerning yasighanliqini we piramidilarning ichide oghuz xaqanning mumiyasi barliqini bildürgen.
Maqale mundaq bashlanghan, Netpano.com Tor bétide okyan kelesh ependining yéngi bir maqalisi neshr qilindi, bu maqale, tetqiqatchi alimlarning derhal tetqiqat élip bérishi kérek bolghan tarixi sirlarni öz ichige alghan. Kazim mirshan we okyan kelesh ependilerge oxshash kishilerning chongqur tetqiqat élip bérishi bilen tariximizning sirliri mushundaq otturigha chiqidu.
Emdi bu maqalidiki bezi muhim melumatlar heqqide qaytidin mulahize qilayli. Xitayning shien rayonida, 300 métir ikenliki tilgha élinghan chong bir piramida we etrapida her xil hejimde nurghun piramidilarning mewjutluqi ipadilendi. Bu piramidilar amérikidiki piramidilarlagha oxshash tüz bir choqqigha ige. Bu piramidilarning 5000 - 6000 Yilliq tarixi barliqi texmin qilinmaqta.
Maqalida yene mundaq déyilgen, aq piramidilarni 2 - Dunya urushi jeryanida, amérikiliq uchquchi jémés géssén hindistandin changchinggha yémeklik toshuwatqanda körgenlikini doklat qilghan we bu piramidilarning aq tashtin yasalghanliqini texmin qilghanliqini bildürgen. Shundaq qilip bu rayondiki chong piramidilar bes - Munazire qilishqa yol achti. Gérmaniyilik tetqiqatchi yazghuchi hartwig hausdorf u rayonni ziyaret qilghan we nurghun matériyal we uchur toplighan hetta bir qanche parche resim tartqan, emma bu resimler az we uzaqtin tartilghan. Kéyin xitay dairiliri bu rayonda chetellik tetqiqatchilar we özlirining tetqiqatchilirini shundaqla arxéologlarning bu rayonda tetqiqat élip bérishini chekligen.
Maqalida yene mundaq yézilghan, "1954 - Yili C - 54 Namliq ayropilandin tartilghan tunji resim LIFE zhurnilida élan qilinghan. Gérmaniyilik tetqiqatchi hausdorf bu piramidilarla iptidaiy türklerge ait yéziqlar we nurghun oxshimighan mumiyalar barliqini sözligen bolsimu buni ispatlap bérilmigenliki üchün bu melumatlar bashqilarning diqqitini tartmidi. Bu heqte tetqiqat élip bérishqa qiziqqan nurghun tetqiqatchi we arxéologlar xitay dairilirige iltimas sunghan emma ularning iltimasliri ret qilinghan. Pat - Pat u yerge sayahetchi bolup barghan tetqiqatchilar piramidilarni uzaqtin körgenlikini we etrapida yerlik kiyimler kiyishken xitaylarni körgenlikini ipadiligen. Xitay bu piramidilarni mexpiy tutush üchün üstige topa töküp derex salghanliqi ilgiri sürülmekte.
Maqalida bildürüshiche yene okyan kelesh isimlik yazghuchi u piramidilarni körüsh üchün bir uyghur terjiman bilen u yerge birge barghan we nurghun qiyinchiliqlargha duch kelgen bolsimu, bir yashanghan xitaygha pul bérish arqiliq u piramidining ichige kirip tekshürüsh élip barghan.
Maqalida bildürüshiche yazghuchi u piramidining ichige kirgendin kéyinki körgenlirini teswirlep mundaq yazghan: "yashanghan bir xitay isharet qilip, qolimizdiki chiraghni bir terepke tutushimizni telep qildi, biz chiraghni u terepke tuttuq we u yerning bir qebre ichi ikenlikini chüshenduq, uning ichide ikki métirgha yéqin uzunluqta bir mumiya bar idi, buni körüp téximu hayajanlinip kettuq, mumiyaning béshi terepte bir quram tashta her xil isharet belgiliri we yéziqlarni körduq, ay - Yultuz we börining béshi bar idi. Eng ejeblinerliki, tamda üch métir uzunluqta mermer tashtin yasalghan bir heykel bar idi. Heykelning qosh münggüzi yaki anténnagha oxshash ikki tal nerse bar idi. Béshining tam otturisida yene ay yultuz belgisi közge köründi. Biz bu yerde körgen her sheyini bizni bashlap kelgen xitaygha bildürmestin resimge tarttuq. Uning ichide 7, 8 minut qalduq, bizni bashlap kelgen yashanghan xitay bizni tézrek chiqishqa aldiratti, biz u yerde yene birdem qélip, tekshürüsh élip bérishni telep qilduq, emma yashanghan xitay telipimizni ret qilip, achchiqlashqa bashlidi, pes terepke pelempey bilen chüshidighan bir yolni körduq we u yerge kirishni telep qilduq, yashanghan xitay, u yerge chüshüshning bek qiyin ikenlikini, chüshkendin kéyin chiqishning téximu qiyin ikenlikini, bu yerdin derhal chiqishimiz kéreklikini sözlidi, xitayning ching turuwélishi we achchiqlap kétishidin biz peske chüshelmiduq, emma chiragh bilen etrapqa qarap chiqtuq, tamlarda yéziqlar we shekiller bilen üsti - Üstige tizilghan we bir birige chapliship ketken taxtilarni körduq. Bularni körüp bek hayajanlanduq. Yashanghan xitayning dep bérishiche, u peske chüshelmigen pelempeyning töwen teripide bolsa, pelempeylerdin peske chüshkende, u yerde bashqa bir mumiyaning barliqini we uning héch buzulmighanliqini uningdin bashqa yene minglighan wiwiska - Taxtilarning barliqini zaman ötkenséri bu taxtilarning yiqilip bir - Birige chapliship qalghanliqini we bu piramidining oghuz xaqanning maziri ikenlikini bildürdi. Uningdin bashqa yene nurghun mazarlarning barliqining we hemmisining taqaqliq ikenlikini sözlidi. Kichik waqtida bir qanche mazarning ichini körgenlikini, kéyin bezilirining örülüp ketkenlik sewebidin étilip qalghanliqini anglatti."
Bu maqale uzun we tepsiliy yézilghan bolup, aptor namik kemal zaybek ependi maqalini qisqiche xulasilep mushu yerde axirlashturghan.
Xitayning shien rayonigha bérip tetqiqat élip barghan yazghuchi okyan kelesh ependi Netpano.com Tor bétide 2010 - Yili 3 - Ayning 3 - Küni 'aq piramidilarlagha yoshurunghan heqiqetler' namliq tetqiqat maqalisini élan qilghan bolup, bu maqale mundaq bashlanghan, on töt ay uzun we japaliq tirishish arqiliq qolgha kelgen bu tetqiqatlarni türk we dunya jamaitining diqqitige sunimen. Xitay zulumi astida hayatidin ayrilghan sherqiy türkistanliq uyghur qérindashlirimizgha alahide rehmet tileymen we ularni esleymen, bu tetqiqatni ulargha béghishlaymen.
Bügünki küngiche nurghun talash - Tartish peyda qilghan 'aq piramidilar' heqqide nurghun munaziriler élip bérildi. Beziler bu toghra dédi, beziler toghra emes yalghan dédi, bezi tetqiqatchilar bolsa, xitay, bu piramidilardiki intayin muhim melumatlarning otturigha chiqip qalmasliqi üchün tiriship kéliwatqanliqini we buning üchün bu piramidilarni we ichidiki melumatlarni mexpiy tutuwatqanliqini ilgiri sürdi.
Tetqiqatchi okyan kelesh ependi piramidilarning ichide körgenlirini resimge tartqan bolup, u resimlernimu intérnét torda élan qilghan. U resimlerdin eng diqqet tartqan süret bolsa ay yultuz belgisi. Tarixta ötken köktürk dölitining pulidimu ay yultuz mewjut iken.
http://www.rfa.org/uyghur/xewerler/tepsili_xewer/aq-piramida-03122010195852.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.
