Uyghurlar Yürek Sözlirini Kimge Dewatidu ?
Muxbirimiz Mihriban
2009-08-03
Muxbirimiz Mihriban
2009-08-03
Xitay hökümiti "5 - Iyul qanliq ürümchi weqesi" din kéyin wetendiki uyghurlarni radio - Téléwizorlarda sözlitip, ularning aghzi arqiliq uyghurlarning bextlik yashawatqanliqigha dunyani ishendürmekchi boluwatidu.
Süret, 10 - Iyul, jüme küni, medine isimlik 26 yashlik uyghur sodiger ayal, jümedin yanghan jamaetni bashlap namyish qiliwatqan körünüsh.
Bu uyghurlarning heqiqiy yürek sözlirimu? uyghurlar radio - Téléwizorlarda özlükidin mushundaq sözlewatamdu ? xitayning axbarat wasitiliridiki bu uyghurlarning sözliri kishilerni oygha salmaqta. Biz chetel muxbirlirining kamérasi aldidiki uyghurlarning yürek sadalirigha qulaq sélip baqayli.
7 - Iyul küni chetel muxbirliri ürümchige kirgendin kéyin chetel muxbirlirigha öz yürek sözlirini bayan qilish imkaniyitige ige bolghan bir qisim uyghurlar hökümetning uyghurlar üstidin yürgüzüwatqan siyasitige nisbeten naraziliqini mundaq bayan qildi.
Hökümetning uyghurlarni keng kölemlik tutqun qiliwatqanliqigha bolghan naraziliqini ipadiligen bir uyghur ayal saqchilarning puqralarning öylirige basturup kirip gunahsiz uyghurlarni tutqun qiliwatqanliqini bayan qildi.
Hökümetning téléwizor ékranlirida yarilanghan xitay puqralirini körsitip, xitay puqralirining kaltiki astida ölgen yarilanghan uyghurlar heqqide héchqandaq melumat bermigenlikige narazi bolghan bir uyghur boway hökümetning bu xil bir tereplime xewirige bolghan naraziliqini ipadilidi.
Doxturxanida, engiliye b b s radiyosi muxbirining ziyaritini qobul qilghan bir uyghur ayal érining ishqa kétiwatqinida xitay puqraliri teripidin urup yarilandurulup put, qolliri chéqiwétilgenlikini bayan qildi.
Hökümetning xitay puqralirining uyghurlarning muqeddes jayi bolghan meschitlerni buzup chéqishigha süküt qilishigha narazi bolghan bir uyghur ayal öz naraziliqini ipadilep, bundaq kétiwerse téximu yaman aqiwetlerning kélip chiqishi mumkinlikini tekitlidi.
Jüme namizidin kéyin chetel muxbirlirining ziyaritini qobul qilghan uyghur yashliri, hökümetning uyghurlar üstidin yürgüzüwatqan qattiq qol siyasiti astida uyghurlarning barliq erkinlikining boghuluwatqanliqi üstidin shikayet qildi.
Ürümchi kochilirida chetel muxbirlirining ziyaritini qobul qilishni ret qilghan bir qisim uyghurlar sözliride öz endishilirini ipadiligen. Bir uyghur yash éngiliz tilida özlirining endishisini mundaq ipadilidi :"kechürüng, sizning ziyaritingizni qobul qilalmaymen, hazir biz éhtiyat we qorqunch ichide yashawatimiz, boluwatqan ishlargha nisbeten narazi bolsaqmu, emma déyelmeymiz ..."
Gerche xitay hökümiti, hazir intérnét we téléfon alaqisini qamal qilip, weten ichidiki uyghurlar bilen chetellerning alaqisini üzüp tashlap, uchurni qamal qiliwatqan؛ radio - Téliwizorlarda uyghurlarni" 5 - Iyul ürümchi weqesi"heqqide ipade bildürüshke qistap, heqiqiy ehwalni dunyadin yoshurushqa urunuwatqan bolsimu, lékin uyghurlar yenila cheklik imkaniyetlerdin paydilinip öz awazlirini dunyagha anglatmaqta.
