Muxbirimiz Mihriban
2009-08-24
Ataghliq uyghur naxshichisi mirzat alim 2 - Awghust küni, namelum kishiler teripidin öltürülgen bolup, uning jesiti 4 - Awghust küni öz öyi etrapida toxtitip qoyulghan aptomobili ichidin bayqalghan.
Youtube Din élindi.
Süret, mirzat alimning "tar kocha" namliq naxshini orundawatqan körünüshliridin biri.
Mirzat alimning orunlishidiki "tar kocha " naxshisini anglimighan uyghur yoq bölushi mumkin. Ataqliq naxshichi mirzat alim ürümchi sheherlik 5 - Ottura mektepning muzika oqutquchisi bolup, u 90 - Yillarda özining yuqiri maharet bilen orunlighan "tar kocha", "ajrashmanglar ata - Anilar"namliq naxshiliri bilen uyghur xelqi arisida tonulushqa bashlighan idi.
Hazir uyghurlar arisida mirzat alimning sirliq ölümi heqqide xilmu - Xil perezler bolunmaqta. Mirzat alimning bir kesipdishining bildürüshiche, mirzat alimning jesiti 4 - Awghust küni öz oyi etrapidiki bir kochigha bashqilar teripidin toxtitip qoyulghan aptomobili ichidin tépilghan bolup, bu kishi bizge mirzat alimning nahayiti qebih usullar bilen öltürülgenlikini, saqchilarning uning ayali we uruq - Tughqanlirining bu heqte köp sözlishini chekligenlikini, shunga öziningmu bu heqte kop sözliyelmeydighanliqini bayan qildi.
Mirzat alimning cheteldiki bir tughqini özining mirzat alimning ölümi heqqidiki xewerni bashqilardin anglighanliqini, emma merhumning néme sewebtin öltürülgenlikini bilmeydighanliqini hetta uning rasttinla ölüp ketkenlikige hélighiche ishinelmeywatqanliqini bayan qildi.
Chetellerdiki uyghur tor betliride mirzat alimning ölümi heqqide bir qeder tepsiliy xewer bérilgen bolup, wetinim tor bétining 8 - Ayning 24 - Künidiki xewiridin ashkarilinishiche, merhum 2009 - Yili 8 - Ayning 2 - Küni (yekshenbe) öyidin sirtqa chiqip ketkenche dériki bolmighan, 8 - Ayning 4 - Küni mirzat alimning öyige yéqin bir kochida toxtitip qoyulghan aptomobili ichidin merhumning jesiti tépilghan, bu chaghda jeset sésishqa bashlighan bolup, béshigha qara xalta kiydürülgen halda tashlap qoyulghan, bir közi chachrap chiqip ketken, bedinide tayaq zerbisining izliri qalghan. Mirzat alimning ayali we achisi jesetni edliye doxturlirigha tekshürtken. Hökümetning edliye doxturliri, "yürek késili bilen ölgen" dégen xulasini yézip bergen. Mirzat alimning ailisi ölüm sewebi ashkara bolmisa, méyitni yerlikide qoymaydighanliqini bildürüp jesetni 3 kün saqlighan bolsimu, saqchilarning tehdit we bésimi bilen 8 - Ayning 7 - Küni (jüme) yenen yolidiki üzümzar réstoranining udulidiki jigdilik meschitide jüme namizidin kéyin merhumning jinaza namizi oqulghan.
Wetinim tor bétidiki xewerde bayan qilinishiche, jinaza namizigha qatnashqan uyghurlarning sani 4 - 5 Minggha yetken.Jinazini meschittin élip chiqiwatqan waqitta 10 din artuq saqchi aptomobili jamaetni qorshiwalghan bolup, jamaet qoralliq saqchi we eskerlerning nazariti astida méyitni qebristanliqqa élip mangghan.
Merhumning ölüm sewebi heqqide, uyghur tor betliride bayan qilinishiche, 2 - Awghust küni kéchide mirzat alim bir aghinisige téléfon qilip, özining ajayip dehshetlik bir menzirini körüp qalghanliqini, qoralliq saqchilarning arqisidin qoghlawatqanliqini dewatqinida, merhumning téléfoni üzülüp ketken iken.
Hazir mirzat alimning ölüm sewebi heqqide uyghurlar arisida türlük perezler boluwatqan bolsimu, lékin xitay hökümet terep bu heqte éniq uchur bermigen.
Radiomiz merhumning ölüm sewebi heqqide ehwal igilesh meqsitide ürümchige téléfon qilghan bolsaqmu, lékin ürümchi bilen bolghan téléfon alaqisi téxi eslige kelmigenliki üchün téximu éniq uchurgha érishish imkaniyiti bolmidi. Radio anglighuchilirimizdin ehwalni bilidighanlarning bizge uchur yetküzüshini ümid qilimiz.
Menbe: http://www.rfa.org/uyghur/xewerler/tepsili_xewer/mirzat-alim-olumi-08242009194813.html/story_main?encoding=latin
