«Uyghur Helq'araliq Ilim-Pen Aqartish We Hemkarliq Inqilabi»ni Élip Bérish Toghrisida Murajietname



Hörmetlik eziz qérindashlar:

Nechche ming yildin bériqi shanliq medeniyet izlirini yaratqan, dunya tarixida qudretlik, bayashat dölet-memliketlerni qurghan ejdadlarning ewladi bolghan millitimiz nöwette tarixtin béri misli körülmigen derijide eng zor xewp, tehdid we kirizis ichide turiwatimiz.

Wetinimiz ishxal astida. Millitimiz qulluq, milli zulum, jahalet, nadanliq iskenjiside eng zor derijide qiynalmaqta. San-sanaqsiz aililer xaniweyranchiliqta. Sansanaqsiz wetenperwer qehrimanlirimiz shéhit boldi we boliwatidu. Sansanaqsiz wetenperwre qehrimanlirimiz, wijdanliq ziyali, alimlirimiz tajawuzchi, zalim xitayning qanliq türmiside éghir jebir-zulumlar, qiyin-qistaqlargha uchridi we uchrawatidu.

Wetinimizning yer-zémin bayliqi eng éghir talan-tarajta. Xelqimizning iqtisadi qeddi téximu zor pükülgen halette. Xelqimizning eng eqelli insani heqliri intayin éghir depsende qiliniwatidu. Sansanaqsiz qérindashlirimizning musapirchiliqta yürekliridin qan-zerdab éqiwatidu. Nechche yüz minglighan qiz-yigitlirimiz qul ishchi qilinip ichikirilerge mejburi yötkep kétilip ishlitiliwatidu. Nechche yüz minglighan aghzidin anisining süt hidi ketmigen bighubar perzentlirimiz mejburi halda ata-ana mihridin ayrildurulup, tajawuzchi xitay medeniyitide asmilatsiye qilinishqa uchrap, ademde bolushqa tégishlik eng eqelli adimi pezilet, insanperwerlik, méhir-muhebbet, ghayilerdin mehrum qalduriliwatidu. Nechche yüz minglighan xelqimiz xelqqe éhtiyajliq, xelqqe heqiqi paydiliq maarip, metbuat, iqtisadi sistémilardin mehrum qalduriliwatidu. Xelqimiz bilimsizlik, ishsizlik, zeherlik chékimlik, eydiz... Qatarliqlardin qattiq azabliq ingrawatidu.

Zor köpchilik xelqimizning eng eqelli insani heqliri: tughulush, öz-özige mas kelgen maariptin behrimen bolush, özining iqtidarini bayqash we uni tereqqi qildurush-ishlitish, xelqqe paydiliq teshkilatlarni qurush, shirket, kan-karxanilarni qurush, chet'ellerge erkin-azade chiqish, normal ilim-pen uchur almashturush, özige mas kelgen xizmetke érishish, özi xalighan muhitta ösüp-yétilish, terbiyilinish, yashan'ghanda béqilish-kütülüsh, jismani we mal-mölük bixeterliki, sözlesh-pikir bayan qilish, dini étiqad... Qatarliq heqliri zor derijide depsende qiliniwatidu. Yeni millitimiz dunyadiki bashqa insanlardek bixeter, erkin-azade, bextlik yashashtin tamamen mustesna.

Démekki, biz uyghurlar öz ötmüshimiz, hazirimiz, kelgüsimiz toghrisida kallimizni téximu silkip oylanmisaq we achmisaq. Ghayet zor xewp ichide qalghanliqimizni bayqimisaq. Nurghunlighan qérindashlirimizning qan-yashliq, charisizliq haliti toghrisda tepsili oylanmisaq hem uning üchün heriket qilmisaq bolmaydighan derijige keldi.

Düshminimiz- tajawuzchi xitaylar intayin rezil. Ular xelqni sözletküzmeydu. Xelqning yürikini herdaim mujush, aldash, qorqutush arqiliq bizni téximu qul qilmaqchi, bizning wetinimizdiki bayliqlardin paydilanmaqchi, bizni özining toymas nepsi üchün insani heqlirimizdin yenila ayrimaqchi.

Xelqning yüriki qan-zerdapqa toldi. Epsuski ular düshmenning aldamchi epsunliri, qorqutushliri bilen özining néme üchün mushu halgha kélip qalghanliqini bilmeydu. Éghir turmush bésimi bilen, buningdin qandaq qutulush charisinimu bilmeydu.
Ey eziz, qérindashlar!

Özimizning ehwalini özgerteyli. Xelqimizning, millitimizning toluq insani heqlirini qolgha keltürüsh üchün ortaq köreshke atlinayli. Biz bundaq shor pishaniliktin qulluqtin, wetensizliktin birkün burun bolsimu qutulayli. Ewlatlirimizgha eng ésil rohi we bilim miras qaldurayli.

Undaqta insani heqlirimizni qandaq qolgha keltürimiz we qoghdaymiz?

Heq-menpeetlirimizni qolgha keltürüsh yolliri

Herqaysi dunya ellirining qanunida herbir kishining insani heqliri oxshashla qoghdilidu, dep qeyt qilin'ghan bolsimu. Emma hemmimiz bilishke tigishlik özgermes bir qanuniyet barki u bolsimu:

Heq-menpeet bilen küch-hoquq eng tanasipliq munasiwettidur. (Heq-menpeet én'gilizchide right , küch-hoquq power dep izahlinidu.)

Yeni, sizning qanchilik küch-hoquqingiz bolsa, sizning heq-menpetingiz shuninggha mas halda kapaletke ige bolidu. Bir milletning küch-hoquqi qanchilik bolsa shu milletmu öz emeli küch –hoquqigha mas halda heq-menpeetke ige bolidu hem uni kapaletke ige qilidu.

Démek, biz özimizning insani heq-menpeetlirimizni qayturiwalimiz we uni qoghdaymiz deydikenmiz shuni qolgha keltürüsh üchün tirek bolidighan küch-hoquqqa érishishimiz kérek.

Küch-hoquqning shekli qandaq bolidu?

1. Armiye-qoral küchi.
Armiye-küchi, herxil yadro, éghir-yénik herbi qoral we eskerlerni közde tutidu.

2. Armiye-qoral küchige tayanch bolidighan iqtisadi küch.
Iqtisadi küch, dölet mudapie sanaiti, herxil éghir-yénik sanaetler, pul-muamile apratlirining iqtisadi küchini körsitidu.

3. Iqtisadi küch we armiye-qoral küchige tayanch bolidighan teshkilat we iqtisas égiliri küchi.

Herqandaq ademning gerche öginish üchün zörür bolidighan beden qabiliyet iqtidari we allah ata qilghan bir kündiki waqit oxshash bolsimu, emma kishilerning alghan terbiyilinishi herxil bolghanliqtin kishilerning qilalaydighan ishi herxil bolidu. Bezi kishilerning ish ünümi we netijisi bezi kishilerdin yuqiri bolidu. Iqtisas égiliri dégenlik, del yuqiri süpette terbiyilen'gen, ish ünümi yuqiri kishilerni körsitidu. Démek bir teshkilattiki iqtisas égilirining süpiti we sani qanche yuqiri bolsa bu teshkilatning ish ünümi we riqabet küchi shunche yuqiri bolidu.

Shunglashqa herqaysi tereqqi qilghan eller herxil pul , sharaitlar arqiliq ilaj bar dölet mudapiet téxnikisi, sanaet we tebii penler iqtisas égilirini özlirige köplep jelip qilishqa tirishidu. Chünki iqtisas igilirining qilghan ishining iqtisadi we ijtimai paydisining yérimidin töwen qisimi u iqtisas igilirining ish heqqi qilip bérilgen bolsa, yérimidin jiq qisimi shu iqtisas igiliri tewe bolghan teshkilat we dölet, millet, medeniyet we jem'iyet üchün bolidu.

Uningdin sirit teshkillik, pilanliq, sistémiliq élip bérilghan herqandaq paaliyetning ünümi herbir adem yekke, tarqaq élip barghan paaliyetning ünümidin nechche hesse yuqiri bolidu.

Shunglashqa tereqqi qilghan ellerde herxil teshkilatlargha uyushush, shirketlerni qurush intayin asan we addi. Shundaqla ular iqtisas igilirini jelip qilishni özining uzun muddetlik, eng muhim dölet ishi qilip tutidu we emeliyleshtüridu.

4. Yuqariqilargha özlüksiz ichki énérgiye yetküzüp béridighan, hem yuqariqilargha uzun muddet kapaletlik qilidighan bir küch: bilim küchi.

Bilim küchi, yoshurun küch. Bilim küchi ademni terbiyilesh rolini öteydu. Adem bilim küchini köplep toplash arqiliq özini iqtisas igiliridin qilip terbiyiliyeleydu. Özining bilish sewiyisining dairisini kéngeyteleydu. Meslini téximu etrapliq, téximu chongqur we téximu yiraqtin oyliyalaydighan bolidu. Bilim arqiliq heriket sapasini, ish ünümini ashurghili bolidu. Bilim-téxnika arqiliq özining iqtisadi imkaniyetlirini ashurghili bolidu. Iqtisadi imkaniyet arqiliq shexs normal turmush kapalitige ige bolidu. Özining insani heq-menpeetlirini kapaletke ige qilalaydu. Bashqilargha emeli yardem béreleydu.
Bilim küchi töwendikidek amillar arqiliq érishilidu: kitab-jurnal, radio-téléwiziye, muntizim mektep... Qatarliqlar.

Yuqariqi küch-hoquqlargha eng muhim asas bolidighan amil bilim küchi.

Démek bizde néme eng kem? U bolsimu bilim. U bolsimu kitab.

Shexsi heq-menpeetlirimizni némige asasen qoghdaymiz? Kitab bilen heriket bilen qoghdaymiz.

Millitimizni düshmen zulimidin néme bilen azad qilimiz? Kitab bilen köresh bilen azad qilimiz.

Xelqimizning némige tayinip parawan, saadetlik turmushqa érishtürimiz? Kitabqa tayinip.

Wetinimizni némige tayinip qed kötürgüzimiz? Kitabqa tayinip.

Milli medeniyitimizni némige tayinip qoghdaymiz hem kücheytimiz? Kitabqa tayinip.

Eziz, möhtirem qérindashlar!

Hemmimiz kitabning muhimliqini bilimiz-yu, Yenila bixudliq qilimiz. Ésimizde shu tursunki, bizning bighemlikte ötküzgen waqtimiz, del nomussizlarning bizning heq-menpeetimizni depsende qilishqa heriket qilghan waqtidur. Biz depsendichilikke uchrap turupmu yenila bighemlik qilsaq, wijdanimiz qandaq kötüridu? Biz we biz üchün eng söyümlük bolghan qérindashlirimiz bihude bozek qilinsa, haqaret qilinsa, depsende qilinsa, öltürülse, türmilerge qamalsa, bir nan'gha zar bolup tursa biz yene qaysi yürek, qaysi bighemlik bilen qulaq yupurup yürimiz? Bu depsendichlik haman birküni öz béshingizghimu kélidu emesmu?

Bizni allah hemme insanlar bilen barawer yaratqan. Biz bundaq depsendichilikke, qulluqqa, adaletsizlikke, zulumgha, nadanliq-bilimsizlikke mehkum bolsaq hergiz bolmaydu. Öz heq-menpeetlirimizni özimizning küchimizge tayinip qolgha keltürishimiz lazim.

Ey wijdanliq uyghurlar! eziz qérindashlar!

Hemmimiz hemkarlishidighan dewr keldi. Hemmimiz inqilabqa atlinayli!

Bizning élip baridighinimiz is-tüteksiz inqilab!

Bizning inqilabimiz: ilim-pen aqartish we hemkarliq inqilabi!

Biz emdi burunqidek partizaniski halda milletni qoghdash-güllendürüsh ishini nechche on kishige artip qoysaq hergiz bolmas!

Hemmeylen bu inqilabqa atlinayli! bu beeyni bir jeng! nadanliqni, qulluqni, bicharilikni, zulumni pachaqlap tashlaydighan jeng!

Bu jengge atlinish hemmimizning eng eqelli imani, wijdani, adimi burchimiz!

Bu jeng hazirche sizdin qan telep qilmaydu, mal telep qilmaydu. Peqet sizdin zéhin, intizamchanliq, waqit telep qilidu.

Undaqta, uyghur xelq'ara ilim-pen aqartish we hemkarliq inqilabini qandaq bashlaymiz? Qandaq élip barimiz?

Uyghur ilim pen aqartish we hemkarliq inqilabi toghrisida

Bizning meqsidimiz: xelqimizning meniwi, maddi heq-menpeetlirini qoghdash. Xelqimizning qeddini kötürüsh. Medeniyitimizni kücheytish. Xelqimizni heqiqi insandek hör, parawan yashashqa érishtürüsh.

Yuqariqi meqsedni ishqa ashurushqa kapaletlik qilidighan küch-hoquqimiz yoq diyerlik. Emma buningliq bilen özimizning ademdek hör saadetlik yashash arminimizdin waz kéchishke bolmaydu. Öz heq-menpeetlirimizni qolgha keltürüsh üchün küch-hoquqni toplishimiz kérek.

Küch-hoquqning töt xil bolidighanliqi qeyt qilip öttuq. Démek. Bizning nöwettiki birinji nishanimiz. Küch-hoquqning eng asasi, eng négizi bolghan bilim küchige érishish we uni kücheytish.

Nöwettiki uyghur xelq'ara ilim-pen aqartish we hemkarliq inqilabining meqsidimu del nurghunlighan wijdanliq uyghurlarning xalisane emgiki arqiliq sistémiliq, pilanliq halda uyghur til-yéziqida köplep tür we miqdarda ijadi we terjime kitablarni, ün-sin buyumlirini ishlesh we tarqitish.

«Uyghur xelq'ara ilim-pen aqartish we hemkarliq inqilabi» inqilabqa yétekchilik qilish hey'iti namida pilanliq, sistémiliq, küchlük élip bérilidighan bolup:

1. Bu inqilabqa yétekchilik qilish hey'iti weten-ichi sirtidiki herqandaq herbi-siyasi teshkilatlar bilen baghlinishliqi yoq musteqil, mexpi paaliyet élip baridu.

2. Inqilabqa ishtirak qilghan herqandaq kishining isim-familisi, turushluq adrési... Qatarliq barliq shexsi uchurliri igellenmeydu hem ashkarilanmaydu. Ularning shexsi bixeterliki héchqandaq tehdidke uchritilmaydu.

3. Inqilabning barliq paaliyetliri peqetla tor arqiliq mewhum dunyadila élip bérilidu.
Inqilabning qedem basquchliri:

1.) Mezkur murajetnamini köplep uyghurlargha bildürüsh. Ularni inqilab sépimizge qétildürüsh. Inqilab sépimizge texminen eng kemide on mingdin artuq uyghurning ishtirak qilishini qolgha keltürüsh.

2.) «Uyghur xelq'ara ilim-pen aqartish we hemkarliq inqilabi»gha yétekchilik qilish hey'iti namida mexsus tor ponkitlirini qurush we ezalarni teshkillep biz uyghurlar eng éhtiyajliq dep qaralghan türler boyiche kitablarni yézish, tüzüsh, terjime qilish, tarqitish. Közligen, pilanlan'ghan nishanlarni ishqa ashurush.

3.) «Uyghur xelq'ara karxanichilar ittipaqi» ni qurush. Bu arqiliq dunyaning herqaysi elliridiki uyghur soda-sanaetchiliri, karxanichilirining ichki qisimdiki uchur, bilim almashturush, hemkarliq paaliyetlirini ilgiri sürüsh.

Inqilabning konkrét wezipiliri we qedem basquchliri inqilab ishtirakchilirigha ayrim tepsili uqturilidu.

Yuqarida «uyghur xelq'ara ilim-pen aqartish we hemkarliq» inqilabi toghrisida deslepki chüshenchiler bérildi. Emma néme üchün buni inqilab derijisige kötürüsh kérekliki toghrisida bezilerning kallisida sual shekillinishi mumkin.

Bizning millitimiz tarixtiki eng xeterlik ehwalda. Bizning milli til-yéziqimizdiki kitablar del bizning milli medeniyitimizni güllendürüshtiki ichki asas. Bu asasni yaritishni bir nechche on ademge we yaki weten ichidiki xitay hökümiti kontrolliqidiki metbuatlargha tashlap qoysaq hergiz bolmaydu. Milli til-yéziqtiki sewiyilik, xelqimiz eng éhtiyajliq kitablarni köplep berpa qilish hem uni zor köpchilik xelqqe tunushturush bizning milli medeniyitimizning mewjud bolush yaki tereqqi qilishi we yaki yoqilishta eng halqiliq amil.

Bu inqilabimiz nechche minglighan, nechche on minglighan, nechche yüz minglighan ezimetlirimizning az-azdin tirishchanliqi bilen yuqiri pellige kötürilidu. Özimizning milli bilim ghezinimiz, bolushi kérek.

Bu ghezinimiz bizge ehmetjan qasimi, muhemmet'imin bughra, isa yüsüp aliptékindek hettaki ulardinmu qabiliyetlik, ulardinmu sezgür siyasiyonlirimizni, nechche on minglighan éghir-yénik sanaet karxana-shirketlirige ige minglighan milyadir wetenperwer karxanichilirimizni, nechche minglighan dunya uchur-alaqisige tesir körsiteleydighan kompyutér uchur alaqe mutexesislirimizni, eng kemide ikkidin artuq chet'el tilida bimalal uchur almashturalaydighan nechche yüz minglighan talanit igilirimizni, öz millitining heq-menpeitini qoghdash üchün her türlük mexpi ishlarning höddisidin chiqalaydighan nechche ming alahide xadimlarni, talantliq génirallarni, iqtidarliq jengchiler we shuningdek millitimizning qeddini kötüridighan her sahediki nechche yüzming iqtisas igilirimizni terbiyileshke küchlük asas bolushi kérek.

Özimizning bilim ghezinimizge munasip iqtisas igilirimiz. Iqtisas igilirimizge munasip teshkilat we iqtisadi küchimiz, teshkilat we iqtisadi küchimizge munasip armiye-herbi küchimiz bolidu. Shundaqla armiye-herbi küchimizge munasip milli heq-menpeetlirimiz qolgha keltürilidu we kapaletlendürilidu.

Démek, öz til-yéziqimizdiki bilim ghezinimizning yeni kitab-jurnallirimizning süpiti, sani, türi, sewiyisi biz uyghurlar öz heq-menpeetlirimizni qolgha keltürüsh, qoghdashtiki eng muhim, eng halqiliq, eng nigizlik ötkel.

40 Yashtin töwen herqandaq adem yaxshi til öginish matériyali we yaxshi til öginish usuli bilen til ögense adette chet'el tilidin ikkini ikki yildin üch yilghiche bolghan waqit ichide xéli yuqiri sewiyide ögineleydu. Her qandaq adem özi heqiqi éhtiyajliq, özi üchün heqiqi muhim bolghan bilimlerni, toghra öginish usuli we yaxshi öginish matériyali arqiliq nahayiti tézla yuqiri sewiyide ögineleydu. Bolupmu bügünkidek bu xil sharaitta iqtisasliq bolush unchiwala oylighandek tes emes. Bir kesipte netije qazinish, herqandaq qiyinchiliqni yéngish, biz oylighandek tes emes. Gep néme üchün qilishni bilish we qandaq qilishni bilish.

Biz del zor köpchilik xelqimizge néme üchün öginip iqtisas igiliridin bolushining neqeder zörürlikining sewebini toluq bildürimiz. Shundaqla ularning qandaq qilishigha yol körsitimiz.

Bu inqilabgha herqandaq kishi choqum bir kishilik hessisini qoshalaydu. Öz millitimizdin bolghan 7 yashtin 70 yashqiche bolghan herqandaq kesip sahesidiki qérindashlirimiz özining tégishlik töhpisini qatalaydu. Chonggha chongche, kichikke kichikche xelqimiz üchün eng zörür bolghan wezipilerning némilikini bilish we uni orunlashturush iqtidarimiz bar.

Bu inqilabqa ishtirak qilghan herqandaq kishi heptide peqet 10 saet etrapida, yeni künde bir saettin sel artuq waqit. Belgilen'gen we yaki özi tallighan wezipini qilsa (elwette kitab yézish yaki terjime qilish), inqilabqa ishtirak qilghuchilar 10 milyundin köprek nopustiki uyghurdin 10 mingdin köprek adem ishtirak qilsila nurghun ésil kitab-maqalilar, kompyutér programmiliri, tor ponkit-betler, ün-sin buyumliri pütüp chiqidu.

Oylap baqayli, qérindashlar. Künde bir saet, herqandaq adem tamamen chiqirish imkaniyitide. Mubada 10 ming uyghur heptide 100 ming saetlik pilanliq, sistémiliq emgek qilsa. Silerche qandaq ishlar pütmey qalar?

Bir sewiyilik, eng éhtiyajliq kitabni yézish yaki terjime qilishqa 1000 saet ketti dések. Démek heptide uyghur til-yéziqida 100 parche kitab neshir qilinip bolinidu. Bir unwérstétning toluq kurs kespining töt yilliq omumi oquydighan yaki ders qilip ötülidighan kitab sani 100 din töwen. Egerde 100 dep tursaqmu, biz bu inqilabqa ishtirak qilghan uyghurlarning emgiki arqiliq bir yil ichidila rawurus bir unwérstétta ötülidighan derslik-kitablarni neshir qilip bolalaymiz.

10 Ming adem heptide 10 saettin pilanliq, sistémiliq xizmet qilsa, oylap baqayli, 100 ming saetlik emgek bolidu. Buning üchün bir adem qanchilik ishlesh kérek? Bir adem texminen yilda 3000 saet ishlise, 100 ming saetlik emgekni qilip bulush üchün 30 yildin köprek waqit kétidu!!!

Bu bir alimning, bir proféssorning, bir ziyaliyning bir ömri dégenlik emesmu?

Eng eziz qérindashlar!

Siler heptide 10 saet tamamen waqit chiqiralaysiler. Bizmu silerge özünglarning chamisi yétidighan xelq üchün intayin zörür bolghan qimmetlik emgeklerni bölüp bérimiz. Eng axirida hemmimizning ortaq emgiki arqiliq dunyadiki nopusi biz bilen teng kélidighan hettaki bizdinmu yuqiri bolghan tereqqi qilghan ellerdinmu yuqiri bolghan kitab zapisigha ige millet bolalaymiz.

Bu herikitimizmu beeyni bir inqilab. Bu hemmimizge, kelgüsi ewlatlargha menggü eng zor derijide paydiliq inqilab.

Mubada buninggha yüzminglighan qérindashlirimiz ishtirak qilsa, heptide xelqimiz eng éhtiyajliq, yuqiri sewiyilik kitabtin 1000ni neshir qilalisaq neqeder yaxshi. Bir-birimizning emgekliridin ortaq paydilansaq, hem uni kéyinki ewlatlargha menggülük miras qaldursaq bu emgikimiz biz we kelgüsi ewlatlirimiz üchün neqeder paydiliq emesmu?

Bizningmu uyghur til-yéziqida herxil dokturluq maqaliliri, herxil ésil pen-téxnika eserliri, unwérstét derslikliri, xelq'ara sewiyidiki yuqiri süpetlik matériyallar barliqqa kelse, bu kimge payda, bu kimge ziyan?

Sizning emgikingiz manga, méning emgikim uninggha, uning emgiki sizge paydiliq emesmu?

Bu inqilabtin sizmu yüz örüsingiz, menmu yüz örüsem, umu yüz örüse, bu xuddi özimizning putimizgha özimiz palta chapqanliq emesmu? Eng axiri hemmimiz oxshash bilimsizlik, nadanliq patqiqigha chongqur pétip, nomussiz düshmenning bizni téximu xaru-zebun, xaniweyran qilishigha özimiz yol achqanliqimiz emesmu?

21- Esirde nadan, qul millet bar. U bolsimu biz uyghurlar. Eng bichare millet bar. U bolsimu uyghurlar. Sapasi töwen bir millet bar. U bolsimu biz uyghurlar. Biz özimizning bext-saaditimizni zadi qachan'ghiche qolgha keltürelmey ötimiz?

Ey eziz, qérindashlar!

Biz uyghurlar esli, shundaq uyushqaq emesmu? Shunglashqa ismimiz, namimiz uyghur emesmu?

Biz bu inqilabta silerdin qan, mal telep qilmaymiz. Peqetla telep qilidighinimiz künde bir saet waqtinglarni chiqirip bizning sépimizge qétilinglar. Ailengdikilerni, dostliringlarni, uruq-tughqan qérindashliringlarni seperwer qilinglar!

Bu inqilabqa ishtirak qilayli disengler. Özünglerning texellusinglarni, höddisidin chiqalaydighan xizmitinglarning türini, ilxet arqiliq bizge ibertip bersengler, biz silerge qilalaydighan ishinglargha chushluq wezipe bérimiz.

Qéni eziz qérindashlar!

Oghuzxan nesli, bughraxan nesli, seidxan nesli, yüsüp xas hajip, mehmut qeshqiri nesli bolmish biz ewlatlar, özimizning burunqi mötidillikimizni, bighemlikimizni pütünley tashlayli!

Sépimizge qétilinglar. Qeddimiz bir kün burun bolsimu kötürülsun! bu wetensizlik, bu xarliqni bir kün burun bolsimu, bir saet burun bolsimu, bir minut burun bolsimu axirlashturayli! dunyadiki hör milletlermu qilalmighan ishlarni biz emeliy herikitimiz bilen qilalaydighanliqimizni ispatlayli! dunyadiki herqandaq milletlerdinmu bek inaq-ittipaq, gheyret-shijaetlik, pem-parasetlik ikenlikimizni ispatlayli! hemkarliq, uyghurluq rishtimiz bizge öz tirishchanliqimiz, emgikimiz arqiliq hör, saadetlik hayat ata qilsun! seweb qilsaq, allah bizni öz tileklirimizge, arzu-armanlirimizgha yetküzidu!

Qoshumche:


Uyghur xelq'araliq ilim-pen aqartish we hemkarliq inqilabi» gha yétekchilik qilish guruppisining nöwettiki wezipe-nishani



Birinji, teyyarliq xizmetler:

1. Murajetname yézish we uni köpchilik uyghurgha bildürüsh.

2, Hey'et namida tor ponkit yaki tor bet qurush.

Ikkinji, resmi xizmetler:

1. Hazirgha qeder weten-ichi sirtida neshir qilin'ghan barliq élkitab-maqalilarni toplash, retlesh,

2. Weten ichi-sirtidiki tarixtin bériqi barliq uyghur til-yéziqidiki kitab-maqalilarning sikanirlan'ghan ilkitab nusqilirini teyyarlash, retlesh, neshir qilish.

3. Én'giliztili, xenzutili, türk tili, rus tili, yapon tili, ereb tili... Qatarliqlar tillarni öginish matériyallirini toplash, retlesh, tüzüsh, neshir qilish.

4. Yesli, bashlan'ghuch, ottura mektep oqushliqlirini toplash, retlesh, tüzüsh, neshir qilish.

5. Ali mektep herqaysi kesipliri boyiche mexsus, toluq kurs, magistirliq, dokturluq derslik kitab, maqalilarni toplash, retlesh, tüzüsh, neshir qilish.

6. Muntizim unwérstét dersliklerdin sirt, tebii, sanaet, bashqurush, iqtisad, ijtimai, pelsepe, qanun, herbi penliri boyiche xelq üchün zörür ehmiyiti bar dep qaralghan matériyallarni toplash, retlesh, tüzüsh, neshir qilish.

7. Xelq'aradiki nopuzluq ilim-pen uchurliri, maqaliliri bésilidighan jurnallarni toplash, terjime qilish, neshir qilish.

8. Tordiki hazirghiche bolghan nadir, ésil tor maqalilirini toplash, retlesh, kitab qilip neshir qilish.

9. Uyghurlar üchün uyghur til-yéziqidiki ghayet zor hejim, türdiki yuqiri sewiyilik, süpetlik éléktronluq kütüpxana berpa qilish.

10. Her heptide eng kemide tiraji 5000 mingdin yuqiri bolghan 1000 ilkitab neshir qilip tarqitish halitini tiriship berpa qilish.

11. Qisqa waqit ichide tarixtin bériqi weten-ichi sirtidiki barliq uyghur til-yéziqliridiki kitablarni dunyaning herqandaq bulung puchqaqliridiki qérindashlirimizning mezkur élkitab bazimiz arqiliq tépip, heqsiz chüshürüp oqush imkaniyitini yaritish.

12. Yuqariqi chong nishanlargha asasen mexsus yil, ay, heptilerge bölün'gen wezipilerni belgilesh we orundash.

13. Zörür kompyutér tor betliri, programmilirini tüzüsh.

Yuqariqi wezipilerning höddisidin melum derijide chiqalaydighan, bizge herqandaq shekildiki teklip pikirlerni béridighan herqandaq qérindishimizni biz herqachan qizghin qarshi alimiz. Hem ularning bizbilen tézraq alaqilishishini inqilab sépimizni kéngeytishke bir kishilik tigishlik hessisini qoshushini chin dilimizdin ümid qilimiz.

Biz üchün bir ademmu, biz üchün birer kün, birer saetmu, birer parche kitab-maqalimu shunchilik tutiya, shunchilik eziz, shunchilik qimmetliktur. Men qatnashmisammu bolar, diyish siz üchün hem biz üchün, hettaki millitimiz üchün zor yoqitish. Özingizning allah bergen zihningizge, qabiliyitingizge ishining. On milyundin köprek uyghurning ichidiki ezimetlirimizdin nechche ming, nechche on ming, nechche yüz ming ademning bu sépimizge qatnishishi milli qed kötürishimiz üchün intayin zörürdur.

Qéni alimlar! qéni rehberler! qéni dokturlar! qéni wetenperwer uyghurlar!

hemminglarning uyghur xelqi üchün heqiqi üntinsiz xizmet qilidighan waqtinglar keldi. Silerning emgikinglargha biz xuddi türmide qanliq jismi bilen muhtajliqta qalghan yüz minglighan qérindashlirimizgha oxshash, bighubar ballirining qebriside charisiz qan-zerdab bolup bir éghiz tesellige muhtaj bolghan ata-anilirigha oxshash muhtajmiz!

Alaqilishish adrési: uygur.tekin@yahoo.com

2009- Yili 8- ayning 8- küni

Menbe: http://www.wetinim.org/forum/viewthread.php?tid=2570