Rabiye Qadir Xanim Newyorktiki Muxbirlarni Kütiwilish Yighinida Nutuq Sözlidi
Muxbirimiz Eqide
2009-07-22
Muxbirimiz Eqide
2009-07-22
Dunya uyghur qurultiyining reisi rabiye qadir xanim 21 - Iyul küni, nyuyork shehiride ötküzülgen 5 " - Iyul ürümchi weqesining heqiqiy ehwali" dégen témida ötküzülgen axbarat élan qilish yighinigha qatnashti.
www.peacehall.com Din élindi.
Sürette, dunya uyghur qurultiyining reisi rabiye qadir xanim 21 - Iyul küni, nyuyork shehiride ötküzülgen " 5 - Iyul ürümchi weqesining heqiqiy ehwali" dégen témida ötküzülgen axbarat élan qilish yighinida sözde.
Yighingha xitay démokratliri, tibet wekilliri, xelqara metbuat muxbirliri shuningdek xitayning chetellerde turushluq muxbirliridin bolup, 1000 gha yqéin kishi qatnashti.
Uyghur milliy herikitining rehbiri dunya uyghur qurultiyining reisi rabiye qadir xanim, dunya uyghur qurultiyi we amérika uyghur birleshmisining bir qisim mesulliri bilen birlikte, nyuyork shehiride ötküzülgen 5 " - Iyul ürümchi weqesining heqiqiy ehwali" dégen témidiki axbarat élan qilish yighinigha qatnashti.
Rabiye qadir xanim mezkür yighinda sözligen nutqida, xitay hökümitining "5 - Iyul ürümchi weqesi" bilen "4 - Iyul tiyenenmin weqesi" de élip barghan qirghinchiliqining oxshash ikenlikini, uyghur we xitay yashliri teripidin élip bérilghan bu tinchliq namayishining "zorawanliq herikiti " dégen qalpaq bilen qoralliq basturulup, bigunah xeliqning öltürülgenlikini otturigha qoydi.
Rabiye qadir xanim sözide, ilgiri xitaylar teripidin güzel, aq köngül, naxsha - Usulgha mahir millet dep teriplinip kelgen uyghur millitining, bügün oghri - Yanchuqchi, zorawan, térrorchi, bölgünchi dégen böhtanlar bilen eyibliniwatqanliqini, emeliyette bolsa xitay kommunst partiyisining uyghurlargha qarita térror basturmichiliqi yürgüzüp, uyghurlar bilen xitaylar otturisidiki milliy ziddiyetni kücheytip, bügünkidek qanliq weqelerning meydangha kélishige sewebchi boluwatqanliqini tekitlidi. Özining ikki perzentining bigunah xitay türmiside yétiwatqanliqini éytqan rabiye qadir xanim, xitay kommunist partiyisining ziyankeshlikige uchrimighan birmu uyghur ailisining yoq ikenlikini bildürdi.
Xitay ölkiliride yéqindin buyan déhqan we puqralarning naraziliq namayishliri pat - Pat körülüp turuwatqanliqini, buninggha yol qoyghan xitay hakimyitining uyghur wetinide we tibette yüz bergen tinchliq namayishlirini döletning birlikini parchilashqa urunghan dep qarilap, qoralliq basturghanliqini bildürgen rabiye qadir xanim yene mundaq dédi" : men uyghur xelqining tinchliqi we muqimliqi üchün tirishchanliq körsitiwatimen, men uyghur xelqige erkinlik, kishilik hoquq élip kélish üchün küresh qiliwatimen, emma xitay hakimyitining teshwiqatliri, milletler ittipaqliqi dégenlirining hemmisi saxta, bolupmu metbuat, gézit - Zhurnal, téléwizorlarda teshwiq qiliwatqan uyghurlarning xitay eskerlirige bildürüwatqan mihir - Shepqetlik körünüshlirining hemmisi oydurulghan, uyghurlar hergiz undaq saxtipezlik qilmaydu, chünki uyghurlar öltürülüwatidu, minglighan bigunah uyghur türmige tashliniwatidu.
Rabiye qadir xanimgha hemrah bolup, yighingha qatnashqan amérika uyghur birleshmisining muawin reisi alim séyitof ependi, xitay démokratliri nahayiti köp ishtirak qilghan mezkür axbarat élan qilish yighinining ehmiyiti heqqide toxtilip ötti.
Yighingha qatnashqan xitay démokratliridin yang jyenli ependi, rabiye qadir xanimning yighinda éytqan sözlirige yuqiri baha berdi.
Muxbirlarning xitay hökümitining uyghurlargha qaratqan maarip we pilanliq tughut siyasiti heqqidiki qarashliri toghrisidiki soaligha jawab bergen rabiye qadir xanim, gerche xitay hökümiti xitay bolmighan milletlerge aliy mektepke qobul qilishta étibar bérish siyasiti békitken bolsimu, emma uning héchqandaq emeliy rolining yoqluqini, aliy mektep püttürgen uyghur oqughuchilarning xizmet tapalmay, ishsiz yuruydighanliqini, pilanliq tughut siasitining teshwiqati bilen emeliyitining tüptin perqlinidighanliqini, héchqandaq bir uyghurning 3 perzentlik bolalmaydighanliqini bildürdi.
Muxbirlarning, xitayning " 5 - Iyul ürümchi weqesi" rabiye qadir we dunya uyghur qurultiyining qutratquluqi astida yüz berdi dégen teshwiqatigha qarita sorighan soaligha öz ipadisini bildürgen rabiye qadir xanim, özining heqiqeten uyghurlar teripidin himaye qilinip, "uyghurlarning anisi" dégen sherepke érishkenlikini emma 5 " - Iyul ürümchi weqesi" ning meydangha kélishige sewebchi emeslikini, özining zorawanliqqa qarshi turup, uyghur xelqige tinchliq élip kélishni teshebbüs qilidighanliqini éytip, " bu qétimqi weqede xitay hökümiti özining xataliqini yoshurush üchün, men we teshkilatimizgha qara chaplap, mesuliyetni bizge artishqa urunup keldi. Eger xitay hökümiti mesilini tüp yiltizidin hel qilishni xalisa, wang léchüenni jazalap, dunya uyghur qurultiyi bilen dialog qurushi kérek" dégen telipini otturigha qoydi.
