Enqerede Uyghurlar Heqqide Dügilek Üstel Yighini
Muxbirimiz Erkin Tarim
2009-07-27
7 - Ayning 25 - Küni enqere bashkent uniwérsitéti istratégiye tetqiqat merkizi "sherqiy türkistan we uyghur türklirining ötmüshi we bügüni" mawzuluq dügilek üstel yighini chaqirdi.


7 - Ayning 25 - Küni enqere bashkent uniwérsitéti istratégiye tetqiqat merkizi chaqirghan "sherqiy türkistan we uyghur türklirining ötmüshi we bügüni" mawzuluq dügilek üstel yighinidin bir körünüsh.


Bu yighingha prof. Dr. Abdulqadir waroghlu riyasetchilik qildi. U sözligen échilish nutqida, bu yighinni échishtiki meqsetning türkiyining uyghur siyasitini belgilishige töhpe qoshushtin ibaret ikenlikini, yighinda déyilgen sözlerni retlep bir doklat teyyarlap mutexessislerning paydilinishigha sunilidighanliqini éytti.

Yighinda prof. Dr. Uyghur tazebay ependi, prof. Dr. Alimjan inayet ependi, prof. Dr. Sultan mexmut ependi, hajettepe uniwérsitéti oqutquchisi dotsént doktor erkin ekrem ependi, chanqaya uniwérsitéti oqutquchisi meryem hakim xanim we dunya uyghur qurultiyi muawin bashliqi séyit tümtürk ependiler söz qildi.

Yighin ikki bölümdin terkip tapqan bolup, birinchi bölümde uyghurlarning qisqiche tarixi, uyghur diyarining bügünki weziyiti, ürümchi weqesining kélip chiqish sewebliri we xitay hökümitining uyghurlargha élip bériwatqan siyasiti heqqide muzakire élip bérildi. Ikkinchi bölümde mutexessisler türkiyining uyghur siyasiti qandaq bolushi kérek? türkiyidiki ammiwi teshkilatlar uyghurlar üchün némilerni qilip bérishi kérek? dégenge oxshash témilar üstide toxtaldi.

Bu yighingha qatnashqan uyghur mutexessisler nuqtiliq halda türkiye bilen xitay otturisidiki munasiwette uyghur mesilisige alahide orun bérilishi kérekliki, uyghurlarning heq we hoquqini qoghdash üchün xitaygha bésim ishlitishi kérekliki heqqide toxtaldi.

Prof. Dr. Alimjan inayet ependi türkiyining xitay siyasitini tamamen özgertishi kéreklikini, türkiye tekitlep kelgen xitayning zémin pütünlükige hörmet qilimiz dégen sözini shertlik halda déyishi kéreklikini, yeni xitay uyghurlarning heq we hoquqini qoghdighan teqdirde zémin pütünlükige hörmet qilimiz déyishi kéreklikini otturigha qoydi.

Enqere bashkent uniwérsitétining türkiyidiki uyghur mutexessislerni chaqirip ötküzgen dügilek üstel yighinigha türkiye tashqi ishlar ministirliki mutexessisi, enqerediki herqaysi uniwérsitétlardin jemiyetshunas we xelqara munasiwetler mutexessisliri qatnashti.

Yuqiridiki awaz ulinishidin, bu heqtiki melumatimizning tepsilatini anglaysiler.

Menbe: http://www.rfa.org/uyghur/xewerler/tepsili_xewer/dugulek-ustel-yighini-07272009192308.html?encoding=latin