Xitay Dairiliri Uyghur Rayonigha Muqimliqni Qoghdashni Bahane Qilip Üzlüksiz Esker Yötkimekte

Muxbirimi irade
2010-02-15

5 - Iyul ürümchi weqesidin buyan xitay dairiliri uyghur rayonigha muqimliqni qoghdash bahanisi bilen üzlüksiz esker yötkimekte. Yéqinda xitay dairiliri merkizi herbiy komitétining buyruqigha asasen, qoralliq saqchi qisim shinjang bash etritining 6 - Tarmaq etriti qurulghanliqini élan qilip, buni shinjangning omumiy weziyitini qoghdashtiki yéngi istratégiyilik tedbir dep körsetti.


Xitay dairiliri yéqinda merkizi herbiy komitétning buyruqigha asasen, qoralliq saqchi qisim shinjang bash etritining 6 - Tarmaq etriti resmiy qurulghanliqini élan qilip buni tasadipiy weqelerni bir terep qilish, muqimliqni saqlash, térrorluqqa qarshi turush qoshunigha qoshulghan yéngi bir küch dep teriplidi. Shundaqla yene buning shinjangning muqimliqini qoghdashtiki yéngi istratégiyilik tedbir dédi.

Shinjang gézitide körsitilishiche, merkizi herbiy komitétining biwaste buyruqigha asasen qurulghan 6 - Tarmaq etriti ürümchini mewqe qilidighan, aptonom rayongha tesir körsitidighan, téz inkas we téz heriket qilidighan heriketchan jeng qilish etriti bolup, istratégiye mutexessisi erkin ekrem ependi bu xil téz inkas, téz heriket qilish etretlirining ilgiri bashqa döletlerdimu qurulghanliqini, emma buning mesilini hel qilalmaydighanliqini, bashqa döletlerning alliburun tonup yétip bolghan bir usul ikenlikini éytti.

Dunya uyghur qurultiyining bayanatchisi dilshat rishit ependi bizning bu heqtiki ziyaritimizni qobul qilip, uyghur rayonida bundin burunmu nurghun qoralliq qisimlarning barliqini, xitay dairilirining bu qoralliq qisimlarni üzlüksiz köpeytish arqiliq muqimliqni berpa qilish emes, eksiche muqimliqni öz qoli bilen buzuwatqanliqini éytti.

Xitay hökümiti 5 - Iyul weqesidin buyan uyghur rayonida üzlüksiz qoshun köpeytiwatqan bolup, téxi yéqindila uyghur rayonida muqimliqni qoghdash dégen nam astida 5 ming neper alahide saqchi qobul qilidighanliqinimu élan qilghan idi. Dotsént doktor erkin ekrem ependi xitayning uyghur rayonida ilgirimu nurghun sewebler bilen esker yötkigenlikini, buning bir yandin xitayning uyghur rayonini kontrol qilishqa ajiz kep kéliwatqanliqini körsetse, yene bir yandin buni hel qilish üchün tedbiriningmu yoqluqini ipade qilidighanliqini bildürdi.

Dilshat rishit ependi bolsa, hazir uyghur rayonida mewjut barliq qoralliq qisimlarning omumiy nopusqa sélishturghanda zor bir qisimni igileydighanliqini bildürüp, xitayning bu arqiliq uyghurlarni tamamen yoq qilish niyitide ikenlikini bildürdi.

http://www.rfa.org/uyghur/xewerler/tepsili_xewer/uyghur-elida-xitay-qoralliq-saqchiliri-02152010223924.html/story_main?encoding=latin

Yuqiridiki awaz ulinishidin, bu heqtiki melumatimizning tepsilatini anglaysiler.