2008 ‏ - Yili Uyghurlar Hayatida Yüz Bergen 10 Chong Weqe Heqqide Mulahize
Muxbirimiz Shöhret Hoshur
2008-12-31

Bügün 31‏ - Dékabir küni, yeni 2009 ‏ - Yili yéngi yil harpisi. Aldinqi bir yil ichide uyghurlar hayatida qandaq chong weqeler yüz berdi? bu weqeler uyghur hayatigha qandaq tesir körsetti we yaki weqelerning uyghur hayatidiki ehmiyiti néme? biz bügün mana bu témilarda muhajirettiki uyghur közetküchilerning pikirlirini igiliduq.


Uyghur közetküchiler birdek halda, 4‏ - Awghust semenyoli weqesini uyghur hayatidiki eng chong weqe dep körsetti. Amérikida yashawatqan siyasiy közetküchi ilshat hesenjan ependi 4‏ - Awghust semenyoli weqesini birinchi orungha qoyidighanliqini ipadilidi.

Gérmaniyide yashawatqan siyasiy közetküchi küresh Atahan ependining qarishiche, bu yil yawropa parlaméntidiki bir türküm ezalarning uyghur milliy herikitining rehbiri rabiye qadir xanimni qollap bayanat élan qilishi, uyghurlar hayatidiki chong weqelerdin biridur.

Shu mezgilde xitay tashqi ishlar bayanatchisi chin gang rabiye qadir xanim heqqide toxtilip, xanimni térrorchilarning kattiwéshi dep eyibligen idi؛ yawropa birliki buninggha derhal inkas qayturup, rabiye qadir xanimning erkinlik üchün küresh qilghuchi ikenlikini, uyghurlarning öz siyasiy hoquqi üchün küresh qiliwatqanliqini bildürgen idi.

Nöwette shiwétsiyide yashawatqan, yillar ilgiri ili kechlik gézitide bash tehrir bolup xizmet ishligen. Uyghur ziyaliyliridin rahile kamal xanim, 10 ‏ - Awghust kuchada yüz bergen zenjirsiman partlash weqesini uyghurlar hayatidiki untulmas weqeler dep bildürdi. Bu weqening ehmiyitini ilshat ependimu sherhilep ötidu.

Ilshat ependi sözide yene, guantanamodiki uyghur mehbuslarning amérika soti teripidin aqlinishini we rabiye xanimning olimpik harpisida amérika prézidénti jorj bush bilen körüshkenlikini muhim weqeler dep körsitidu.

Közetküchilerning qarishiche, bu yil 23 ‏ - Mart küni xotende yüz bergen ayallar namayishi uyghur hayatidiki zor weqelerdin biridur.

Nöwette engliyide bilim ashuruwatqan, xelqara qelemkeshler jemiyitining bash katipi qeyser abdurusul ependi bu heqte qarashlirini otturigha qoyidu.

Kanadada yashawatqan uyghur ziyaliyliridin gülshen abduqadir xanim yuqiridiki közetküchilerning körsetkenlirini toghra dep qarash bilen bille, amérikidiki uyghur alimi, törelme ghol hüjeyre mutexessisi shöhret mutellipning, "yéngi klonlash téxnikisi" heqqidiki tetqiqat netijisini shundaqla yene uyghur alimi erkin sidiq teripidin keship qilinghan we nasa teripidin mukapatlanghan, "alem boshluqidiki téléskopni yer shari bashqurush merkizide tengshesh téxnikisi" qatarliq weqelerni chong weqeler dep sanap ötti.

Ilshat ependi sözide yene, 19yashliq uyghur qizi güzelnur turdi teripidin élip bérildi dep qaralghan 7 ‏- Mart ayropilan bulash weqesinimu muhim weqeler dep körsetti.

Hörmetlik oqurmenler, yuqirida silerge, 2008 - Yili uyghurlar hayatida yüz bergen 10 chong weqe heqqide muhajirettiki uyghur közetküchilerning qarashlirini tonushturup öttuq.

Menbe:http://www.rfa.org/uyghur/xewerler/tepsili_xewer/uyghur-2008-10-chong-weqe-01012009070321.html/story_main?encoding=latin