Yéngisarda déhqan bolmaq tes (3)
Muxbirimiz shöhret hoshur
2009-01-12

Yéngisar déhqanliri ötken hepte, nahiyide yolgha qoyuluwatqan mejburiy tériqchiliq pilani heqqide shikayet filimi élan qilghan idi. Biz bu munasiwet bilen qeshqer wilayitining alaqidar tarmaqliridin mezkur erz heqqide melumat igiliduq.

Oqurmenlirimiz ewetken 'yéngisarda déhqan bolmaq tes' namliq sin - Alghudin élindi.

'Yéngisarda déhqan bolmaq tes' sin - Alghusidin élinghan bu sürette, yéngisarliq uyghur déhqanliri özlirining shikayetnamisini oquwatqan körünüsh.


Qeshqer wilayetlik erziyet idarisining bildürüshiche, nöwette qeshqerde eslihelik tériqchiliq dep atilidighan tériqchiliq pilani yolgha qoyulmaqta. Eslihelik tériqchiliq pilani yerdin ünümlük paydilinishni meqset qilghan, bu pilan buyiche, oxshash bir parche étizgha bir qanche xil ziraet térilidu.

Eslihelik tériqchiliq pilanini bezi mesul kadirlar qeshqerde omumyüzlük bolghan, xelqni éghir ziyangha uchratqan pilan dep ashkarilisa, yene bezi kadirlar, bu pilanning peqet yéngisarda meghlubiyetke uchrighanliqini, bashqa nahiyilerde bolsa netijilik bolghanliqini bildürdi.

Bezi xadimlarning bildürüshiche, eslihelik tériqchiliq pilani eslide ilmiyliktin uzaq hem bazar iqtisadining qanuniyitige xilap bolghini üchün meghlup bolghan.

Yene bezi xadimlarning bildürüshiche,eslide pilanda mesile yoq, mesile ijraatta, yeni asasiy qatlam kadirlirining natoghra xizmet istili pilanning meghlup bolushigha seweb bolup qalghan.

Biz qeshqer wilayetlik réwiziye idarisidin bu toghriliq ehwal igiliduq, mesul rehberlik ehwaldin xewersizlikini bildürdi.

Igilishimizche, qeshqer wilayetlik yéza igilik idarisi yéngisar déhqanlirining erzini 31 ‏-Dékabir küni tapshuruwalghan, erz köp tereplime mesililerge chétilghini üchün, erzni wilayetlik intizam tekshürüsh komitétigha yollap bergen.

Qeshqer wilayetlik intizam tekshürüsh komitéti erzni közdin kechürgendin kéyin, mesilini yene aldi bilen nahiyining éniqlap chiqishigha buyrighan. Yeni qeshqer wilayetlik partkomning muawin sékrétari jang jyen wilayetlik intizam tekshürüsh komitétining nahiyige bérip ehwal igilishini tosighan.

Yene özini ashkarilashni xalimighan melum bir rehber, qeshqer wilayitide heqsizliq we yolsizluqlarning köp ikenlikini, yéngisar déhqanliri otturigha qoyghan mesilining qeshqer wilayiti üchün omumyüzlük bir mesile ikenlikini, bu mesililerni hel qilishta özliriningmu charisizlik ichide ikenlikini ashkarilidi.

Igiligen melumatlirimizda, yéngisar déhqanlirining erzining hel bolmasliqida, nahiye bilen wilayet rehberliri arisidiki munasiwet torining muhim seweblerdin biri ikenliki bayqalmaqta.

Menbe:http://www.rfa.org/uyghur/xewerler/tepsili_xewer/yengisar-dixan-awazi-01132009041848.html?encoding=latin