Uyghur Xelqining Mötiwer Diniy Alimi Hamuthan Mehsumhajim Wapat Boldi
Muxbirimiz Arslan
2009-01-19
Muxbirimiz Arslan
2009-01-19
2009 - Küni 1 - Ayning 12 - Küni qaghiliqta yashap kéliwatqan mötiwer diniy alim hamutxan mexsumhajim wapat boldi. Hamutxan mexsumhajim qaghiliqta alemdin ötken meshhur diniy alim ablikimxan mexsumhajimning inisi bolup merhum akisigha oxshashla bilimlik, qabiliyetlik alim shexs iken.
RFA Photo / Arslan
Qaghiliqta yashap kéliwatqan mötiwer diniy alim hamutxan mexsumhajim, 2009 - Yili 1 - Ayning 12 - Küni wapat boldi. Süret, merhumning yéqinqi waqitlarda chüshken süriti.
Igilishimizche , hamutxan mexsum hajim uyghur diyarining guma nahiyiside meripetperwer ailide dunyagha kelgen. U dadisidin kichik qélip akisi ablikim mexsumhajimning terbiyiside chong bolghan hemde akisida we eyni zamandiki guma nahiyisining mötiwer alimlirida ilim tehsil qilghan. Merhum hamutxan mexsumhajim 1993 - Yili 6 - Ayda seudi erebistanigha bérip hej qilghandin kéyin ottura asiya we türkiye döletlirini ziyaret qilip yurtigha qaytip ketken.
Hamutxan mexsum hajimni bilidighan shexslerning texmin qilishiche , merhum bu yil 75 yash etrapida iken.
Biz bu heqte toluq melumatqa érishish üchün sherqiy türkistan maarip we hemkarliq jemiyitining bash katipi bolup xizmet qiliwatqan , merhumning oqughuchisi doktor alimjan bilen söhbet élip barduq.
Doktor alimjan merhumning hayat kechürmishliri heqqide toxtilip mundaq dédi, " hamutxan mexsum hajim 1980 - Yillarda qaghiliqta akisi ablikim mexsum hajim achqan diniy mektepte ders ögitip alahide töhpe qoshqan. U oqughuchiliri arisida, edib, natiq, este tutush qabiliyiti yuqiri, shéir oqushqa hérismen , her qandaq bir shéirni birla qétim oqup éside saqlashtin ibaret alahidilikliri bilen tonulghan ."
Doktor alimjanning bildürüshiche yene , hamutxan mexsum hajim hayati buyiche diniy ders ögitish, wez - Nesihet qilish bilen meshghul bolghan, merhumning alahidilikliridin biri, merhum hayatining axirighiche siyasi kéngeshke eza bolushni ret qilip diniy iradiside ching turup kelgen.
Istanbulda yashawatqan exmet ependining déyishiche, hamutxan mexsum hajim eyni zamanda atalmish "medeniyet zor inqilabi " da akisi türmige qamalghandin kéyin qattiq qiyin qistaqqa élinghan, tayaq zerbisidin bir quliqi anglimas bolup qalghan.
Yuqiridiki awaz ulinishidin, bu heqtiki tepsiliy melumatimizni anglaysiler.
