Meshhur Qirghiz Öktichisi Uyghur Mesilisige Köngül Bölidighanliqini Ipadilidi
Muxbirimiz Eqide
2010-04-14

Amérikining ottura asiya ishlirigha mesul tashqi ishlar yardemchi ministiri robért bileyk 14 ‏- April küni béshkektiki waqitliq hökümet rehbiri roza otunbayéwa we uning hemrahliri bilen tunji qétim körüshüp, washingtonning, qirghizistanning nöwettiki murekkep weziyettin ténch yol bilen qutulup chiqishi üchün shuningdek pilan qiliniwatqan yéngi saylamning ongushluq élip bérilishi üchün destek béridighanliqini bildürgen.


Qurmanbék baqiyéf bu hepte, eger waqitliq hökümet özi we uning ailisidikilerning bixeterlikige kapaletlik berse, wezipisidin istipa béridighanliqini bildürüp, eger shexsi mal - Mülkliri musadire qilinmighan ehwal astida yéngi hökümet bilen körüshüshke teyyar ikenlikini ipadiligen.

Gerche béshkektiki jiddiy weziyet tinjighan bolsimu, emma qirghizistanning jenubida weziyetning yenila mürekkep halda ikenliki bildürülmekte. Bu arida waqitliq hökümet wekilliri jalalabattiki xelq bilen uchriship yighin ötküzgenlikini bildürgen.

Roza otanbayéwa bügün, baqéyifni prézidéntliq wezipisidin mehrum qalghinigha ten bérishke chaqirip, buning memliketning tinchliqi üchün intayin muhim ikenlikini tekitligen.

Nöwette birleshken döletler teshkilati bilen yawrupa bixeterlik we hemkarliq teshkilatining qirghizistan weziyitini yéqindin közitip, weziyetni yaxshilash üchün tirishchanliq körsitiwatqanliqi bildürülmekte.

Qirghizistandiki meshhur kishilik hoquq paaliyetchisi ramizan dirildayéf ependi, eyni waqitta qirghizistan siyasitidin narazi bolup, awistiriyide yashashqa mejbur bolghan, u waqitliq hökümetning teklipi bilen qaytip kélip, qirghizistanning hazirqi weziyitini yaxshilash üchün aktip paaliyetke ötken.

Ziyaritimizni qobul qilghan ramizan dirildayéf ependi qirghizistanning hazirqi omumiy weziyiti heqqide toxtalghandin kéyin, waqitliq hökümetning uninggha xizmet teklipi sunghanliqini, özining bu teklipni oylishiwatqanliqini éytti.

Ramizan ependi yene, waqitliq hökümetning 6 ay ichide saylam élip baridighanliqini bildürüp, bizning waqitliq hökümetning xitay bilen munasiwet qurghan yaki qurmighanliqi toghrisidiki soalimizgha jawab berdi.

Dirildayéf ependi, waqitliq hökümetning xitay bilen héchqandaq alaqisi yoqluqini, qirghizistanning weziyitini yaxshilash üchün waqitliq hökümetning nöwette yawrupa, amérika we rusiye bilen munasiwet élip bériwatqanliqini tekitlidi.

Ramizan dirldayéf ependi yene, qirghizistandiki uyghur ittipaqi teshkilatining, qirghizistanda yüz bergen naraziliq namayishida ölgen qirghizistanliqlarning aile - Tawabatlirigha bergen yardimidin söyüngenlikini, özining uyghur mesilisini waqitliq hökümetke anglitish üchün tirishchanliq körsitidighanliqini bildürüp, "hazir uyghurlarning waqitliq hökümetke öz ehwalini anglitish pursiti keldi" dédi.

Qirghizistandiki siyasiy mehbuslar mesilisini hel qilish qatarida, chetellerdiki uyghur teshkilatlirining qirghizistandiki uyghur siyasi mehbüsliri mesilisiide aktip paaliyet élip bérishini teshebbüs qilghan dirildayéf ependi yene, bu mesilide qirghizistan uyghur ittipaqining derhal adwokatlar bilen körüshüshi kéreklikini bildürdi.

http://www.rfa.org/uyghur/xewerler/tepsili_xewer/qirghiz-oktichisi-uyghurlar-04142010193240.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.