Washingtonda 5 - Féwral Ghulja Weqesining 12 Yilliq Xatire Namayishi

Muxbirimiz Gülchéhre
2009-02-05

Hörmetlik oqurmenler, men gülchéhre, amérika paytexti washingitonning konéktikat kochisigha jaylashqan xitay elchixanisi aldida ötküzülüwatqan, amérikidiki uyghurlarning 5 - Féwral ghulja weqesining 12 yilliqini xatirilesh namayishi meydanidin silerge melumat bermektimen.

RFA Photo

2009 - Yili 5 - Féwral, amérika uyghur jemiyitining orunlashturushida, washingiton waqti chüshtin kéyin saet 3 te bashlanghan, 5 - Féwral ghulja weqesining 12 yilliqini xatirilesh namayish paaliyiti, washingitondiki xitay bash elchixanisi aldida ötküzülgen bolup, sürette, uyghur milliy herikiti rehbiri rabiye qadir xanim namayishchilar bilen birge.


Washingtonda bügün qish pesli kirgendin buyanqi eng soghaq bir kün bolsa kérek, perizimche nöwettiki témpératura nöldin töwen on giradusqa baridu.

Shuninggha qarimay washingiton hem qoshna shitatlardin kélip xitay elchixanisi aldigha yighilghan uyghurlar yüzge yéqinlashti, shundaqla terep ‏ - Tereplerdin qollirigha ay yultuzluq kök bayraqlarni tutqan uyghurlar dawamliq toplanmaqta. Ular bir ‏ - Biri bilen qizghin salamlashqandin kéyin, intayin tertiplik, jushqun keypiyatta ay yultuzluq kök bayraqlarni lepilditip, xitay hakimiyitining uyghurlargha séliwatqan zulumlirigha qarshi yézilghan plakat, teshwiqat taxtilirini kötürüp, naraziliq shoarlirini towlap elchixanini aylanghandin kéyin, washingiton waqti chüshtin kéyin saet 3 te 5 - Féwral ghulja weqesining 12 yilliqini xatirilesh namayish paaliyitini resmiy bashliwetti.

Namayish uyghur milliy herikiti rehbiri rabiye qadir xanimning xitay hakimiyitige qarshi naraziliq nutiqi bilen bashlandi.
2009 - Yili 5 - Féwral, amérika uyghur jemiyitining orunlashturushida élip bérilghan 5 - Féwral ghulja weqesining 12 yilliqini xatirilesh namayish paaliyitidin körünüsh. Sürette, uyghur milliy herikiti rehbiri rabiye qadir xanim namayishchilar bilen birge.
Gerche hazir ish waqti bolsimu, bügün uyghurlarning namayish qilidighanliqidin xewiri bardek ishiklirini burunla mehkem taqiwalghan elchixana xadimlirimu sirtqa chiqish paaliyitini toxtatqan emma, bezilirining namayish qiliwatqan uyghurlarni közitiwatqanliqi dérizilerdin ghil‏ - Pal körünüp turidu.

Yéqinqi bir qanche yillardin béri, amérikigha köchmen bolghan uyghurlar barghanche köpeymekte. Bügünki namayishning kölimi jehettinmu ilgiriki yillargha qarighanda uyghurlar bir qeder köp qatnashti déyishke bolidu. Amérika uyghur birleshmisi teripidin uyushturulghan bügünki mezkur namayish meydanida er ‏ - Ayallar, yashlar hetta balilarnimu köreleymiz. Ularning iradisidin xuddi5 - Féwral ghulja weqesidiki yashlarning, zulumgha tiz pükmeydighan qeyserane küreshchan rohini körgendek bolisiz.

Namayish teshkilatchiliridin uyghurlarning rehbiri rabiye qadir xanim ziyaritimizni qobul qilip, bu qétimqi namayishning meqsetliri we ehmiyiti toghrisida söz qildi.

Shundaqla, namayishqa qatnashqan uyghurlardin bir nechchisi öz héssiyatlirini ipadileshti.

Eslep ötsek, 12 yil burunqi ghulja bügünkidekla qehritan qish künining biri idi. Xitay hökümitining uyghurlargha élip barghan chektin ashqan milliy zulumi, talan ‏ - Taraji we zulumlirigha qarshi ghezep oti tashqan minglarche uyghur yashliri uyushup, pilakatlarni kötürüp tertiplik halda kochigha chiqip, adaletsizlikke qarshi shoarlar towlidi, hetta qehritan soghaqqa qarimay bezi yashlar "xitayning kiyimlirini kiymeymiz " dep kiyimlirini sélip tashlap yalingach halda namayishta kökrek kérip aldida mangdi.

Bu qétimliq tinchliq namayishi ishtirakchilirining birdin ‏ - Bir qorali peqet ularning zulumgha qarshi partlighan awazi bolsimu, uyghurlarning bu naraziliq herikitimu xitay hakimiyiti teripidin oxshashla rehimsizlerche zorawanliq bilen basturuldi. Nechche yüzligen uyghur yashliri öltürüldi, ilgiri ‏ - Axiri nechche mingi türmilerge élinip wehshiylerche qiyin ‏ - Qistaqqa élindi, shundaqla ularning bir qismi hazirghiche türmilerde yatmaqta.

Jamaetchilikke melum bolghandek, xitay hökümiti ta bügünge qeder 5 - Féwral ghulja weqesini qanliq basturush herikiti heqqide dunya jamaetchilikige jawab bergini yoq. Lékin körüwélishqa boliduki, uyghur paaliyetchiliri uyghur xelqining xitay hakimiyiti astida yashashni xalimaydighanliqini, erkinlik hem démokratiyige bolghan küchlük istikini ipadileydighan, milliy ghururining namayendisi bolghan 5 - Féwral weqesini türlük wastilar bilen eslep, ghulja yashlirining isyankar rohigha warisliq qilip kelmekte.


Washingitondiki bu namayish üch saet dawam qilmaqchi.

Yuqiridiki awaz ulinishidin, 5 - Féwral ghulja weqesining 12 yilliqini xatirilesh yüzisidin, amérika uyghurlirining xitayning amérikidiki bash elchixanisi aldida uyushturghan namayishining neq meydanidin bérilgen tepsilatini anglaysiz.

Menbe:http://www.rfa.org/uyghur/xewerler/tepsili_xewer/washingtonda-020509-namyaish-02062009015401.html/story_main?encoding=latin