Enqerede 5 - Féwral Ghulja Weqesi Xatire Namayishi
Muxbirimiz Erkin Tarim
2009-02-05
Muxbirimiz Erkin Tarim
2009-02-05
Ghulja weqesining 12 - Yilliqi munasiwiti bilen enqere gaziosmanpasha mehellisi, xorasan kochisidiki xitay elchixanisining aldida naraziliq namayishi ötküzüldi.
RFA Photo / Erkin Tarim
2009 - Yili 5 - Féwral, ghulja weqesining 12 - Yilliqi munasiwiti bilen enqerediki xitay bash elchixanisining aldida naraziliq namayishi ötküzüldi. Sürette, sherqiy türkistan medeniyet we hemkarliq jemiyiti enqere shöbisi bashliqi hayrullah efendigil ependi, türk qollighuchilar bilen xitay elchixanisigha qara gülchembirek sunghan.
Namayishni sherqiy türkistan medeniyet we hemkarliq jemiyiti enqere shöbisi uyushturghan bolup, namayishqa enqere kadirlar uyushmisi mesulliri türk dunyasi insan heqliri teshkilati mesulliri we ezaliri, uyghur dostliri türkler shundaqla enqerediki uyghurlardin bolup köp sanda kishi qatnashti.
Namayishta hemme birdek: xitaylar sherqiy türkistandin yoqal! türkiye hökümiti uxlima! qérindashliringgha ige chiq! qatil xitaylar uyghurlargha hésab ber! sherqiy türkistan uyghurlarning menggü uyghurlarning bolidu! dégenge oxshash shoarlarni towlashti.
Kéyin, sherqiy türkistan medeniyet we hemkarliq jemiyiti enqere shöbisi bashliqi hayrullah efendigil ependi muxbirlargha bayanat berdi.
Hayrullah efendigil ependi bayanatida ghulja weqesi heqqide qisqiche melumat bergendin kéyin, dunya jamaetchilikige chaqiriq qilip mundaq dédi: "xitay hökümiti teripidin dunya bilen munasiwiti üzüwétilgen sherqiy türkistanda yuqirida men dep ötken ghulja weqesige oxshash qirghinchiliq we zulum siyasiti 21 - Esirge kirgen künimizgiche dawam qilip kelmekte. Shunglashqa xitayning uyghurlargha élip bériwatqan bésim siyasitidin dunya jamaetchiliki xewerdar bolalmaywatidu. Bügünki künde sherqiy türkistan xelqi insan heqqini qolgha keltürüsh, musteqil erkin yashash yolida dawamliq türde mujadile élip barmaqta."
2009 - Yili 5 - Féwral, ghulja weqesining 12 - Yilliqi munasiwiti bilen enqerediki xitay bash elchixanisining aldida naraziliq namayishi ötküzüldi. Sürette, namayishchilar xitay elchixanisi aldida.
"Bu meqset bilen 1997 - Yili 2 - Ayning 5 - Küni men yuqirida dep ötken ghulja weqesi meydangha keldi. Biz weten millet yolida qurban bolghan shéhitlirimizni rexmet we minnet bilen esleymiz. Ghulja weqesi tüpeylidin türmide yétiwatqanlarning qoyup bérilishini, naheq öltürülgen kishiler üchün xitay hökümitining xelqara sotta sotlinishini telep qilimiz. Biz sherqiy türkistanliqlar we türkler zulum siyasiti élip bériwatqan, insan heq - Hoquqlirigha hörmet qilmaydighan ghulja qetlisini élip barghan xitay xelq jumhuriyitini nepret bilen eyibleymiz."
Hayrullah efendigil ependi bayanatini oquwatqan waqtida namayishchilar shuar towlashni dawam qildi.
Namayish jeryanida mikrofonimzni türk dunyasi insan heqliri jemiyiti bashliqi abdullah buksur ependige uzattuq. U mundaq dédi: "biz türk dunyasi insan heqliri teshkilati bolush süpitimiz bilen ghulja weqesi heqqide toxtilishtin burun dunya döletlirining térrorchi we térrorchiliq heqqide éniq izahat bérishi kérek dep oylaymiz. Bezi döletler bezi milletlerni dunyagha térrorchi dep körsitishke tirishiwatidu. Ularning heq hoquqigha hörmet qilmaywatidu. Bulardin biri sherqiy türkistan xelqidur. Türklerning ata yurti sherqiy türkistan 1949 - Yilidin buyan xitay dölitining ishghali astida turmaqta. Medeniy dunyadin uzaq bir yerde, sherqiy türkistan xelqi xitaylarning zulumigha qarshi mujadile élip barmaqta. Bu meqset bilen sherqiy türkistanda xitay zulumigha qarshi köp qétim qozghilanglar élip bérilghan. Bularning ichide eng muhimliridin biri ghulja weqesidur. Dunyada héchqandaq bir millet we dölet uyghurlar uchrighandek rehimsizlerche zulumgha duchar bolmighan. Emma öz zéminida insandek yashash, erkin yashashtin bashqa héchbir arzu telipi bolmighan bu insanlar bügünki künde xitaylar teripidin térrorist dep eyiplenmekte. Biz türk dunyasi insan heqliri teshkilati bolush süpitimiz bilen türk hökümitini sherqiy türkistan xelqige ige chiqishqa, xitay hökümitini uyghurlarning heq hoquqigha hörmet qilishqa siyasiy jinayetchi dep éyiblep türmige tashlighan kishilerni qoyup bérishke chaqirimiz."
Axirida xitay elchixanisining aldigha qara gülchembirek qoyulghandin kéyin namayishchilar shuar towlashqan halda elchixanidin uzaqlashti.
Biz namayishtin kéyin bu namayishni uyushturghan sherqiy türkistan medeniyet we hemkarliq jemiyiti enqere shöbisi bashliqi hayrullah efendigil ependige mikrofonimizni uzattuq. U ghulja weqesining 12 - Yilliqi munasiwiti bilen xitayning enqere bash elchixanisi aldida élip bérilghan bu namayishning muweppeqiyetlik ötkenlikini tekitlep, namayish jeryanidin melumat berdi.
Yuqiridiki awaz ulinishidin, ixtiyari muxbirimiz erkin tarimning bu heqte bergen tepsili melumatini anglaysiz.
