Norwégiyide 5 - Féwral ghulja Weqesi Xatire Namayishi
Muxbirimiz Aygul Yüsüp
2009-02-05
Muxbirimiz Aygul Yüsüp
2009-02-05
Bügün, yeni 2009 - Yili 5 - Féwral küni, norwégiye uyghur komitétining bir tutash teshkillishi bilen norwégiyining paytexti oslo we oslo etrapidiki sheherlerde yashawatqan uyghurlar bir arigha jem bolup 5 - Féwral ghulja weqesini xatirilesh munasiwiti bilen xitay elchixanisining aldida naraziliq namayishi ötküzdi.
RFA Photo / Aygul Yusup
2009 - Yili 5 - Féwral küni, norwégiye uyghur komitétining bir tutash teshkillishi bilen norwégiyining paytexti oslo we oslo etrapidiki sheherlerde yashawatqan uyghurlar 5 - Féwral ghulja weqesini xatirilesh munasiwiti bilen xitay elchixanisining aldida naraziliq namayishi ötküzgen bolup, süret, shu namayishtin bir körünüsh.
Del mushu künde milli zulum we xorluq jénigha patqan,démokratiye we erkinlikke telpüngen ghulja yashliri mustehkem bir sep bolup uyushup özlirining insaniy we diniy erkinlikini telep qilip ghulja kochilirida démokratik usul bilen namayish qilghan idi. Emma uyghurlarning kishilik heq - Hoquqlirini izchil depsende qiliwatqan xitay hökümiti qolida naraziliq namayishi uchun teyyarlanghan lozunkidin bashqa héch nerse yoq uyghur yashlirini wehshiylerche basturghan idi.
Uyghur élidiki yéqinqi zaman démokratik herikitide zor tesir qozghighan bu weqe yüz bergendin kéyin dunyaning herqaysi jayliridiki uyghur teshkilatliri özlirining keskin inkasini bildürüsh uchun 5 - Féwral ghulja weqesini her yili xatirilesh,bigunah shéhit bolghan qehrimanlarni we türmilerde azap chékiwatqan gunahsiz qérindashlirini türlük shekilde yad étishni mushu kündiki muhim paaliyet mezmunlirining biri qilip békitken idi.
Shu tüpeylidin bügün yeni 5 - Féwral küni paytext oslodiki 50 tin artuq uyghurlar teshkilat rehberlirining yétekchilikide xitay bash elchixanisining aldigha jem bolup uyghurche we inglizche shoar yézilghan lozunkilarni we shéhit qilinghanlarning resimi chüshürülgen resim ramkisini kötürüp,uyghurche, norwégche we xitayche tilda jarangliq shoarlarni towlap xitay hökümitige bolghan küchlük naraziliqlirini bildürüshti.
Namayish ishtirakchiliridin ömerjan aka, ömer hajim, we ehet ependi qatarliq namayishqa qatnashquchilar özlirining tesiratlirini we namayish heqqide toxtilip, oylighanlirini sözlep ötti.
Xitay elchixanisi aldida ötküzülgen namayish norwégiye waqti saet 2 de bashlinip saet 3 tin ashqanda netijilik axirlashti.
