Yawropa Bixeterlik We Hemkarliq Teshkilatining Yighini Astanada Bashlandi

Ixtiyari muxbérimiz Oyghan
2010-12-01

1-Dékabir küni qazaqistanning paytexti astana shehiride yawropa bixeterlik we hemkarliq teshkilatining 11 yildin kéyinki birinchi qétimliq yighini resmiy bashlandi. Yighingha 68 dölettin kelgen wekiller qatnashti.


AFP

1-Dékabir küni astanisa bashlanghan yawropa bixeterlik we hemkarliq teshkilatining yighinidin bir körünüsh.

1-Dékabir küni qazaqistan paytexti astana shehirining musteqilliq sariyida yawropa bixeterlik we hemkarliq teshkilatining 11 yildin kéyinki birinchi qétimliq muhakime yighini resmiy bashlandi. Mushu yilning béshida qazaqistan yawropa bixeterlik we hemkarliq teshkilatining reisilik wezipisini öz zimmisige alghandin buyan dunya axbarat wasitilirida qazaqistanning mezkur paaliyiti heqqide xilmu-Xil mulahiziler élan qilinip kelgen idi. Ularning köp qismida qazaqistanning reislik paaliyitige ijabiy baha bérilip kelgenliki éytilghan.

Qazaqistan tashqi ishlar ministirliqining melumatlirigha qarighanda, astana uchrishishigha 28 döletning rehberliri, shu jümlidin 27 prézidént hem bosniye we gértségowina prézidinmining reisliri qatnashqan. Shundaqla uninggha shwétsariyining muawin prézidénti qatnashqandin sirt yene parlaméntliq bashqurush sheklidiki 10 döletning hökümet bashliqliri, amérika qoshma shtatliri we watikanning dölet katipliri, gérmaniye fédératip jumhuriyitining bash ministiri , monakoning dölet ministirini öz ichige alghan 7 döletning muawin bash ministirliri ishtirak qilghan.

Buningdin tashqiri mezkur uchrishishqa 33 xelqaraliq hem rayon xaraktérliq teshkilatlarning wekillirimu qatnashqan. Jemiy 75 resmiy wekiller ömiki tizimgha élinghan.

Astana uchrishishining kirish mejlisining kün tertipi yawropadiki bixeterlik mesililiri, yawropada adettiki qoral küchliri toghriliq shertname, bu teshkilatning yéqinqi waqit ichide qilishqa belgilengen wezipilirige béghishlanghan bolup, yighinning échilish nutqini qazaqistan prézidénti nursultan nazarbaéf sözlidi.

U öz sözide mundaq dégen: "biz okyandin okyanghiche bolghan' téximu keng dairidiki bixeterlik we hemkarliqning yéngi derijisige köchmektimiz. Söz atlantik okyandin tinch okyanghiche, shimaliy muz okyandin hind okyanghiche bolghan töt okyan chégrisidiki bir tutash bixeterlik boshluqini shekillendürüsh heqqide boluwatidu. Astana uchrishishi istanbuldin kéyinki 11 yilgha üzülgen aliy derijidiki uchrishishlarni ötküzüsh enenisini tiklimekte. Bu teshkilatning qayta tughulushining belgisidur. Bügün biz astanida bir tutash we bölünmes yawro-Atlantik we yawro-Asiya birleshmisining shekillinishige bashlanma bériwatimiz".

Xabar agéntliqining xewirige qarighanda, astana uchrishishida sözge chiqqan dunya dahiyliri yawropa bixeterlik we hemkarliq teshkilatining tereqqiyat tarixida yéngi basquchning bashlanghanliqini ilgiri sürgen. Ularning tekitlishiche, qazaqistan mezkur teshkilatqa yéngiche nepes béreligen hem özining qedemliri we heriketliri bilen buni emeliyette ispatlighan.

Bu, analizchilarning éytishiche, bügünki künde yawro-Asiyaning yürikide boluwatqan mezkur tarixiy uchrishishning birinchi künide asasiy netijiler qolgha keltürüldi.

Melumatlargha qarighanda, astana yighinining barliq qatnashquchiliri teshkilatning öz ehmiyitini hélihem yoqatmighanliqini bir éghizdin mueyyenleshtürgen.

Sözge chiqqan birleshken döletler teshkilatining bash katipi pan ki mun, yawropa bixeterlik we hemkarliq teshkilati parlamént birleshmisining prézidénti pétros éfitimiu, mezkur teshkilat bash katipi mark pérén dé brishambo, yawropa ittipaqining prézidénti xérman wan rompéy, a q sh dölet katipi xillari klinton, qirghizistan prézidénti roza otunbaéwa, afghanistan prézidénti xemid karzay we bashqilar qazaqistanning teshkilat reisliki wezipisige hemde astana uchrishishigha özlirining yuqiri bahasini bergen.

Ular teshkilat aldida turghan muhim mesililerni hel qilishta birliship heriket qilishning zörürlüki, yawro-Asiya qiteside bixeterlikni teminleshning nöwettiki wezipiliri, qoralliq toqunushlar, milletler ara ziddiyetler, tebiy apetler, zeherlik chékimlik sodisi, ékologiye we bashqimu mesililer boyiche öz qarashlirini otturigha qoydi.

Dunya analizchiliri mezkur muhakime yighinidin kéyin uning netijiliri toghriliq pikirlerning asasiy jehettin ijabiy bolidighanliqini perez qilmaqta.

http://www.rfa.org/uyghur/xewerler/tepsili_xewer/osce-yighini-12012010185319.html/story_main?encoding=latin