Ixtiyari Muxbirimiz Ekrem
2010-12-13
Xelqara insan heqliri küni munasiwiti bilen 12 - Ayning 10 - Küni gérmaniye paytexti bérlin shehiride xeter astidiki milletlerni qoghdash teshkilatining xitaygha qarshi namayishi, myunxén shehiride d u q we yawropa sherqiy türkistan birliki teshkilatining xitaydiki insan heqliri depsendichilikini pash qilish namayishi bolup ötti.
RFA/Ekrem
2010 - Yilliq dunya insan heqliri küni munasiwiti bilen 12 - Ayning 10 - Küni gérmaniyide ötküzülgen namayish
Gérmaniyining myunxén shehiride ötküzülgen namayish sheher merkizidiki odions meydanigha orunlashturulghan bolup, chüshtin kéyin saet 14:30 din 16:30 gha qeder dawamlashqan bu namayishqa gérmaniyining herqaysi sheherliridin kelgen köp sanda uyghurlar qatnashti.
Namayishchilar ay yultuzluq kök bayraqni kötürüp, namayish sépining aldigha 2009 - Yili 7 - Ayning 5 - Küni ürümchide yüz bergen "5 - Iyul weqesi" ge munasiwetlik süretler chaplanghan taxtaylarni körgezme qilghan halda namayish élip bardi. Körgezme buyumliri ichide xitayning atom sinaqlirigha ait körünüshler, pilanliq tughut siyasitige ait körünüshler we xitayning qanliq qirghinchiliqlirigha munasiwetlik süretlermu belgilik salmaqni igiligen idi.
Myunxén shehiridin 400 km yiraqliqtin kélip bu qétimqi namayishqa qatnashqan, wetendin chiqqinigha uzun bolmighan neyime xanim, özining chetelde tunji qétim xitaygha qarshi bundaq bir sepke qoshulghanliqini, buningdin köp hayajanlanghanliqini bildürüp ötti.
Yawropa sherqiy türkistan birliki teshkilatining muawin reisi, gérmaniye uyghur ayalliri birlikining reisi gülnar xanim bu qétimqi namayishqa bolghan tesiratini ipadilidi.
Bu qétimqi namayishqa köp sanda ayallar we balilar qatnashqan bolup, közetküchilerning diqqitini jelp qildi. Bu kün xelqara insan heqliri küni hem xitay ziyaliysi lyu shawbogha nobél tinchliq mukapati tarqitilghan kün bolghach, köpligen kishiler xitaygha qarshi teshwiqat waraqchiliri we körgezmilerni körüp, xitaydiki insan heqliri depsendichiliklirige nepretlirini bildürdi. D u q bash katipi dolqun eysa ependi bu qétimqi namayishning meqsiti heqqide toxtilip ötti.
12 - Ayning 10 - Küni xelqara insan heqliri teshkilatlirining xitaygha qarshi namayishliri bir qisim yawropa döletliridimu élip bérilghan. Gérmaniyidiki xeter astidiki milletlerni qoghdash teshkilati 12 - Ayning 10 - Küni xitayning bérlindiki bash elchixanisi aldida namayish ötküzüp, xitay hökümitining pikir erkinlikige qarshi zorawanliq qilmishlirini eyibligen hemde xitay türmisidiki erkinlik jengchilirini qoyup bérishni telep qilghan.
http://www.rfa.org/uyghur/xewerler/tepsili_xewer/dunya-insan-heqliri-12132010171806.html/story_main?encoding=latin
