Muxbirimiz Mihriban
2010-05-12
"5 - Iyul ürümchi weqesi" hem "6 - Iyul qeshqer héytgah namayishi" din kéyin, qeshqer yerlik dairiliri qeshqer wilayiti teweside muqimliqni saqlash bahaniside, uyghurlargha qarita bir yürüsh basturush tedbirlirini tüzüp chiqqan hem qeshqer wilayitige qarashliq nahiyilerde buni emeliyleshtürgen.
" Qeshqer wilayitining xizmet uchuri"da, qeshqer wilayetlik yerlik hökümet dairilirining "5 -Iyul ürümchi weqesi" hem "6 - Iyul qeshqer héytgah namayishi" din kéyin, 7 - Aydin 9 - Ayghiche rayonda élip barghan bir yürüsh tedbirliri we uning emeliylishish ehwali heqqide statistikiliq melumatlar bérilgen.
Qeshqer wilayetlik yerlik hökümet dairiliri qurghan "qeshqer wilayetlik 5 - Iyul xizmet guruppisi" ikki chong tarmaq guruppidin teshkillengen bolup, qeshqer wilayitige qarashliq 11 nahiye hem qeshqer shehiridin 1 - Tarmaq guruppa teshkillengen. " Qeshqer wilayitining xizmet uchuri"ning 7 - Ay mezgilidiki doklatida körsitilishiche, bu guruppidikiler 7 - Ay mezgilide, qeshqer wilayetlik saqchi idarisige masliship, her qaysi nahiyilerdiki asasi qatlamlardin "5 - Iyul ürümchi weqesi" hem "6 - Iyul qeshqer héytgah namayishi"gha qatnashqan kishilerge dair uchurlarni igileshke mesul bolghan.
Doklatta bayan qilinishiche, qeshqer wilayitige qarashliq nahiyiler ichide, yéngisheher, yopurgha, maralbéshi, qeshqer shehiri, mekit, qaghiliq nahiyisi qatarliq jaylardin namayish qatnashchilirigha dair uchurlar eng köp yighilghan. Yeni yuqiriqi jaylardin jemi 1500 din artuq uchur yighilip, bu uchurgha munasiwetlik kishiler soraq qilinghan hem ularning beziliri qolgha élinghan. Xizmet uchurida peqet maralbéshi,yéngisar,yeken nahiyisi tewesidin qolgha élinghan ademler sani élan qilinghan bolup, bu 3 nahiyidin qolgha élinghan omumi adem sani 1077 neper dep bérilgen. Bashqa nahiyilerdin qolgha élinghan ademler sani "xizmet uchuri"ning bizning qolimizda bar qismida bolmighini üchün bu yerde élan qilish imkaniyiti bolmidi.
"Qeshqer wilayetlik 5 - Iyul xizmet guruppisi"ning 2 - Tarmaq guruppisi, qeshqer wilayitige biwasite qarashliq idare organlardin teshkillengen bolup, asasi qatlam ishxanisi, nazaret bölümi, tekshürüp - Tetqiq qilish ishxanisi, erziyet bölümi, shinjanggha yardem bérish ishxanisi, teshkilat bölümi, pénsiyige chiqqan kadirlar bölümi, idariler bashqarmisi qatarliq 12 organdin teshkillengen. Bu guruppining asasi wezipisi weqe qatnashchilirigha dair uchurlarni igilesh bilen bille " hökümet kadirliri xizmitini nazaret qilish؛ muqimliqni tekitlesh, milletler ittipaqliqini tekitlesh teshwiqat xizmetliri élip bérish, muqimliqni saqlash üchün partiye ezaliri hem kadirlardin xizmet guruppisi teshkillesh" qatarliqlar bolghan.
"Qeshqer wilayetlik 5 - Iyul xizmet guruppisi"ning 8 - Ay mezgilidiki xizmet doklatida, "5 - Iyul weqesi"din kéyin qeshqer wilayiti teweside, qoralliq saqchi etretlirige masliship, her bir mehelle, kentlerni asas qilghan halda muqimliqini saqlash mehelle etretliri teshkillengenliki, (mesilen, qeshqer shehiride bu xil mehellilerde muqimliqni saqlash etretliridin bashqa yene "ayallar muqimliqni saqlash charlash etriti" qurulghan)؛ rayon teweside "yingne sanjish weqesi"ge ait uchurlarni yighish ishliri élip bérilghanliqi؛ "5 - Iyul weqesi"din ilgiri intérnét tor betliride milletler arisidiki adawetni kücheytidighan söz - Heriketlerde bolghanlarni tekshürüp - Éniqlash ishliri ilgiri sürülgenliki؛ asasi qatlamlargha chöküp, ammining rayini sinash, xelqning hökümetke bolghan naraziliq pikirlirini yighish؛ mekteplerni hem tijaretchilerni asas qilghan halda, muqimliqni tekitlesh teshwiqat paaliyetliri élip bérilghanliqi؛ puqralarni xu jintaw, wang léchüen qatarliqlarning "5 - Iyul weqesi" heqqidiki doklatlirini öginishke teshkillesh xizmetliri élip bérilghanliqi bayan qilinghan.
Xizmet guruppisining 9 - Ayliq doklatida asasen musulmanlarning roza tutush mezgilidiki qeshqerning muqimliqi ching tutulup, xitayning dölet bayrimining 60 yilliqini bixeter kütüwélishqa kapaletlik qilinghanliqi؛ hökümet kadirliri, oqutquchi - Oqughuchilarning roza tutushigha dair uchurlar igilinip, xilapliq qilghuchilar jazalanghanliqi؛ "5 - Iyul weqesi"ge chétishliq kishilerni dawamliq qoghlap tutush ishliri élip bérilghanliqi qatarliqlar bayan qilinghan.
Dunya uyghur qurultiyining bayanatchisi dilshat rishit ependi, "qeshqer wilayetlik 5 - Iyul xizmet guruppisi"ning bu doklati heqqide toxtilip, bu xitay hökümet dairilirining uyghurlargha qaratqan basturush siyasitining neqeder qattiqliqini körsitidighanliqini bildürüp, xitay hökümitini uyghurlargha qaratqan qattiq qol siyasiti bilen eyiblidi.
Közetküchilerning qarishiche, qeshqer wilayiti "5 - Iyul ürümchi weqesi"din kéyin, muqimliqni tekitlesh, namayish qatnashchilirini qoghlap tutush qatarliqlarda xitay hökümitining basturush siyasiti eng qattiq ijra qilinghan jaylarning biri iken. Hetta yéqinda qeshqer wilayetlik jamaet xewpsizlik idarisi, teptish idarisi hem ottura xelq sot mehkimisi birleshme uqturush chiqirip, wilayet tewesidiki intérnét paaliyetlirige cheklime qoyghan, shundaqla öz aldigha tüzüp chiqqan xilapliq qilghuchilargha qarita qollinilidighan jazalash tedbirlirinimu élan qilghan idi.
http://www.rfa.org/uyghur/xewerler/tepsili_xewer/qeshqerde-basturush-05122010195019.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.
