5 ‏- Iyul Ürümchi Weqeside Qolgha Élinghan Yashlar Doxturlar Teripidin Ashkarilanghan

Muxbirimiz Eqide
2010-05-12

Dunya uyghur qurultiyining bayanatchisi dilshat réshitning bildürüshiche, qeshqer we yekendiki uyghur yashliri, 5 ‏- Iyul ürümchi weqeside xitay eskerliri teripidin yarilinip dawalinishqa mejbur bolghan. Doxturxa xadimlirining saqchi we eskerlerge maslishishi netijiside bu yashlar qolgha élinghan.

Dunya uyghur qurultiyi 5 ‏- Iyul ürümchi weqeside oqqa tutulup yarilanghan uyghur yashlirining qolgha élinghanliqini, bu yashlarning doxturlar teripidin ashkarilinip tutulghanliqini bildürmekte.

Dunya uyghur qurultiyining bayanatchisi dilshat réshit ependining éytishiche, qeshqer kérembagh doxturxanisi we yeken nahiyilik milliy tibabet doxturxanisining doxturliri, 5 ‏- Iyul ürümchi weqeside oq tekken uyghurlardin bir qanchisini xitay saqchi tarmaqlirigha tutup bergen.

Dunya uyghur qurultiyi tetqiqat merkizining bashliqi ümid agahi ependi, tetqiqat merkizi teripidin qolgha chüshürülgen ishenchlik melumatlargha asaslinip, 5 ‏- Iyul ürümchi weqeside heqiqeten doxturlarning, yarilanghan uyghur yashlirini xitay saqchi tarmaqlirigha tutup bergenlikini bildürdi.

Ötken yili 5 ‏- Iyul ürümchi weqesi yüz bergende, xitay hökümiti téléfonni öz ichige alghan barliq uchur wastilirini pütünley qamal qiliwalghanliqi üchün, biz bu heqte uchur élishqa amalsiz qalghan iduq.

Yarilanghan uyghur yashlirining heqiqeten doxturlar teripidin tutup bérilgenlikige ispat tépish üchün biz qeshqer kérembagh doxturxanisigha we yeken nahiyilik milliy tibabet doxturxanisigha téléfun urduq. Emma qanche köp tirishqan bolsaqmu bu doxturxanilardin bizge jawab béridighan adem chiqmidi.

Téléfonimizgha tasadipiy ulunup qalghan yekendiki bir qiz oqughuchi, qeshqerdiki bir uyghur ailisi shuningdek bir bimar bilen söhbet ötküzduq.

Biz ulardin érishmekchi bolghan jawabni alalmighan bolsaqmu, emma, xitay hökümitining bu jaylarda bixeterlik tedbirlirini dawamliq kücheytiwatqanliqi hemde kishilerning sezgür mesililerdin we siyasiy weziyettin qanchilik bizar bolghanliqi biz élip barghan söhbetlerdin éniq ashkarilandi.

Dunya uyghur qurultiyining tetqiqat merkizining bashliqi ümid agahi ependi, xitay hökümitining bésimi astida, nöwette uyghurlarning yüz bergen heqiqetni héchqachan qorqmastin bayan qilalmaydighanliqini bildürdi.

Qeshqer sheherlik saqchi idarisidiki bir xadimgha téléfunimiz ulanghan bolsimu, emma umu soalimiz axirlashmay turup téléfun turupkisini qoyuwetti.

Dunya uyghur qurultyi tetqiqat merkizining bashliqi ümid agahi ependi, saqchiliq wezipisi ötewatqan uyghurlarning hazirqi weziyitini tonushturdi.

http://www.rfa.org/uyghur/xewerler/tepsili_xewer/5-iyulda-qolghan-elinghanlar-05122010195024.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.