Xitay Hökümiti Térror Gumandarini Qayturup Bérishni Telep Qildi
Muxbirimiz Aygül
2010-09-02

Norwégiyide chiqidighan kündilik gézit muxbirlirining béyjingdin bergen xewirige asaslanghanda, yéqinqi künlerdin buyan béyjingda dölet ziyaritide boluwatqan norwégiyining tashqi ishlar ministiri jonas gahr störe tünügün xitayning tashqi ishlar ministiri yang jéchi bilen térror gumandari rashidin muhemmet ( mikail dawud) ni qayturup bérishtin ibaret intayin qiyin mesile üstide ikki saet dialog élip barghan.

www.bbc.co.uk/news Din élindi.

Süret, 2010 - Yili 8 - Iyul, norwégiye mexpi saqchi bashlighi jenni kiristiansén xanimning norwégiye bixeterlik dairiliri teripidin qolgha élinghan norwégiyilik uyghurlardin rashidin muhemmet qatarliq 3 kishilik elqaide guruhining tutulghanliqini élan qiliwatqan körünüsh.

Öz ismini mikail dawudqa özgertiwalghan rashidin muhemmet bashqa ikki shérikliri bilen bu yil 8 -Iyul küni norwégiye dölet bixeterlik idarisi teripidin térror gumandari dep qarilip qolgha élinghan idi.

Tashqi ishlar ministiri jonas gahr störening kündilik gézit muxbirlirigha bergen axbaratida ilgiri sürülüshiche :xitay hökümitining rashidin muhemmet mesilisige bolghan pozitsiyisi intayin qattiq bolghan. Buningdin bashqa, xitay hökümiti rashidin muhemmetning norwégiye puqraliqini étirap qilmighan we uni özlirige qayturup bérishni qattiq telep qilghan.

Jonas gahr störe bu mesile heqqide özining ochuq meydanini ashkarilap : elwette norwégiye hökümitining térrorluq qilmishlirigha intayin qattiq muamile qilidighanliqini, shu tüpeylidin bashqa döletler bilen yéqindin hemkarliship rashidin muhemmet qatarliqlarni qolgha chüshürgenlikini otturigha qoyghan. Shuning bilen birge, u, rashidin muhemmet gerche térror gumandari bolsimu, lékin norwégiye hökümitining uni öz puqrasi dep qarap xitaygha qayturup bermeydighanlighini, uning jinayi qilmishlirigha norwégiyidiki qanun we sot sistémisining qarar chiqiridighanliqini éytqan.

Rashidin muhemmetning adwokati arild humlen xitay hökümitining uni qayturup élish heqqidiki pozitsiyisige qarita öz qarashlirini intayin ixcham halda bildürüp mundaq dédi: "norwégiye puqrasi hergiz qayturulmaydu. Néme üchün xitay hökümiti rashidin muhemmetni qayturup élip kétish üchün alahide waqit serp qilidu? xitay hökümitining uyghurlargha nisbeten öz aldigha shekillendürgen kün tertipliri bar bolup, ular her daim uyghurlargha qarita adettin tashqiri rehimsizlerche muamilide bolidu."

Melum bolushiche, rashidin muhemmet 1999 ‏- Yili norwégiyige kélishtin ilgiri pakistanda quran mektipide oqughan bolup xitay hökümiti uni shu chaghdin bashlapla qayturup kélishni pilanlighan iken.

http://www.rfa.org/uyghur/xewerler/tepsili_xewer/norwigiyide-terror-gumandari-09022010210909.html/story_main?encoding=latin

Yuqiridiki awaz ulinishidin, bu heqtiki melumatimizning tepsilatini anglaysiler.