Norwégiyilik Uyghur Elqaidichi Mezkur Térrorluq Guruhigha Türkiyide Qatnashqan

Muxbirimiz Erkin
2010-08-31

Amérikining eng nopuzluq neshriyat epkarliridin "washington pochtisi géziti" yekshenbe küni maqale élan qilip, bu yil 7‏ - Ayda norwégiye bixeterlik dairiliri teripidin qolgha élinghan norwigiyilik uyghurlardin rashidin muhemmet qatarliq 3 kishilik elqaide guruhining herikitige dair bezi tepsilatlarni ashkarilidi.

Mezkur gézitning melumatigha qarighanda rashiddin muhemmetning elqaidige qatnishishi 2008‏ - Yili küzde türkiyidin bashlanghan. Gézittiki maqalide eskertilishiche, elqa‏idining küchi ajizlap, gherbtiki térrorluq heriketliride rashidin muhemmet qatarliq tejribisiz kishilerni ishqa sélishtek ehwalgha chüshüp qalghanliqi, uning süyiqest pilanlash küchining qanchilik ajizlashqanliqini ashkarilap qoyghan.

Maqalide rashidin muhemmetning bir neper kord we bir neper özbékni öz ichige alghan 3 kishilik elqaide guruhidiki achquchluq shexs ikenlikini, kord bilen özbékning uning teripidin bu guruppigha qobul qilinghanliqini ilgiri sürgen.

Maqalide rashidin muhemmetning elqaidining yolini tutup, heriketke ötüsh jeryani uning 2008‏ - Yili küzde ayalini élip türkiyini ziyaret qilishidin bashlanghanliqini, uning türkiyide bir elqaide alaqichisi bilen uchrashqanliqini ilgiri sürgen. Maqalide eskertishiche, rashidin muhemmet bilen alaqilashqan mezkur elqaide alaqichi xadimi hazirghiche qolgha chüshmigen bolsimu, lékin uning kimliki tekshürgüchi xadimlargha ayding iken.

Maqalide eskertishiche, rashidin muhemmet shu yili qishta türkiyidin pakistanning weziristan qebililer rayonidiki e -Qaide telim ‏ - Terbiye lagérigha barghan bolup, u weziristangha barghan oxshash mezgilde, nyuyork we manchistirdiki partlitishqa qatnishidighan kishiler weziristandiki elqaide lagérida telim - Terbiye alghan. Lékin dairiler ularning öz ‏ - Ara tonushmaydighanliqini we bir lagérda turmighanliqini ilgiri sürgen.

Maqalide yene, rashidin muhemmetning elqaide bilen bolghan munasiwiti uning elqaide mesullirigha yollighan élxet alaqisidin ashkarilanghanliqini, rashidin muhemmet 2009‏ - Yili 6‏ - Ayda norwégiyige qaytip kélishtin sel burun, pishawurdiki exmet isimlik ottura derijilik bir elqaide paaliyetchisi bilen uning G -mail Diki élxet adrésida alaqilashqanliqini bildürgen. Exmetning rashidin bilen xet alaqe qilipla qalmay, uning yene nyuyork we manchistirdiki partlitish guruppisi bilen Yahoo da alaqe qilidighanliqini, lékin exmetning élxet alaqisi alliburun amérika dairilirining teqipi astigha élinghanliqini tekitligen.

Amérika, rashidin muhemmetning exmetke yollighan élxet yollanmisidin norwégiye dairilirini derhal xewerdar qilghan bolup, norwégiye hökümiti rashidin 2009‏ - Yili 6‏ - Ayda türkiyidin norwégiyige qaytip kelgen zaman uni teqip qilishqa bashlighan. Bu weqe gherb elliride muhajirettiki uyghur jamaetchiliki we uyghur teshkilatlirini chöchütüpla qalmay, gherb metbuatlirini heyran qaldurghan idi.

Engliye hökümiti 2009‏ - Yili 4‏ - Ayda manchéstirdiki soda bazirini partlatmaqchi bolghan 12 kishini qolgha alghan idi. Amérika hökümiti kéyinrek nyuyork yer asti poyizini partlatmaqchi bolghan nejibulla zazi qatarliqlarni tutqun qilghan. Lékin norwégiye bixeterlik organlirining rashidinni teqip astigha alghanliqidin uning xewiri yoq idi. U norwégiyige qaytip bérip, pishawurdiki exmet isimlik elqaide paaliyetchisi bilen alaqilashqan.

"Washington pochtisi géziti" diki maqalide rashidinning exmetke élxet yollap, "qerzini" qayturushqa wede qilghanliqini yazidu. Lékin dairiler bu sözning ular otturisidiki isharet belgisi bolup, buning bomba yasashqa kéreklik qollanma dégen menini bildürüsh éhtimali barliqini ilgiri sürgen. Rashidin muhemmet norwégiyige qaytip kélip, özining kona hemrahliridin deywid yakupsén isimlik bir özbék we shawan seid bujak isimlik bir kurd bilen munasiwet qurudu. "Washington pochtisi géziti"diki maqalide rashidinning ularni bomba yasashqa kéreklik matériyallarni sétiwélishqa buyrughanliqini tekitligen.

Norwigiyilik saqchilar bu yil 7‏ - Ayda shawan seid bujakning oslo etrapidiki bina öyini axturup, qaznaqtiki lak yuyudighan ximiyilik buyum, hidrogén péroksid qatarliq bomba yasashqa kéreklik matériyallarni qolgha chüshürgen idi.

Maqalide ashkarilishiche, saqchilar aldinala orunlashturush élip bérip, shawan seid bujak hidrogén prokséd sétiwélishqa kelgende, uninggha saxta hinrogén prokséd sétip bérilgen. Rashidin qolgha élinghandin kéyin, bomba partlatmaqchi bolghanliqini ret qilip, ximiyilik buyumlarni qanunluq ishlargha ishlitishke sétiwalghanliqini bildürgen.

"Washington pochtisi géziti "diki maqalide gerche rashidin we uning hemrahliri ximiyilik buyumlarni sétiwélip saqlighan bolsimu, lékin ularning bomba yasash basquchigha ötmigenlikini hem partlatmaqchi bolghan nishanni tallap bolmighanliqini ilgiri sürgen.

http://www.rfa.org/uyghur/xewerler/tepsili_xewer/uyghur-elqayda-08312010203812.html/story_main?encoding=latin 

Yuqiridiki awaz ulinishidin, bu heqtiki melumatimizning tepsilatini anglaysiler.