Muxbirimiz Shohret Hoshur
2010-09-17
Béyjingdiki 60 yéqin xitay erzdar peyshenbe küni, 15 neper uyghur erzdar jüme küni xitay kompartiyisi merkizi komitéti siyasiy - Qanun komitétining aldida namayish ötküzgen. Bir qisim namayishchilar xitay namayishchilar neq meydanda tutqun qilinghan.
Uyghur namayishchilar tarqitiwétilgendin kéyin, Namayish yétekchisi dep qaralghan adil memet Yurtidin kelgen saqchilar teripidin tutup kétilgen.
Béyjingdiki xitay erzdarlar peyshenbe küni namayish qilip, xitayning qanun - Tüzümliridiki heqsizliqlargha naraziliq bildürgen. Ular bu qétim asasliqi uzungha sozulup ketken erzlerni tézdin bir terep qilishni telep qilghan.
Xitay saqchiliri neq meydangha tézdin yétip kélip, namayishchilarni tutqun qilghan we tarqitiwetken. Tarqitiwétilgen bir türküm namayishchilar béyjingdiki b d t ishxanisi we amérika elchixanisining aldida namayish ötküzüp, xitay hökümiti üstidin shikayet qilghan. Ular, amérika bilen b d t din özlirining qanuniy heqlirining qoghdilish üchün yardem telep qilghan yeni xitay hökümitige bésim ishlitishini telep qilghan.
Weqedin bir kéyin, yeni jüme küni etigende, 15 ke yéqin uyghur erzdar oxshash orunda namayish ötküzgen. Uyghur namayishchilar öz naraziliqlirini plakat échish, erz xétini namayan qilish sheklide ipadiligen. Uyghur erzdarlarning namayishi bir saettek dawam qilghan.
Uyghur erzdarlar namayishi dawamida, "bizge heqqaniyet kérek, bizge adilliq kérek!" dégendek pilakatlarni kötürgen. Bularmu asasliqi erzlirining 10 - 20 Yillap uzungha sozulup kétishige naraziliq bildürgen. Beziliri qanun sahesidiki milliy kemsitish üstidin shikayet qilghan.
Namayishqa qatnashmighan, emma weqening bash axiridin xewerdar bir erzdarning bildürüshiche, namayish jeryanida uyghurlar tutqun qilinmighan. Shundaqtimu, namayishtin kéyin, adil memet isimlik bir erzdar namayish yétekchisi dep qarilip, yurtidin kelgen saqchilar teripidin tutup kétilgen.
Adil memet eslide peyziwat nahiyilik hökümetning sabiq terjimani. U, béyjingda öz erzini dawamlashturush bilen birlikte, bashqa erzdarlarning til qiyinchiliqlirigha yardem bérip kéliwatqan iken. Adil memet bu yil 32 yash bolup, u birqanche künning aldida radiomiz ziyaritini qobul qilghan idi.
Nöwette béyjingdiki uyghur erzdarlar sepdishi adil memetning aqiwitidin jiddiy halette endishe qilmaqta.
http://www.rfa.org/uyghur/xewerler/tepsili_xewer/beyjingda-erzdarlar-namayish-09172010191744.html/story_main?encoding=latin
Yuqiridiki awaz ulinishidin, bu heqtiki melumatimizning tepsilatini anglaysiler.
