Yamanyar Weqesining Gumandarliri Xitaygha Axirqi Nepsigiche Qarshiliq Körsetken

Muxbirimiz Shöhret Hoshur Xewiri
2008-09-02

12 ‏ - Awghust yamanyar weqesining gumandarliri bilen xitay qoralliq qisimliri arisidiki axirqi toqunush 29 ‏ - Awghust küni kech saet 7 de yüz bergen. Toqunushqan orun yéngisheher nahiyisining yéngiériq yézisi, toqunushqan meydan qizilbuya weqesidikige oxshashla qonaqliq bolghan.

Uyghur elining herqaysi jaylirida qurulghan tekshurush ponkitlirining biride, qoralliq xitay saqchi bir uyghur ayalning salahiyitini tekshürüp soraq qilmaqta.

Qonaqliqni xitay terep alte saet qorshawda tutqan. Bu jeryanda xitay saqchiliri radio kaniyi arqiliq gumandarlarni teslim bolushqa chaqirghan. Gumandarlar teslim bolushni ret qilghan. Xitay eskerliri qonaqliqqa derhal basturup kirishke jüret qilalmighan. Axirida xitay terep qorshaw chembirikini kichiklitip, gumandarlarni oqqa tutqan. Gumandarlardin 6 nepiri öltürülgen, 3 nepiri yaridar halette esirge chüshken.

Gumandarlar ölüsh we esirge chüshüshning aldida xitay tereptin bir esker we bir amanliq xadimi bolup ikki kishini yarilandurghan.

Gumandarlar axirqi nepsigiche qarshiliq körsetken
Qarshiliqini hayatining axirqi nepeslirige qeder dawamlashturghan bu 6 neper uyghur musteqilliq jengchisining arisida 23 yashliq uyghur qizi anargül mutellipningmu barliqi texmin qilinmaqta. Qizilboyi saqchi ponkiti 9 gumandarning birining anargül mutellip isimlik ayal ikenlikini bildürgen idi. Saqchi terep tünügünki melumatida esir chüshken 3 neper yaridarning er ikenlikini bildürmekte.

Yene tünügünki igilishimizde , yamanyar weqesining kélip chiqish sewebi heqqidimu toluqsiz melumatqa ige bolduq. Ismini we awazini ashkarilimasliqni telep qilghan bir inkaschi, yamanyar weqesige ikki bak bénzinning seweb bolghanliqini bildürdi. Uning bildürüshiche, gumandarlardin 5 nepiri 12 ‏ - Awghust küni kechte, ikki bak bénzinni yéngisheher nahiyisining yamanyar yézisidin peyziwatning qizilboyi yézisigha yötkep mangghan. Ikki bak bénzin bésilghan aptomobil yamanyar yézisi bilen misha yézisi arisidiki yol tekshürüsh ponkitigha kelgende, ponkit xadimlirining gumanini qozghighan we ular bénzinni néme üchün yoshurup we kéchide élip méngiwatqanliqini sorighan.

Gumandarlar bénzinni ishlepchiqirishta qollinidighanliqini bildürgen؛ amanliq xadimlirining gumani yéshilmigen. Gumandarlar amanliq xadimlirigha , özlirining yaman adem emeslikini chüshendürgen we ulargha milliy we diniy qérindashliqini eslitip nesihet qilghan we awarichiliq tughdurmasliqini telep qilghan.

Yamanyar weqesi gumandarlarning pilani sirtida yüz bergen
Nesihetke perwa qilmighan amanliq xadimliri ehwalni bashliqigha doklat qilish üchün téléfon turupkisigha qol uzatqan chéghida gumandarlar pichaq bilen hujumgha ötken, 3 nepirini öltürüp, 1 nepirini yarilandurup, sepirini dawam qilghan. Yamanyar weqesining kélip chiqishigha ikki bak bénzinning seweb bolghanliqini qizilboyi saqchi ponkitidiki bir saqchi xadimining sözlirimu ispatlimaqta.

Bu xadimning bildürüshiche, qizilboyi weqesi yüz bergen qonaqliqqa yéqin jaydiki bir qorodin 2 bak bénzin tépilghan. Bu qoro yamanyar weqesining gumandarlirini yoshurghan dep qaralghan abdushükür qarimning qorasi bolup, abdushükür qari saqchilar teripidin nuqtiliq kishiler qatarida tizimgha élinghan diniy zatlardin biridur.

Nöwette abdushükür qari bilen birlikte uning ikki oghlimu soraqqa tutup turulmaqta. Yene tünügünki igilishimizde 23 yashliq uyghur qizi anargül mutellipning 7 yashliq oghli qizilboyi yézisida, 57 yashliq anisi amangül bolsa misha yézisida tutup turulmaqta.

Bu qétimqi weqede, hayatining eng axirqi nepisige qeder xitay qisimlirigha qarshiliq körsetken 9 neper uyghur musteqilliq jengchisidin 6 nepirining nam sheripi melum, ular abduréhim ehet, qéyum bawudun, imam hesen, hesen hoshur we abdusalam sultan we anargül mutelliplerdur.


From:http://www.rfa.org/uyghur/xewerler/tepsili_xewer/yamanyar-gumandarliri-olturulgen-09022008202510.html/story_main?encoding=latin