Uyghuristan Xelq Radio Istansisi' ning Xizmetchisi Mehbube Ablesh Qamaqta
Muxbirimiz Shöhret Hoshur xewiri
2008-09-05
Radiomizgha kelgen inkasta, shinjang xelq radio istansisidiki bir ayal xizmetchining xizmettin qoghlanghanliqi we qamaqta ikenliki bildürülgen idi. Igilishimizde mezkur shexisning mehbube ablesh ikenliki, shinjang xelq radio istansining élan bölümining xizmetchisi ikenliki melum boldi.
Photo: RFA
Mehbube ableshning waqti éniq bolmighan bir parche süriti. Bu süretni radio anglighuchilirimizdin biri radiomizgha ewetken.
Yene igilishimizche, mehbube ablesh bu yil 29 yash bolup, u jonggu axbarat uniwérsitétini püttürgen. U xizmet jeryanida ötküzgen xataliqi seweblik deslepte, radio istansisining qoghdash bölümige yötkiwétilgen. Uningdin kéyin eksilinqilabiy yéziqchiliq bilen shughullanghan dégen guman bilen qolgha élinghan. Emma uning nöwette qaysi türme yaki qaysi tutup turush ornida ikenliki melum emes. Alaqidar tarmaqlar uning qolgha élinish jeryani heqqide tepsiliy melumat bérishtin özini qachurmaqta.
Biz 'shinjang xelq radio istansisi' ning élan bölümige téléfon qilduq. Emma, radio istansisining kadirlar bölümi bu heqte melumat bérelmeydighanliqini bildürdi.
Mehbube ablesh xizmet ishligen élan bölümning mesuli bilen ötküzgen söhbitimizdin, mehbube ableshning aliy melumatliq we diniy étiqadliq bir uyghur ziyalisi ikenliki melum.
Biz mehbube ableshning nöwettiki ehwalini igilesh üchün, baxuliyang saqchixanisigha téléfon qilduq. Saqchilar melumat bérishni ret qildi.
Mehbube ableshning 'eksilinqilabiy' dep qaralghan yazmisi heqqide nöwette perqliq inkaslar mewjut. Bezilerning bildürüshiche, u béyjing olimpikigha qarshi, yene bezilerning bildürüshiche xitayning milliy we diniy siyasitige qarshi maqale yazghan. Biz bundin kéyinki programmilirimizda bu heqte dawamliq melumat bérishke tirishimiz.
