Qeshqerdiki hujumchilarning isimliki: Abduraxman Azat we Qurbanjan Hémit
Muxbirimiz Shöhret Hoshur xewiri
2008-08-05
Muxbirimiz Shöhret Hoshur xewiri
2008-08-05
Tünügün etigen qeshqer shehiride yüz bergen 4 - Awghust weqeside 16 xitay eskirining ölgenliki we 16 nepirining yaridar bolghanliqi melum bolghan idi. Bügünki igilishimizde yaridarlardin 4 nepirining jiddiy ehwalda ikenliki, xitay eskerlirige hujum qilghan ikki neper uyghur yashning isimlirining abduraxman azat we qurbanjan hémit ikenliki melum boldi.
RFA Photo
Radiomizgha iane qilinghan bu süret, xitay qoralliq saqchilirigha qilinghan hujum yüzbergen qeshqer shehirining ali méhmanxanisining partilitiwétilgen aldi ishikidin bir körünüsh.
Hujumgha uchrighan xitay eskerlirining sanining 70 ikenliki we we ikki neper uyghur yashning hujum mezgilide xitayning herbiyche kiyimi bilen niqaplanghanliqi bügünki yéngi uchurlardindur.
Shinxua agéntliqining xewiride ikki neper uyghur yashning aptomobilni xitay eskerliri yügürüsh meshiqi qiliwatqan yol yaqisidiki istolbigha urup partlatqanliqi, andin aptomobildin sekrep chüshüp eskerlerge qol bombisi atqanliqi, uning arqidin pichaq bilen hujum qilghanliqini bayan qilghan idi. Yerlik ahalilerdin ehwal igiliginimizde, ular hujum qilghuchilarning birining aptomobil bilen hujum qilghanliqi, yene birining bolsa yerdin maslashqanliqini bayan qildi.
Weqeni neq meydanda körgen bir polshaliq sayahetchi, fransiye axbarat agéntliqigha mundaq dégen: weqe bizning méhmanxanining aldida yüz berdi, weqe nahayiti qorqunchluq idi, xitay eskerlerge hujum qilghanlarmu herbiyche kiyingen idi. Wlodzislaw Duch Isimlik bu sayahetchi bir komputér bilimliri proféssori bolup, we weqeni yataq dérizisidin körgenlikini bayan qilghan. Weqeni körgen guangdungluq féng pemililik bir sayahetchimu, hujumchilarning herbiyche kiyingenlikini bildürgen.
Bu melumat, ikki neper uyghur yashning esli hujum pilanining eyni jaydiki herbiy gazarmigha hujum qilish bolushi mumkinlikini perez qildurmaqta. Shinxua agéntliqimu weqe heqqidiki tunji xewirini, ikki isyankar qoralliq qisim ponkitigha aptomobil bilen hujum qildi dep bergen idi.
Yerlik ahaliler, weqedin kéyin saqchilarning kontrolni yenimu ashurghanliqini melum qildi. Yene bir xanim saqchi tonushliridin anglighanlirigha asasen bizge melumatlar berdi.
Bügün qeshqerde bayanat bergen qeshqer wilayetlik partikom sékritari shi dagang, weqeni olimpikqa qarshi naraziliq we térrorluq herikiti dep eyibligen we "bular, 2008 - Yilini xitay üchün matem yiligha aylandurmaqchi" dep shikayet qilghan. Intérnétte élan qilinghan türkistan islam partiyisi namidiki bayanatta, ular uyghurlarning béyjing olimpikini qarshi almaydighanliqini bayan qilghan idi.
Xitay bu weqede cheteldiki sherqi türkistanchilarning küshkürtishi bar dep körsetken. Emma, xelqara metbuat, abduraxman azat bilen qurban hémitning hujumi, chetel bilen alaqisi yoq, peqet yerlik xelqining xitay hökümitige qarshi naraziliqi bilen alaqidar dep körsetmekte.
Bügün yene, xitay döletlik sayahet idarisi béyjingda bayanat élan qilip, xitayning térrorluqqa qarshi puxta mudapie körgenlikini, chetellik sayahetchilerni xitaygha kélishte endishe qilmasliqqa chaqirghan. U yene qeshqerdiki 4 - Awghust weqesining sayahetchilerde endishe peyda qilish éhtimalliqini eskertken.
Nöwette xitaydiki méhmanxanilar aldin perez qilghandikidek xéridargha érishelmigen. Melumatlargha qarighanda nöwette xitaydiki 4 yultuzluq méhmanxanilarning yérimi, 3 yultuzluq méhmanxanilarning bolsa %90 i bosh halette. Xitay bu qétimqi 4 - Awghust weqesining bu weziyetni téximu yamanlashturidighanliqi perez qilmaqta.
Bügün yene radiomizning xitayche bölümi, qeshqer jamaet xewpsizlik idarisigha téléfon qilip, bundin kéyin yüz bergüsi hujumlardin qoghdinish üchün yene qandaq tedbirlerni oylushiwatqanliqini sorighan, saqchi terep bolsa, bu jehettiki charisizlikini étirap qilip, mumkinchiliki bolghan barliq tedbirlerni qollinip bolduq dep jawab bergen.
