Amérikining Uyghurlar Heqqidiki Qararigha Qarita Inkas We Mulahiziler
Muxbirimiz Shöhret Hoshur xewiri
2008-07-31

Amérika prézidénti jorj bush aldinqi küni uyghur milliy herikitining rehbiri rabiye qadir xanimni qobul qildi, tünügün amérika dölet mejlisining awam palatasi xitayning tibet we uyghurlargha qaratqan bésimni toxtitishi heqqide qarar maqullidi. Bu munasiwet bilen mesilige chétishliq terepler inkas qayturdi.

AFP Photo

Uyghur elining herqaysi jaylirida qurulghan tekshurush ponkitlirining biride, qoralliq xitay saqchi bir uyghurning salahiyitini tekshürüp soraq qilmaqta.


Xitay tashqi ishlar bayanatchisi lyu jyenchaw bügün muxbirlargha qilghan sözide amérika dölet mejlisining qararini, amérika dölet mejlisidiki bir ochum xitaygha qarshi küchlerning " rezil qilmishi" dep eyiblidi. Lyu jyenchaw yene, amérika prézidénti jorj bushning rabiye qadir xanim qatarliq öktichi rehberlerni qobul qilishini bölgünchilerge xata signal berdi dep eyiblidi.

Dunya uyghur qurultiyining muawin reisi muhemmed toxti ependi, amérika dölet mejlisining tünügünki qararini tebriklidi we dunya uyghur qurultiyi namidin minnetdarliqini bildürdi we u amérika dölet mejliside téximu konkrét we rial mesililer üstide qarar élinishini ümid qilidighanliqini bildürdi.

Muhemmet toxti ependi xitayning, jorj bush bilen rabiye qadir xanimning uchrishishi heqqidiki tenqidi heqqide toxtaldi. Amérika uyghur birleshmisining sabiq reisi, nöwette washingtondiki bir qanun shirkitining adwokati nuri türkelmu bu témida pikir bayan qildi.

Nuri türkel sözide, tünügünki qararning ehmiyiti asasliqi, mutleq köp sandiki palata ezalirining qararni testiqlishi dep körsetti. U mulahiziside mezkur qarar, uyghur mesilisining amérika jemiyitide heqliq bir dawa süpitide étirap qilinghanliqining inkasi dep körsetti we xitayning yillardin béri térrorluqqa qarshi heriket nami astida milyonlarche dollar serp qilip élip barghan diplomatik herikitining meghlubiyiti dep körsetti.

Nuri türkel sözide, xitayning jorj bush bölgünchilerge xata signal berdi dégen sözi üstide alahide toxtaldi. Nuri türkel sözining xulasisida, xitayning nöwette uyghurlarni dunyadin ümidsizlendürüsh we jasaretsizlendürüsh yoli bilen boysundurmaqchi boluwatqanliqini, amérikining qararining mana bu tirishchanliqqa bir zerbe ikenlikini bildürdi.

Menbe:http://www.rfa.org/uyghur/xewerler/tepsili_xewer/amerika-qarar-inkas-mulahize-08012008051505.html/story_main?encoding=latin