Xitay Qurghan Shinjang Téléwiziye Istansisi 40 Yildin Buyan Néme Qildi?

Muxbirimiz Gülchéhre
2010-11-18

Qurban héytning harpa küni, uyghur aptonom rayoni we bingtuen dairiliri uyghur élide shinjang téléwiziye istansisi qurghanliqining 40 yilliqini tebriklidi. Xitay rehberliri shinjang téléwiziye istansisi 40 yil mabeynide shinjangning obraz teshwiqat közniki ,xelqning idiye yétekchisi, partiye, hökümetning layaqetlik teshwiqatchisi boldi dep baha berdi.

Shundaqla, bu teshwiqat orginining buningdin kéyinmu her millet xelqini partiyining fangjén, siyasetliri boyiche yéteklep jemiyette wetenni qizghin söyüp, partiye, hökümetke minnetdarliq bildürüp, güzel makan qurush keypiyatini yaritishqa yenimu zor töhpe qoshushini wezipe qildi.

Chetellerdiki uyghur ziyaliylar we ilgiri bu istansisida xizmet qilish tejribisige ige bezi uyghurlar, shinjang téliwiziyisige pütünley bashqiche bahalar béridu.

Xitay kommunistik partiyisining uyghur aptonom rayonida qurghan eng chong teshwiqat orgini, bolghan shinjang téléwiziye istansisi bu yil 40 yashqa toshti. Uyghur aptonom rayonidiki xitay partiye, hökümet kadirliri shundaqla bingtuen emeldarliri birlikte shinjang téliwiziyisining 40 yilliq toyini alahide katta ötküzgen bolup , téliwiziyide tarqitilghan mexsus tebriklesh senet kéchiliki we bashqa paaliyetlerge alahide zor meblegh ajratqan.

Shinjang téliwiziyisining 40 yilliq alahide zor kölemlik senet kéchilikige "shinjang yaxshi jay" dégen teshwiqat namini qoyghan bolup , 14 - Noyabir ürümchi waqti 21 de xitayning 19 ölkilik téliwiz-Ye qanallirida birla waqitta teng tarqitilghan. Yeni, shinjang téliwiziye istansisi 1970 ‏- Yili 1 - Öktebirde , xitay kommunist döliti qurulghanliqining 21 yilliqini tebriklep tarqitishini bashlighan . U uyghur we xitay tilini öz ichige alghan besh xil tilda, 15 simsiz téliwiziye qanili, yene 3 simliq qanili we yene 9 kespi qanalliri arqiliq künige 260 saetlik programma tarqitidu.

Uyghur élidiki teshwiqat wasitilirining bu heqte tarqatqan xewerliridin melum bolushiche,xitayning uyghur élige qoyghan partkom sékrétari shinjang téléwiziye istansigha, "40 yil jeryanida kompartiye we hökümetning ümidini yerde qoymay, tereqqiyat we muqimliq ishlirida xelqqe aktip idiye yétekchilik rolini oynap , fangjén, siyasetlirining yaxshi teshwiqatchisi, shinjangning obraz közniki boldi" dep baha bergen.

Xitay hökümitining uyghur aptonom rayonigha qoyghan reisi nur bekri bolsa shinjang téliwiziyisining 5 - Iyul weqeside xelqni idiye jehettin yéteklesh, turaqlashturushta waqtida intayin halqiliq teshwiqat rolini oynighanliqini mueyyenleshtürgen we buningdin kéyinmu partiye, hökümetning teshwiqat telipige izchil masliship , kommunistik axbaratchiliqni yüksek burch dep bilishni telep qilghan.

Xitay dairiliri shinjang téliwiziyisining 40 yilliqini bayram süpitide tebriklewatqan bir peytte, chetellerdiki uyghurlar bolsa shinjang téliwiziye istansisining héchqachan uyghurlargha heqiqiy mensup bolup baqmighanliqini éytidu we oxshimighan bahalarni béridu .

Ilgiri shinjang téléwiziyide uyushturulghan senet kéchilikliride köp qétim étot nomurlirini orundap uyghurlar arisida tonulghan xelq küldürge artisi , nöwette gérmaniyide yashawatqan ablimit tursun ependi shinjang téliwiziyisining xaraktérini échip mundaq deydu.

Gérmaniyide yashap turghuchi yazghuchi Küresh Atahan ependi shinjang téliwiziyisining 40 yilliq musapiside uyghurlargha yetküzgen menpeetidin ziyanliri köp dep baha berdi.

Xelqara qelemkeshler teshkilati uyghur merkizining mesulliridin qeyser ependi , chetelge chiqip kétishtin ilgiri shinjang simliq téliwiziyisining asasliq réjisorlirining biri bolghan bolup , u, "shinjang téliwiziyisi xelqqe axbarat erkinlikini, qelemkeshlerning erkinlikini bermey turup, héchqachan heqiqiy axbarat orginigha yaki xelqning awazigha aylinalmaydu" dep körsetti.


http://www.rfa.org/uyghur/xewerler/tepsili_xewer/shinjiang-radio-istansisi-11182010223937.html/story_main?encoding=latin

Yuqiridiki awaz ulinishidin, bu heqtiki melumatimizning tepsilatini anglaysiler.