Dunya jamaiti Arzugülning Hamilisining Teqdirige Dawamliq Köngül Bölmekte
Muxbirimiz Jüme
2008-11-18
Muxbirimiz Jüme
2008-11-18
Arzugül tursun ili oblastliq doxturxanigha yötkilishining aldi - Keynide xelqara axbaratlar jümlidin amérika dölet mejlisi ezaliri arzugül we uning 6 ayliq hamilisining hayatigha yéqindin köngül bölüshke bashlighan idi.
AFP Photo
2008 - Yili 31 - Iyulda tartilghan bu sürette, aqsudiki namelum bir guruppa uyghur ayalliri we bir bowaq.
Bügünki xewerlerge qarighanda, arzugül axiri hamilisining hayatini saqlap qélishqa muweppeq bolalighan bolup, u hazir doxturxanidin chiqip öyige qaytqan.
Uyghur milliy herikitining rehbiri rabiye qadir xanimning bildürüshiche, xitay hökümiti pilanliq tughut tarmaqlirining arzugül tursunni doxturxanidin balisini éliwetmigen sharaitta salamet chiqiriwétishi, qandaqtur bir insanperwerlik herikiti bolmastin, belki xelqara jemiyetning bésimini sewebidin bolghan.
Aldinqi küni radiomizning ziyaritini qobul qilghan amérika dölet mejlisi ezasi we amérika - Xitay ishliri komitétining yuqiri derijilik ezasi kiristofér simit özining bu ishni bir yaqiliq qilish üchün heriket qiliwatqanliqini bildürgen we yene bu ish toghriliq xitayning washingtonda turushluq bash elchisi bilenmu sözleshkenlikini éytqan idi.
Kiristofér simit ependi, xitay elchisi ju wénjung bilen körüshüp uninggha 27 heptilik bir bowaqning öltürülüsh aldida turghanliqini, eger xitay merkizi hökümiti mudaxile qilsa bu tughulmighan bowaq hayatining qutuldurup qélinidighanliqini éytqan.
U xitay elchisi ju wénjunggha éytqan sözliri heqqide toxtilip mundaq dédi: "men uninggha xitayda élip bériliwatqan nopus kontrol qilishi we mejburiy bala chüshürüsh qilmishliri üstide qisqighina toxtaldim. Emma sözlirimning bash témisi asasen bu balining hayatini qutuldurush üstide boldi."
Melum bolushiche, xitay elchisi ju wénjung kiristofér simit ependim téléfon qilghanda, arzugül tursunning teqdirige emes, uning heqqidiki xewerni qeyerdin uqqanliqigha bekrek qiziqqan.
Xitay elchisi jün wénjungning kiristofér simit ependining téléfonini alghandin kéyinki inkasi heqqide toxtalghan kiristofér simit ependi mundaq dédi: "u arzugül tursun heqqide köp nerse bilmeydighanliqini éytqan bolsimu, emma méning bu xewerni qeyerdin bilgenlikimge bekmu qiziqti. Elwette bu xewerni men uyghur kishilik hoquq qurulushi programmisidin uqqan idim."
Uyghur milliy herikitining rehbiri rabiye qadir xanimning bildürüshiche, amérika uyghur birleshmisi we uyghur kishilik hoquq programmisi erkin asiya radiosi arqiliq arzugül tursunning ehwalidin xewer tapqandin kéyin, derhal amérikining munasiwetlik organliri we bashqa teshkilatlargha alaqe yollashni bashliwetken.
Arzugül tursunning qorsiqidiki hamilini éliwétish opératsiyisi ürümchi waqti seyshenbe küni etigen saet 8 de élip bérilidighanliqi orunlashturulghan idi. Bu ishtin xewer tapqan amérika dölet mejlisi ezasi kiristofér simit yene derhal amérikining béyjingda turushluq elchisi klark rendit ependige téléfon qilip uning xitay tashqi ishlar ministirliqi bilen alaqe qilip bu balining hayatini qutquzup qélishqa tirishchanliq körsitishi kéreklikini telep qilghan.
Kiristofér simit ependi xitay yerlik dairilirining nöwette arzugül tursungha qaratqan bala chüshürüsh herikitini bir xil wehshiylik dep süpetlidi hemde buning milyonlighan bowaqlarning jénigha zamin bolghan heriketning bir kichik kartinisi ikenlikini körsetti.
U bu heqte toxtilip: " bu pütünley tragédiyilik, qayghuluq we yürekni lexte qilidighan bir tipik misal bolup, dunyaning yene bir burjikide turup buni bizmu hés qiliwatimiz " dédi.
Kiristofér simit ependining ishxana xadimlirining bildürüshiche, amérika elchisi klark radit ependi xitay muawin tashqi ishlar ministiri wang guangya bilen körüshken hemde arzugül heqqide sözleshken.
Netijide arzugül tursun 6 ayliq hamilisini opératsiyidin qutuldurup, wehime qaplighan doxturxana we qorsaqtiki balisining hayatigha sunulghan qara qollar arisidin aman - Isen ötüp, öz ailisige qaytishqa muweppeq bolalidi.
