Gérmaniyede „Rabiye Ana Mektiwi“ Quruldi

2008-yili 6-Ayning 21-küni Gérmaniyening Frankfurt Sheheride, „Sherqiytürkistan Birliki Teshkilati“gha qarashliq „Rabiye Ana Mektiwi“ qurulup, weten siritidiki maarip ishlirimizda saqliniwatqan bir boshluq tolduruldi. Sherqiytürkistan Birliki Teshkilatining reyisi Korash Atahan ependi mektepning qurulghanliqini élan qildi.

Sherqiytürkistan xelqining béshigha kéliwatqan milliy zulumning éghirliship bérishigha egiship, weten ichi we siritida tehdit astida turiwatqan milliy kimlikimizni qoghdap qélish, Panxitayizimgha qarshi turup, Xitayning millitimizni assimilatsiye qiliwitishige yol qoymasliq we ewlatlirimizni milliy musteqilliq herkitimizning yaramliq iz-basarliridin qilip terbiyelep chiqish hemmimizning bash tartip bolmaydighan wezipisidur.

Nöwette eziz wetinimiz Sherqiytürkistanda Xitayning Millitimizni assimilatsiye qilish programmisigha parallil shekilde Til-yéziqimiz, Milliy Maaripimiz, Diniy étiqadimiz, Örpi-adetlirimiz, Kultural alahidiliklirimiz we her türlük insaniy heq hoquqlirimiz chekliniwatidu.

Maarip ishlirimizda böhran körülüshke bashlidi, zulumgha chidimighan qérindashlirimiz purset tapsila chet-ellerge hijret qiliwatidu, weten ichi we siritida tughuliwatqanlarning kélichiki qarangghulishiwatidu.Kélgüsimizning iz basarliri bolghan balilar weten ichi we siritida „Bizni qutulduriwélinglar!“ dep nida qiliwatidu.

„Sherqiytürkistan Birliki Teshkilati“ nöwettiki weten ichi we siritidiki milliy teqdirimizni nezerde tutup, uzaq muzakire qilish weten ichi we siritidiki mutexesisler bilen pikir almashturush, Siyasiy küresh sépimizdiki bezi gholluq shexisler bilen meslihetlishish we Milliy rehbirimiz Rabiye Qader xanimning raziliqini élish arqiliq, Gérmaniyede „Rabie Ana Mektiwi“ni qurup chiqishni pilanlighan idi.

„Rabiye Ana Mektiwi“ning qurulush murasimigha Milliy rehbirimiz, Dunya Uyghur Qurultiyining reyisi Rabiye Qadér xanim, Dunya Uyghur Qurultiyining muawén reyisi Esqerjan ependi, Dunya Uyghur Qurultiyining bash katiwi, Yawropa Sherqiytürkistan Birliki Teshkilatining reyisi Dolqun Isa ependi, Dunya Uyghur qurultiyining Fondi reyisi Ablimit Tursun ependi, Diniy zat, teshkilatimizning maaliye ishliri mesullirining biri Hebibulla Qarim we Sherqiytürkistan Birliki Teshkilatining ezaliri bolup 100 ge yéqin kishi qatnashti.

Yighindikiler „Rabiye Ana Mektipi“ning qurulghanliqi élan qilinghandin kéyin, öz-ara bir-birini mektepning qurulghanliqi munasiwéti bilen tebrikleshti.Yighinda saylam élip bérish arqiliq Dunya Uyghur Qurultiyi Ijrahiyye kommétitining ezasi, Sherqiytürkistan Birliki Teshkilatining reyisi, Uyghur yazghuchisi Korash Atahan ependi „Rabie Ana mektiwi“ning Rektorluqigha, Aliye Zeper xanim Rektor yardemchilikige teyinlendi.

Chet-elde shundaqla bügünki künde „Rabiye Ana Mektiwi“ning qurulghanliqi Sherqiytürkistan millitining maarip tarixidiki alahide bir yéngiliq bolup, bu mektep millitimizning kelgüsi izbasarlirini weten-milletni söyidighan, weten-millet üchün jéninmu ayimaydighan ewlatlarni yétishtürüp chiqip ejdatlirimiz we xelqimizning ümüdini aqliyalisa ejebemes.

Dunya Uyghur Qurultiyi Teshwiqat Merkizi


21/06/08 Gérmaniye/Frankfurt