Shohret Hoshur
2012-02-10
Toqsun nahiyisining gholbuyi yézisidiki uyghur charwichilar, tünügün aptonom rayonluq partkom binasi aldida topliship, 410 ming mo yayliqining xitay köchmenliri teripidin igiliwélinghanliqigha naraziliq bildürgen idi. Tünügün rayonluq erziyet idarisining xadimliri ularni ishxanisigha söhbetke teklip qilghan. Emma söhbet muweppeqiyetlik bolmighan.
RFA/Shohret Hoshur
Toqsunning gholbuyi yézisidiki 410 ming mo yayliqi tartiwélinghan charwichilar. 2012-Yili yanwar.
Bügün uyghur charwichilar partkom aldigha qaytidin toplinip yene naraziliq bildürdi. Bügün xitay saqchiliri ularning naraziliq herikitige arilishp, ularning partkom aldida turushigha yol qoymighan؛ netijide ular erziyet idarsida dairiler bilen qaytidin söhbetlishishke mejburlanghan. Emmu bu qétim söhbetmu netijisiz axirlashqan.
Uyghur aptonom rayonluq partkom aldigha toplanghan toqsunluq charwichilarning sani bügün yene köpiyip 60 qa yéqinlashqan. Lékin xitay saqchiliri ularning partkom binasi aldida topliship turushigha uzun yol qoymighan. Saqchilar bilen naraziliq bildürgüchiler arisida talash - Tartish we ittirish - Türtüshüsh yüz bergen. Charwichilar erziyet idarisida sözlishishke yene maqul bolghan. Ikki terep söhbitide, dairiler 88 - Nomurluq höjjetning tepsiliy mezmuni heqqide yene melumat bermigen. Ular charwichilarni yéza we nahiyidin ispat xéti ekilishni telep qilghan. Charwichilar hökümetning burun bergen wedilirini dairilerge eslitip ötken. Melum bolushiche, 88 - Nomurluq höjjet chüshürülüshning aldida, yeni dairiler bir qisim yaylaqni xitay shirketlirige ötküzüshning aldida, uyghur charwichilargha yaylaqliri üchün tégishlik tölem bérishtin bashqa, ularni ürümchi sheher nopusigha aldighanliqi, qoro jayliq yer béridighanliqi, ishqa orunlashturidighanliqi, towen kapalet puli béridighanliqi qatarliq wedilerni bergen. Lékin yaylaqni éliwélip bu dégenlirining héchbirini qilip bermigen. Ariliqta, nahiyilik hökümet gholbuyi yézisidiki charwichilargha 182kwadirat métirdin öy orni bergen؛ buni 15 ming yüendin sétip bergen. Emdilikte bu jayliq yerni shu tartiwélinghan 410 ming yaylaq üchün bérilgen tölem dep chüshendürgen. Charwichilar bolsa, bu jayliq yerning eyni chaghda tölem dep bérilmigenlikini, tölem déyilgen teqdirdimu, 1000mo yer bedilige bir pung yer bérishning heqsizliq bolidighanliqini bayan qilghan.
Charwichilar wekili muxbirimizgha mundaq dédi: «410 ming yérimizni shirketler we karxanilar, köchmenler igilep ketti, bularning hemmisi xenzular. 100Moluq, ming moluq yaylaqilirimizgha xenzular bir qanche yüz tüp küchet tikip qoyup etrapini qorshap özining qiliwaldi؛ hazir uning mosini 700ming, 800 ming yüenge satmaywatidu.»
Hörmetlik radio anglighuchilar, yuqiriqi bayanlardin qarighanda, toqsun charwichilirining heqqaniy sadalirigha dairiler semimilik bilen qulaq salmighan. Charwichilarning telep - Pikirlirini bayan qilish jeryanidiki yumshaq teleppuzi, tertip intizamliq yürüsh - Turushi, dairiler teripidin qedirlenmigen, belkim bu ajizliq dep qaralghandek. Dairilerning bu xil pozitiyisi ularni ümidsizlendürgen. Lékin otturidiki mesile zémin mesilisi, yeni bu charwichilarning öziningla emes, kelgüsi nechche ewlad perzentliriningmu risqi mesilisi bolghachqa, ular dawasini yenila qetiy tewrenmey dawamlashturmaqchi.
Copyright © 1998-2011 Radio Free Asia. All rights reserved.
http://www.rfa.org/uyghur/xewerler/tepsili_xewer/toqsun-charwichiliri-02102012213823.html/story_main?encoding=latin
