Frankfurtta Sherqiytürkistanning Jumhuriyet
Künliri Xatirlendi

Eziz wetinimiz Sherqiytürkistanda tajawuzchilarning esirlep boyunturuqi astida yashap kelgen Uyghurlar özi bilen teqdirdash we qan-qérindash bolghan xelqler bilen uyultashtek itipaqliship, xorluq we numus astida qalghan wetenning azatliqi, xelqning hörlüki üchün hayat-mamatliq küresh qilip, 1933-yili 12- Noyabérda „Sherqiytürkistan Islam Jumhuriyiti“ we 1944-yili 12-Noyabérda „Sherqiytürkistan Jumhuriyiti“ qatarliq ikki jumhuriyetni qurup, dunyagha jakarlighanidi.Gerche bu ikki Jumhuriyet hazirghiche mewjut bolalmay qalghan bolsimu, Uyghur xelqining menggü zulumgha bash egmeydighan jenggiwar xelq ikenlikini bügünki kündimu dunyagha namayish qilip, tarix betliride julalap turmaqta.

Shunga xelqimiz ikki qétimliq jumhuriyitimiz dunyagha kelgen bu künni, kelgüsige bolghan cheksiz ümüt we ich-ichige patamaydighan shirin hés-tuyghular bilen xatérlep kelmekte.Shu seweptin mushu ayning 12-küni yeni Düshenbe küni, „Sherqiytürkistan birligi“ teshkilatining bir qisim ezaliri birlikte Gérmaniyening Frankfurt Sheheride, Jumhuriyet bayram künimizni xatérlep bir qatar paaliyetlerni élip bardi.

„Sherqiytürkistan Birliki teshkilati“ ning bu paaliyetke qatnashqan ezaliri deslepte Frankfurtiki xitay konsulxanisining aldigha bérip, Dunya Uyghur qurultiyi yollighan Sherqiytürkistanda xitaylar keltürüp chiqiriwatqan kishlik hoquq we insan heqliri, démokiratiye we milliy mewjutluqimiz meseliliri heqqide hazirlanghan birqanche türlük teshwiqat matériyallirini, konsulxanagha kiriwatqan we chiqiwatqan yawropaliqlargha tarqitip, we ular sorighan türlük suallargha jawap bérip, Xitay konsulxanisidikilerge , xitay tajawuzchilirigha bolghan ghezep-nepritini, yawropaliqlargha özlirining kélichekke bolghan cheksiz ishenchisini, ipadilidi.

Teshkilat ezaliri uningdin kéyin bu sheherdiki Giyotiy Univérsitéti qorasigha bérip, Oqutquchi-oqughuchilargha Sherqiytürkistanda Xitaylar teripidin diniy étiqat, maarip, ishqa orunlushush, pilanliq tughut, köchmen yötkesh, bazar we iqtisad tereplerde yürgüziliwatqan, yerlik milletlerni érqiy yoqulushqa mejburlaydighan, rayon we dunya bixeterlikige bérip chétilidighan, xelqara qanunlargha asaslanghanda dölet térori we kéngeymichilik hésaplinidighan siyasetler keltürüp chiqiriwatqan bir qatar tiragédiyiler ekis ettürülgen teshwiqat matériyallirini tarqatti we bir qisim Oqutquchi-oqughuchilargha ishning tepsilatini anglatti. Bu matériyallarda yene Xitay hökümitining wetinimiz Sherqiytürkistanda we xoshna döletlerde yürgüziwatqan, Uyghur xelqini qul qilidighan we érqiy yoqulushqa mejburlaydighan we merkizi asiya boz qirlirigha köz tikip, kingeymichilik qilishqa hazirliniwatqan bir qatar jinayi siyasetlirining sirliri dadil otturgha qoyulghan.

Bu qétimqi paaliyet etigen saet 11:00 de bashlinip, kech saet 16.00giche dawamlashti we bu yerde yashawatqan xitay we xitay ghalchillirining ünümlük dekkisini berdi.

Sherqiytürkistan Birliki Teshkilati Teshwiqat Merkizi