Sherqitürkistan Jumhuriyiti Sürgündiki Hökümitining 2012. Yilliq Axbarati -1.Nr
Hörmetlik eziz wetendashlar, Qérindashlar, silerning 2012- yilinglarni tebrikleymiz, ailenglargha bexit-saadet tileymiz. Awal allahtin wetenimiz Sherqitürkistanning baldurraq özige-özi xuja, erkin, hür we démukirattik bir jumhuriyet bolup qaytidin qurulishini tileymiz.
Hökümitimiz Sherqitürkistan xelqining hür dunyada qurghan milliy dawayimizgha meydani éniq we bayriqi rushen halda wekillik qilidighan simwolluq bir qurulushi bolup, uning qurulup dunyagha jakarlanghanliqi we bügüngiche mewjut bolup turghanliqining özi, dunya xelqige Sherqitürkistan milliy dawasining ghayisi, siyasi meqsidi we tüp nishanini intayin qulay bir shekilde namayan qilip turmaqta.
Sherqitürkistan Jumhuriyiti Sürgündiki Hökümiti élan qilghan asasiy qanun, milliy dawayimiz tarixida weten siritida élan qilinghan tarixiy ehmiyetke ige bir hadisedur! Bu asasiy qanun sewebidin pütün dunya xelqi, Sherqitürkistanning eslidin öz aldigha musteqqil bir dölet ikenlikini, 63 yil awal Xitay tajawuzchilliri teripidin ishghaliyetke uchrap, xelqining we medeniyitining sistémiliq érqiy qirghingha uchrap, bir millet we bir medeniyetning yoqulush girdawigha kélip qalghanliqini, Sherqitürkistan xelqining heqqaniy bir dawa üstide izdiniwatqanliqini biliwalalaydu. Bu asasiy qanun sewebidin pütün dunya xelqi yene bu yerde bir dölet qurushning Idiyali qandaqtur Xitaylar terghip qiliwatqandek bir islam xelipiliki, yaki Türk Impériyesi qurush emes belki yer meydani 1,828, 418 kuwadirat Kilométir bolghan tupraqta milletler barawer, démokrattik, insan heqiliri we kishlik hoquq hörmet qilinghan, Gherip dunyasi we Asiyadiki döletler bilen jümlidin xoshna döletler bilen tinchliq we ittipaqliqta özini teqdirdash dep qaraydighan musteqqil we démokrattik bir dölet ikenlikini asanla körüwalalaydu.
Uningdin bashqa hökümitimiz terkiwide pütün hayatini milliy dawayimizgha béghishlighan pishqedem ustazlar we meshhur inqilapchilar, talantliq ziyalilar yer alghan bolup, ular milliy dawayimizda kam bolsa bolmaydighan wezipilerni üstige élip, milly musteqilliqimiz üstide kiche-kündüz izdenmekte.Ular hökümet we milliy dawani qoghdap qélishta her türlük haqaret we kamsitishlerge bash egmey we shuning bilen birge qérindash teshkilat we dawa qoshunimizdiki aktip insanlargha her dayim yantayaq bolup keiliwatidu.Dawaning hazirche asasiy yükini üstige alghan Dunya Uyghur Qurultiyining bir qatar muhim xizmetlirige yaxshi tilekler bilen utuq tilidi we hichqandaq ishigha tosqunluq qilmidi.
Shundaq turuqluq 2004-yilida Amérika Aqsaray binasida qurulghan Sherqitürkistan Jumhuiyiti Sürgündiki hökümiti 8 yildin béri ichkiy we tashqi düshmenlerning we kallisi qaymuqtiriwitilgen bir uchum kishilerning toxtimay zerbe béridighan hujum nishani bolup kelmekte!Hökümetni qurghanda hökümetke soqunip kiriwalghan we etrapigha uyushqan bir uchum iradisi ajiz, weten-millet étiqadi zeyip, milliy inqilapta tejirbisiz kishilerning we Xitay ghalchillirining ziyankeshliki sewebidin, hökümitimizning inawitini qoghdap qélish qiyingha toxtidi we xelqimiz arzu qilghan derijide küchiyelmigen bolsimu, özining tarixiy we siyasiy rolini jariy qilip kelmekte.
Téximu éniq éyitqanda hökümitimizge qarshi bolghan perde arqisidiki namelum küchler teripidin bügünge qeder asassiz, sewiyesiz, delil-ispatsiz iftira we haqaretler, herxil tenqidiy pikirler üzlüksiz ortigha chiqmaqta. Élip bérilghan munazire we tenqidiy pikirlerdin hich bir zaman binormal shekilde rahetsizlik hés qilmiduq!
Lékin özini “Lédir” dep atiwalghan bezi shexsiyetchi, aq-qarini periq ételmeydighan bezi namert shexislerning hökümitimiz we hökümet xadimlirigha qilghan haqaretliri, töhmetliri we yaman niyetlik siyasiy süyqest tüsini alghan qilmishliridin, bu xil ziyankeshlik ubyékti bolghan shexisler bilen birge könglümizning qattiq azar yigenlikini hés qilmaqtimiz….
Milliy exlaq we jawapkarliq tuyghusi sewebidin “Qol sunsa yeng ichide” dégen atillirimizning hikmitige asasen özini özi “Milliy rehber” dep atiwalghanlarning iftira we haqaretlerige we yalghan-yawidaq töhmetlirige, ottuz kishi imzalighan eqelliy bir jawapnimu bermiduq… Sherqitürkistan Jumhuriyiti Sürgündiki Hökümet bolushtek simwolluq bir qurulush bolush salayitimiz bilen qérindashlar ara her bir qedimimizni xuddi yoqurida éyitqandek éhtiyat bilen bésishqa alahiyde itibar berduq!
Birlik we barawerlikimizge tesir körsetmisun, dep ichkiy we tashqi düshmen küchler qilghan haqaret we söz-chöcheklerge anche nezer-güzirimizni salmay kelduq, dert we achchiqni ichimizge yuttuq! Shunisi ayanki sebriningmu chéki bolidu. Biz eshu namert insanlargha shundaq xitap qilghumiz kélidu. Sen arqimizdin söz-chöchek tarqitisen, zeheringni chachisen, haqaretleysen…heq-naheqni tonumaysen….yene kélip yolsizliqing üchün özrixaliq tilimeysen….ish tes kelgende, heqiqet ortigha chiqqanda, xuddi sheytandek aldimizgha kélip, “Bir-birimizning inawitini töküp, shiddetlik tenqit astida qoysaq, bu qandaq qérindashliq bolidu” deysen, yalghan sözleysen….” Bu meydan metularning yip baziri emes… eksinche muqeddes milliy dawa meydani…Buni bilip qoyushung kérek!
Toghra, hemmimizning tomurida oxshashla bir qan éqiwatidu…”U qurulushni düshmen dep qarisaq bolmaydu”, bu sözlerni qilidighan adaletperwer insanlar yoq déyerlik… eger éghizda eshundaq dep qoyulup, emeliyette bashqiche yol tutulsa, éytilghanliri quruq bir lap bolup qalidu…Bizge semimiyet kérek…bizge xalis héssiyat kérek… Bizge toghra-dorustluq kérek…Bizge qérindashliq we hemkarliq kérek…!
Biz bu munasiwet bilen pütün dunyadiki Sherqitürkistanliq qérindashlardin, Sherqitürkistan Jumhuriyiti Sürgündiki Hökümitining milliy dawayimizdiki roligha sel qarimasliqni, düshmenlerning her-türluk pitne éghiwalirigha qulaq salmasliqni, hökümitimizni güllendürüsh we ronaq tapquzush wezipisining hemmimizning bash tartip bolmaydighan ortaq mejburiyitimiz ikenlikini chongqur hésqilip yétishini ümid qilimiz! Shuning bilen yene xelqimizdin bu bir yéngi yildin bashlap xudaliq üchün bolsimu toghra yolni tonup, Allaning arghamchisigha teng ésilip, birlik we baraberlik ichide milliy herkitimiz üchün zor utuqlarni qolgha keltürüshni ümid qilimiz!
Hörmet bilen:
Sherqitürkistan Jumhuriyiti Sürgündiki Hükümeti Bashménistiri
Ismail Chinggiz
