Herbiy Meshqlerdin Kéyin Asya - Tinch Okyan Rayonida Peyda Bolghan Yéngi Uyushush

Muxbirimiz Weli
2010-07-30
Ötken heptide amérika bilen jenubiy koriye sherqiy déngiz we sériq déngiz rayonida birleshme herbiy meshq ötküzgen idi. Xitaymu bu rayonda arqa - Arqidin herbiy meshiq ötküzüp özining küchiyip bash kötürgenlikini dunyagha körsitishke bashlidi. Bu herbiy meshqlerning netijiside, asya - Tinch okyan rayonidiki döletler ara yéngidin uyushush peyda boldi.


Sherqiy déngizda we sériq déngzida ötküzülgen herxil herbiy meshqlerdin kéyin, asya - Tinch okyan rayonida yéngi uyushush peyda boldi. Séngaporda chiqidighan birleshme seher géziti ning bayan qilishiche, sherqiy jenubi asiya birlikidiki döletler 23 - Iyol küni bixeterlik söhbiti ötküzgende, xitayning déngiz teweliki dégen mesilige munasiwetlik döletlerning hemmisi birdek xitayni eyiblidi.


Sherqiy jenubi asiya birlikidiki 12 dölet déngiz tewelik hoquqini jakarlidi
Asiya - Tinch okyan döletlirining wéytnamda ötküzgen aliy derijilik uchrishishidimu, sherqiy jenubi asiya birlikidiki 12 dölet yene, xitaygha qarimu - Qarishi halda özlirining déngiz tewelik hoquqini jakarlidi. Bu aliy derijilik uchrishishqa qatnashqan 27 döletning hemmisi, asiya - Tinch okyan rayonida pütünley amérika bilen bir septe turidighanliqini bildürdi.


Xitay yene sherqi déngizda herbiy meshqi ötküzüsh arqiliq asiya - Tinch okyan döletlirining alyi derijilik uchrishishigha inkas qayturdi
Xewerde éytilishiche, xitay 26 - Iyol küni yene sherqi déngizda, köp xil eskiri qisimlarning birleshme herbiy meshqi ötküzüp, bu arqiliq, asiya - Tinch okyan döletlirining aliy derijilik uchrishishida xitaygha qilinghan hujumgha bolghan ghezipini ipadilidi.


Amérika générali waltér yégirme altinchi mart herbiy paraxot weqesining tekshürüsh netijisini élan qildi
Roytrs agéntliqining siuldin bayan qilishiche, amérikining jenubiy koriyidiki herbiy qisimlirining komandiri général waltér sharp 29 - Iyul künidiki bayanatida amérika, engiliye, awstraliye we shiwétsiye herbii mutexessisliri birlikte 3 - Ayning 26 - Küni jenubiy koriyining herbiy paraxoti chöktüriwétilgen, 46 neper déngizchisi öltürülgen weqe heqqide élip barghan tekshürüshning xolasisi shimaliy koriye su minasi atqan, dégendin ibaret dep jakarlidi. Shundaqla, ötken heptide amérika bilen jenubiy koriye sherqiy déngiz we sériq déngiz rayonida ötküzgen herbiy meshqning özi shimaliy koriyige bérilgen küchlük ségnal dep körsetti.


Shimaliy koriye birleshken döletler teshkilatining jenubiy koriyide turushliq qisimliri bilen söhbet ötküzüshke köndi
Fransiye agéntliqining siuldin bayan qilishiche, bügün shimaliy koriyining herbiy dairiliri bilen amérika qisimlirining komandiri körüshti, ikki saet dawamlashqan bu söhbette, 9 - Awghust küni penmunjon dégen jayda, jenubiy koriyining herbiy paraxoti chöktüriwitilgen weqe toghrisida birleshken döletler teshkilatining jenubiy koriyide turushliq qisimlirining komandiri bilen söhbet ötküzüshke kélishti.

Xewerde éytilishiche, bu söhbette, birleshken döletler teshkilatining jenubiy koriyide turushliq qisimliri bilen shimaliy koriye otturisida 1950 - Yilidin 53 - Yilighiche dawamlashqan koriye urushidin kéyinki ixtilap we toqunushlarni hel qilish heqqide muzakire élip bérilidiken.


Hazir xitayning déngiz armiyisi eng yaman niyetlik kéngeymichilikke qedem qoydi dégen uqum ortaq köz qarashqa aylandi
Xitaygha nezer tor gézitide bügün musteqil tetqiqatchi li tyenshaw mundaq mulahize élan qildi: amérika bilen jenubiy koriyining yégirme altinchi mart paraxot weqesi ge qaritilghan herbiy meshqi buningdin kéyin, yil axirigha qeder her ayda ötküzüp turulidighan herbiy meshqqe, weqe chiqarghan shimaliy koriye bu herbiy meshqlerning biwaste nishanigha aylandi.

Amérika bilen shimaliy koriyining herbiy küch sélishturmisida nahayiti chong perq barliqi hemmige ayan bolghan ehwal astida, amérikining washington belgilik dunya buyiche eng qudretlik awiamatkisi we f 22 belgilik dunya buyiche eng ilghar urushchi ayropilanliri bu qitimqi herbiy meshqqe qatnashturulghanliqining netijisi, shimaliy koriyige tekküzüp xitayni aghritish tin ibaret netije bolup chiqti. Buning netijiside xitay hazir déngizlarda arqa - Arqidin étish meshqi ötküzüshke we shimaliy koriye bilen sep tüzüshke bashlidi.

Buning netijiside yene, amérika bilen jenubiy koriyining herbiy birlikige yaponiye qoshuldi. Sherqiy jenubi asiya döletlirimu otturigha chiqip, xitayni bu rayonda yétim halgha chüshürüp qoydi. Xitayning déngiz armiyisi eng yaman niyetlik kéngeymichilikke qedem qoydi dégen uqum hazir amérika dölet mejliside, aqsarayda we amérika tetqiqatchilirida ortaq köz qarashqa aylandi.

http://www.rfa.org/uyghur/xewerler/tepsili_xewer/herbiy-meshiqler-07302010214312.html/story_main?encoding=latin
Yuqiridiki ulinishtin bu progirammining tepsilatini anglighaysiler.