Muxbirimiz Shöhret Hoshur xewiri
2008-08-10
Bügün yeni 10 - Awghust küni, aqsuning kucha nahiye bazirida we qoralliq étishish weqesi yüz bergen. Weqede kucha nahiyilik saqchi idarisi, nahiyilik sot mehkimisi, nahiyilik pilanliq tughut idarisi we nahiyilik baj idarisi qatarliq hökümet orunliri arqa - Arqidin hujumgha uchrighan.
Radiomizgha iane qilinghan bu süret, xitay qoralliq saqchilirigha qilinghan hujum yüzbergen qeshqer shehirining ali méhmanxanisining partilitiwétilgen aldi ishikidin bir körünüsh.
Nöwette weqede ölgen we yarilanghanlarning sani heqqide perqliq melumatlar mewjut. Saqchi dairilirining shinxua agéntliqigha bergen qisqa melumatida, weqede ölgenlerning sani 11, bulardin 10 nepiri hujumchilar, bir nepiri saqchi xadimi dep körsitilgen. Emma, weqeni körgen yerlik ahaliler, weqede saqchi tereptin 10 kishi ölgenlikini, bulardin birining nahiyilik saqchi idarisining bashliqi ikenlikini bildürdi.
Emma bu melumatlarni saqchi dairiliri téxi testiqlimidi. Saqchi terep weqe heqqide melumat bérishni izchil türde ret qilmaqta. Weqe kéche saet 3 yérim etrapida bashlanghan. Etigen saet 8 ge qeder partilash we oq awazliri bésiqmighan.
Shinxua agéntliqining xewer qilishiche, hujumchilarning sani 15 bolup, bulardin ikki nepiri nahiyilik saqchi idarisigha partlatquch qachilanghan motosiklit bilen hujum qilghan. Bu hujumda bir neper saqchi ölgen ikki saqchi yarilanghan. Biz kucha nahiyilik doxturxanining jiddiy qutquzush bölümidin ehwal igiliginimizde, ular yaridarlarning besh kishi ikenlikini bildürdi.
Weqeni körgüchilerdin birining bildürüshiche, hujumchilar bir orungha motosiklit bilen yene bir orungha partlatquch qachilanghan taksi bilen hujum qilghan. Shinxua agéntliqining xewiride, bir qisim méhmanxana we soda orunliriningmu hujumgha uchrighanliqini bayan qilghan. Emma yerlik ahaliler, hujumchilarning méhmanxana we soda orunlirini mudapielinish üchün qollanghanliqini bildürdi. Ahaliler yene, bezi hujumchilarning saqchilar yéqinlashqanda özini partilatqanliqini, terep - Tereptin partlighan bomba awazi seweblik saqchilarning patparaqchiliqqa chüshkenlikini bildürdi.
Xitayche Real Time tor béti, bu qétimqi hujumchilar arisida qizlarningmu barliqini xewer qildi. Emma sanini bildürmidi. Xitayche b b s torining xewer qilishiche, hujumchilardin 8 nepiri saqchilar teripidin étip öltürülgen, 2 nepiri saqchilar yéqinlashqanda özini partlatqan, 2 nepiri tirik qolgha chüshken, 3 nepiri ghayip bolghan. Nöwette kuchada herbiy halet dawam qilmaqta.
Menbe:http://www.rfa.org/uyghur/xewerler/tepsili_xewer/kuchada-zenjirsiman-partlash-08112008011023.html?encoding=latin
