Amérika Prézidénti George Bush Béyjingda Xitayni Kishilik Hoquqni Ilgiri Sürüshke Chaqirdi
Muxbirimiz Jüme xewiri
2008-08-08

Amérika prézidénti bush béyjingda xitaydiki kishilik hoquq mesilisini yene bir qétim tilgha aldi. U aldinqi küni taylandning paytexti bankokta xitaydiki kishilik mesilisige yéqindin köngül bolidighanliqini otturigha qoyghan idi.


Yaponiyide dawamlishiwatqan sanaetleshken 8 dölet aliy yighinida prezidént bush we xu jintaw sürette.


8 - Awghust etigende, amérikining béyjing shehiridiki yéngi elchixanisining échilish we lénta késish murasimi ötküzülgen bolup, murasimgha qatnashqan amérika prézidént jorj bush murasimda tebrik söz qildi we xitayni öz puqralirining kishilik hoquqni ilgiri sürüshke chaqirdi.


Prézidént bush sözide xitay amérika munasiwetlirining ijabiy we semimiylik asasigha qurulghanliqini ilgiri sürgen bolsimu, u, bu semimiylikining yene, söz pikir we étiqat erkinliki jehette semimiy bolushtin ibaret ikenlikini otturigha qoydi.

Prézidént bush: " her bir ademde özi oylighinini qorqmay bayan qilalaydighan erkinlik bolushi kérek"

U munda dédi: " biz yene her bir ademde özi oylighinini qorqmay bayan qilalaydighan, we özi tallighan dingha étiqat qilalaydighan erkinlik bolushi kéreklikidin ibaret qimmet qarishimiz heqqide söz échishni semimiylik bilen izchil dawamlashturimiz."

Bu prézidént bushning bu nöwetlik asiya sepiri jeryanida xitayning kishilik hoquq mesilisini ikkinchi qétim tilgha élishi we xitayni öz xelqige diniy étiqat we söz - Pikir erkinliki bérishke yene bir qétim qistishi bolup, u aldinqi küni tayland paytexti bankokta xitaygha kishilik hoquq mesiliside bésim ishletken idi.

Prézidént bush 7 - Awghust tayland paytexti bankokta qilghan sözide, amérikining xitaydiki kishilik hoquq mesililirige yéqindin köngül bolidighanliqini bildürgen we: "men xitay rehberlirige bizning diniy étiqat erkinliki, we kishilik hoquq mesililirige chongqur köngül bölidighanliqini éniq, semimiy we izchil bayan qilip keldim" dégen idi.

Prézidént bush: "xitay xelqi insaniyetning tebiiy hoquqi bolghan négizlik erkinliktin behrimen bolushqa munasip"

Prézidént bush yene, özining xitay siyasiy öktichiliri we bashqa kishilik hoquq paaliyetchiliri bilen uchurushni dawamlashturup kelgenlikini tilgha alghan we: " amérika qoshma shtatliri xitay xelqining insaniyetning tebiiy hoquqi bolghan négizlik erkinliktin behrimen bolushqa munasip ikenlikige ishinidu. Shunga amérika xitayning siyasiy öktichilerni, kishilik hoquq paaliyetchilirini, diniy zatlarni tutqun qilishigha qetiy qarshi turidu" dep körsetken idi.

Jorj bush :"pikir - Idiyilerni erkin ipadileshke yol qoyulidighan jemiyet: eng tinch jemiyet"
Amérika prézidénti jorj bush, 8 - Awghust etigen amérika elchixanisidiki nutqida yene xitay jemiyiti heqqide toxtalghanda, söz - Pikir erkinliki bolghan jemiyetning téximu tinch we bayashat bolidighanliqini tekitlidi we:" biz shuninggha choqur ishinimizki, pikir - Idiyilerni erkin ipadileshke yol qoyulidighan jemiyet, eng bayashat we eng tinch jemiyet bolup chiqalaydu."

Prézidént bush shu küni kechqurun saet 8 de béyjing olimpikining échilish murasimigha qatnashti.

Menbe:http://www.rfa.org/uyghur/xewerler/tepsili_xewer/bush-beyjing-olimpik-nutuq-08092008042630.html?encoding=latin