Xelqara Kechürüm Teshkilati Abdushükür Qurban Heqqide Ammiwiy Heriket Bashlidi
Muxbirimiz Shöhret Hoshur
2008-12-09
Xelqara kechürüm teshkilati 5 - Dékabir küni bayanat élan qilip, méyip tutqun abdushükür qurban heqqide ammiwiy heriket bashlidi. Kechürüm teshkilati, xitay hökümitidin abdushükürning qiyin - Qistaqqa élinmasliqini, ailisi bilen körüshüsh, adwokat tutush we xelqara ölchemler boyiche bir terep qilinishini telep qilmaqta.
Abdushükür 2 heptining aldida yeni 21 - Noyabir küni ghulja shehirining penjim yézisida tutqun qilinghan, nöwette yéngi hayat türmiside qamaqliqtur. Méyip yash abdushükür qurbanning namelum seweb bilen tutqun qilinghanliq xewiri tarqalghandin kéyin, amérika uyghur birleshmisi weqeni alaqidar orunlargha yetküzdi: mezkur birleshmining xadimi eymiy rigérning bildürüshiche, abdushükürning ehwali, xelqara kechürüm teshkilati, dunya kishilik hoquqni közitish jemiyiti qatarliq xelqara jemiyetlerge yetküzüldi.
5 - Dékabir küni heriket bashlighan kechürüm teshkilati, bayanatida, abdushükür qurbanning méyip yash ikenliki, bu seweblik uning qéyin - Qistaqqa élinishidin endishe qiliwatqanliqini bildürgen. Bayanatta yene, abdushükürning tutqun qilinip 5 - Künige qeder qaysi türmide ikenlikini ailisining bilmigenlikini abdushükür we ailisining qanuni hoquqining depsende bolushi dep körsitilgen.
Bayanatta, xitayning yéqinqi yillardin béri uyghur rayonida élip bériwatqan qattiq zerbe bérish heriketliri, uyghurlarning döletni aghdurush, döletni parchilash, muqimliqqa tehdit sélish we dölet mexpiyetlikini ashkarilash qatarliq namlar astida xalighanche tutqun qiliniwatqanliqi we éghir jazaliniwatqanliqi eskertilgen.
Bayanat yene, abdushükürning aile ehwalimu tonushturulghan. Bayanatta bildürülishiche, abdushükür ailisi penjim yézisidiki nuqtiliq aililerdin biri bolup, abdushükürning dadisi 1999 - Yili bir yilliq emgek bilen terbiyilesh jazasigha uchrighan.
Kechürüm teshkilati, dunyaning her qaysi jayliridiki ezalirini, abdushükürning qanuniy hoquqigha képillik qilish heqqide xitay prézidénti xu jintawgha, uyghur rayonining emeldarliridin wang léchüen bilen nur bekrige, ili oblastliq saqchi idarisining bashliqi wang méngshenge ochuq mektup yézishqa chaqirghan.
Kechürüm teshkilati bayanatida xitay hökümitini, xelqara qanunlarda belgilengen kishilerning erkin pikir qilish we teshkilatlargha uyushush qatarliq siyasiy we ijtimaiy heqlirini jinayet dep qarimasliqqa chaqirghan hem abdushükür qurbanni derhal qoyuwétish we yaki xelqara qanuniy ölchemler buyiche bir terep qilishni telep qilghan.
Menbe:http://www.rfa.org/uyghur/xewerler/tepsili_xewer/meyip-yash-qolgha-elindi-12102008012456.html/story_main?encoding=latin